Devara Movie: ఎన్టీఆర్ అభిమానులకు కొరటాల గుడ్ న్యూస్.. ‘దేవర’ ఒకటి కాదు రెండు..

Koratala Siva, Devara Movie

ప్రస్తుతం ఎన్టీఆర్ ఫ్యాన్స్ ఎంతో ఆసక్తిగా ఎదురుచూస్తోన్న సినిమా దేవర. ఆర్ఆర్ఆర్ తర్వాత తారక్ నటిస్తోన్న ఈ సినిమాపై ఇప్పటికే భారీ అంచనాలు నెలకొన్నాయి. జనతా గ్యారేజ్ లాంటి బ్లాక్ బస్టర్ హిట్ తర్వాత తారక్, డైరెక్టర్ కొరటాల శివ కాంబోలో సినిమా ఇది. పాన్ ఇండియా లెవల్లో ఈ మూవీని తెరకెక్కిస్తుండగా.. బాలీవుడ్ హీరోయిన్ జాన్వీ కపూర్ ఈ చిత్రంలో కథానాయికగా నటిస్తుంది. ఈ సినిమాతోనే తెలుగు తెరకు పరిచయం కాబోతుంది జాన్వీ. అలాగే ఆదిపురుష్ సినిమాతో ప్రేక్షకులను అలరించిన సైఫ్.. మరోసారి దేవరతో దక్షిణాదిలో సందడి చేయబోతున్నారు. కొద్ది రోజులుగా ఈ మూవీ షూటింగ్ శరవేగంగా జరుగుతుంది. తాజాగా ఈ మూవీ నుంచి ఓ స్పెషల్ సర్ ప్రైజ్ ఇచ్చాడు డైరెక్టర్ కొరటాల శివ.

ఆ వీడియోలో కొరటాల శివ మాట్లాడుతూ.. “దేవర కథ విషయంలో ముందుగా ఎన్టీఆర్ తోపాటు మేమంతా ఉద్వేగానికి గురయ్యాం. ఎందుకంటే కొత్త ప్రపంచాన్ని పరిచయం చేస్తున్నాం. ఇందులో బలమైన పాత్రలు చాలా ఉన్నాయి. ఎంతో ఉత్సాహంగా షూటింగ్ ప్రారంభించిన తర్వాత ఆ ప్రపంచం మరింత పెద్దదైపోయింది. కొన్ని షెడ్యూల్స్, షూటింగ్ ఔట్ పుట్ తో మాలో మరింత రెట్టింపు ఉత్సాహం కలిగింది. ఈ సినిమాలో ఒక్క డైలాగ్, ఒక్క సీన్ కూడా తీసేయ్యలేము. అందుకే ఒక్క భాగంలో ఇంత పెద్దకథను ముగించేయడం తప్పు అనిపించింది. అందుకే పాత్రలు, వాటి భావోద్వేగాలను పూర్తిస్థాయిలో చూపించాలంటే ఒక్క పార్ట్ లో కుదురదనుకున్నాను. అందరితో చర్చించి పార్ట్ 2 నిర్ణయం తీసుకున్నాను ” అంటూ చెప్పుకొచ్చారు. ప్రస్తుతం ఈ వీడియో నెట్టింట వైరలవుతుండగా.. తారక్ ఫ్యాన్స్ సంతోషం వ్యక్తం చేస్తున్నారు.

ఇప్పటివరకు ఎన్నో హిట్ చిత్రాల్లో నటించిన తారక్.. ఇలా ఓ సినిమాకు సీక్వెల్ చేయడం ఇదే తొలిసారి. ఇక ఇప్పటికే విడుదలైన గ్లింప్స్, పోస్టర్స్ మూవీపై అంచనాలను పెంచేశాయి. మాస్ యాక్షన్ నేపథ్యంలో రాబోతున్న ఈ చిత్రంలో తారక్ మాస్ హీరోగా కనిపించనున్నారు. అలాగే హీరోయిన్ జాన్వీ కపూర్ డీగ్లామర్ లుక్ లో కనిపించనుంది. ఈ చిత్రానికి అనిరుధ్ రవిచందర్ సంగీతం అందిస్తున్నారు.

మరిన్ని సినిమా వార్తల కోసం ఇక్కడ క్లిక్ చేయండి.