స్టార్ హీరోలతో నటించా కానీ.. ఆ ఒక్క హీరోతోనే మిస్ అయ్యా.. ఆసక్తికర విషయం చెప్పిన ఖుష్బూ

ఖుష్బూ 1980వ దశకపు నటీనటుల రీ-యూనియన్‌ను ఎంతగానో ఇష్టపడతారని తెలిపారు. “1980ల రీ-యూనియన్ అంటే ఎంతో ప్రత్యేకమైనది. కోట్ల మంది ఈ కార్యక్రమం కోసం ఎదురుచూస్తుంటారు. ఏ రంగు దుస్తులు వేసుకుంటారు, ఎలాంటి డ్యాన్స్‌లు చేస్తారు, ఒకరిపై ఒకరు జోక్‌లు ఎలా వేసుకుంటారు అని ఆసక్తిగా గమనిస్తుంటారు. ఆ రోజు మేమంతా చిన్నపిల్లల్లా మారిపోతాం. అక్కడ ఎవరూ పెద్ద స్టార్స్, మెగాస్టార్స్, సూపర్ స్టార్స్ ఉండరు. మేమంతా స్నేహితులం, స్కూల్ ఫ్రెండ్స్ లాగా కలిపి గలాటా చేసి డ్యాన్స్ చేస్తాం. అది నమ్మశక్యం కాని అనుభవం” అని ఆమె వివరించారు. తమకు క్లాస్ ఆఫ్ 80స్ అనే వాట్సాప్ గ్రూప్ ఉందని, అందులో 36 మంది సభ్యులు ఉన్నారని, ప్రతిరోజు ఒకరితో ఒకరు మాట్లాడుకుంటామని, అన్ని విషయాలు పంచుకుంటామని తెలిపారు. భాషాప్రియ గారు ఈ రీ-యూనియన్‌లో ఎందుకు కనిపించరనే ప్రశ్నకు, ఆమె అనారోగ్య కారణాల వల్ల రాలేకపోయారని, ఆమె ఎప్పుడూ ఒంటరిగా ఉండటానికి ఇష్టపడతారని ఖుష్బూ స్పష్టం చేశారు.

సుహాసిని, పూర్ణిమ భాగ్యరాజ్, లిస్సీ, రాజ్ కుమార్ సేతుపతి, రెహ్మాన్, ప్రభు, సత్యరాజ్, లాల్ సార్, చిరంజీవి, పూనమ్ ధిల్లాన్, జాకీ ష్రాఫ్, సంజయ్ దత్, మోహన్ లాల్, రజనీకాంత్ వంటి అనేక మంది తారలు ఈ గ్రూప్‌లో ఉన్నారని ఆమె పేర్కొన్నారు. అయితే, మమ్ముట్టి, కమల్ హాసన్ ఈ 80ల గ్రూప్‌లో లేరని తెలిపారు. రాధిక, శరత్ కుమార్, ఖుష్బూ, పూర్ణిమ భాగ్యరాజ్, సుహాసిని వంటి కొందరు తారలు ఏ కార్యక్రమానికి వెళ్ళినా కలిసి ఉంటారని, ముందుగానే ప్లాన్ చేసుకుని వెళ్తామని ఆమె వివరించారు. వెంకటేష్, నాగార్జున, నరేష్, జయసుధ వంటి తారలు కూడా 80ల బృందంలో భాగమని ఆమె చెప్పారు. ఖుష్బూ తన తొలి తెలుగు చిత్రం కలియుగ పాండవులు (1986) వెంకటేష్ సరసన అని గుర్తు చేసుకున్నారు. ఈ సినిమాకు వెంకటేష్‌నే తనను సిఫార్సు చేశారని తెలిపారు. వెంకటేష్‌తో చేసిన షూటింగ్ జ్ఞాపకాలు ఇప్పటికీ పచ్చగానే ఉన్నాయని ఆమె చెప్పారు. అయితే, బాలకృష్ణ , చిరంజీవి వంటి అగ్ర తారలతో తాను ఎందుకు నటించలేదనే ప్రశ్నకు ఖుష్బూ వివరణ ఇచ్చారు.

“నేను 1988లో తమిళ సినీ పరిశ్రమలోకి వెళ్ళాను. 1986లో తెలుగులో అరంగేట్రం చేసి, 1987లో కన్నడ, తమిళ చిత్రాలలో నటించడం ప్రారంభించాను. ఆ తర్వాత తమిళంలో చాలా బిజీ అయిపోయాను. అప్పట్లో సినీ పరిశ్రమ చెన్నైలో ఉండేది. ఆ తర్వాత పరిశ్రమ హైదరాబాద్‌కు తరలివెళ్ళింది. నేను చెన్నైలోనే ఉండిపోయాను, మళ్ళీ మారాలని అనుకోలేదు. అందువల్ల తెలుగులో వచ్చిన ఆఫర్లను అంగీకరించలేకపోయాను” అని ఖుష్బూ పేర్కొన్నారు. చంటి వంటి తెలుగు చిత్రాలలో నటించమని ఆఫర్ వచ్చినా, రజనీకాంత్, కమల్ హాసన్ చిత్రాలను వదులుకోవాల్సి వస్తుందని ఆమె ఆ సినిమాను వదులుకోవాల్సి వచ్చిందని తెలిపారు. “తమిళంలో నేను స్థిరపడ్డాను, కాబట్టి ఆ చిత్రాలను వదులుకోలేకపోయాను. అందుకే చంటిని వదులుకోవాల్సి వచ్చింది” అని ఆమె అన్నారు.

మరిన్ని సినిమా వార్తల కోసం ఇక్కడ క్లిక్ చేయండి