OMG 2: తెలుగులో రీమేక్‌ కానున్న ‘ఓ మై గాడ్‌2’.. లీడ్‌ రోల్‌లో నటించేది ఆ హీరోనేనా.?

ఈ మధ్య కాలంలో తెలుగు సినిమాలు హిందీలో రీమేక్‌ అవుతుండడం చూసే ఉంటాం. సౌత్‌లో భారీ విజయాలను అందుకున్న సినిమాలను హిందీలో రీమేక్‌ చేస్తున్నారు. అయితే చాలా రోజుల తర్వాత బాలీవుడ్‌లో మంచి విజయాన్ని అందుకున్న ఓ చిత్రం ఇప్పుడు తెలుగులో రీమేక్‌ కానుంది. ఆ సినిమా మరెదో కాదు ఇటీవల వచ్చిన ‘ఓ మై గాడ్‌ 2’ మూవీనే.

ఓమై గాడ్‌ సినిమాకు సీక్వెల్‌గా తెరకెక్కిన ఈ సినిమా ఆగస్టు 11వ తేదీన విడుదలైంది. సామాజిక అంశాన్ని అద్భుతంగా చూపించిన ఈ సినిమా ప్రేక్షకులను ఎంతగానో ఆకట్టుకుంది. చిన్నారుల్లో లైంగిక విజ్ఞానం అనే సున్నిత కథాంశంతో వచ్చిన ఈ సినిమాకు అమిత్‌ రాయ్‌ దర్శకత్వం వహించారు. విమర్శకుల ప్రశంసలు సైతం అందుకున్న ఈ చిత్రం బాక్సాఫీస్‌ వద్ద ఏకంగా రూ. 150 కోట్లు రాబట్టింది. ఈ సినిమాలో బాలీవుడ్ హీరో అక్షయ్‌ కుమార్‌ శివుడి పాత్రలో నటించి మెప్పించారు.

ఇదిలా ఉంటే తాజా సమాచారం ప్రకారం ఈ సినిమాను తెలుగులో రీమేక్‌ చేయనున్నారని తెలుస్తోంది. తాజాగా ఓటీటీలో సందడి చేస్తున్న ఓమై గాడ్‌2 చిత్రాన్ని ఇప్పుడు తెలుగులో రీమేక్‌ చేయడానికి సిద్ధమవుఉన్నట్లు సమాచారం. బడా నిర్మాణ సంస్థ ఈ రీమేక్‌ హక్కులను సొంతం చేసుకున్నట్లు వార్తలు వస్తున్నాయి. దీంతో ఇప్పుడు అక్షయ్‌ కుమార్‌ పాత్రలో ఎవరు నటించనున్నారన్నదానిపై ఆసక్తి నెలకొంది.

సినిమాకు కీలకమైన ఈ పాత్రలో తెలుగులో ఎవరు పోషిస్తే బాగుంటుందని ఆలోచిస్తున్నారని సమాచారం. అయితే ఓమై గాడ్‌ తొలి పార్ట్‌ను తెలుగులో ‘గోపాల గోపాల’ పేరుతో తెరకెక్కించిన విషయం తెలిసిందే. కిషోర్‌ కుమార్‌ పార్థసాని తెరకెక్కించిన ఈ సినిమాలో పవన్ కళ్యాణ్‌తో పాటు, వెంకటేష్‌ ప్రధాన పాత్రలో నటించారు. ఈ సినిమా తెలుగులో భారీ విజయాన్ని సొంతం చేసుకుంది. దీంతో సీక్వెల్ చిత్రాన్ని కూడా తెలుగులో రీమేక్‌ చేసే పనిలో పడ్డట్లు తెలుస్తోంది. అయితే శివుడి పాత్రలో ఓ టాప్ హీరో నటించనున్నాడని సమాచారం. ఈ సీక్వెల్‌పై త్వరలోనే అధికారిక ప్రకటన వచ్చే అవకాశాలు ఉన్నాయని తెలుస్తోంది. అయితే ఈ సినిమాలో శివుడి పాత్రలో వెంకీ నటించే అవకాశాలు ఎక్కువగా ఉన్నాయని సమాచారం.

మరిన్ని సినిమా వార్తల కోసం క్లిక్ చేయండి..