Vaccine: వ్యాక్సిన్ రిజిస్ట్రేషన్ ఎలా చేసుకోవాలో తెలియదా.? దగ్గర్లోని పోస్టాఫీస్కు వెళ్లండి.. తెలంగాణ పోస్టల్..
Vaccine Registration: కరోనా మహమ్మారిని అంతమొందించేందుకు మన దగ్గర ఉన్న ఏకైక అస్త్రం వ్యాక్సినేషన్. వీలైనంత త్వరగా వ్యాక్సినేషన్ ప్రక్రియ పూర్తి చేయడం ద్వారానే కరోనా కంట్రోల్లోకి వస్తుందని నిపుణులు చెబుతున్నారు...
Updated on: May 30, 2021 | 3:23 PM
Vaccine Registration: కరోనా మహమ్మారిని అంతమొందించేందుకు మన దగ్గర ఉన్న ఏకైక అస్త్రం వ్యాక్సినేషన్. వీలైనంత త్వరగా వ్యాక్సినేషన్ ప్రక్రియ పూర్తి చేయడం ద్వారానే కరోనా కంట్రోల్లోకి వస్తుందని నిపుణులు చెబుతున్నారు. ఈ క్రమంలోనే ప్రభుత్వాలు సైతం వ్యాక్సినేషన్ ప్రక్రియను వేగవంతం చేస్తున్నాయి. వ్యాక్సిన్ తీసుకోవాలంటే ముందుగా ఆన్లైన్లో స్టాట్ బుక్ చేసుకునే క్రమంలో రిజిస్ట్రేషన్ చేసుకోవాలనే విషయం తెలిసిందే. అయితే గ్రామీణ ప్రాంతాల్లో ఇంటర్నెట్, స్మార్ట్ ఫోన్ అందుబాటులో లేని వారు ఎంతో మంది ఉన్నారు. ఒకవేళ ఉన్నా కూడా రిజిస్ట్రేషన్ ఎలా చేసుకోవాలో అవగాహన చాలా తక్కువ. ఈ సమస్యకు చెక్ పెట్టడానికే తెలంగాణ పోస్టల్ శాఖ మంచి నిర్ణయాన్ని తీసుకుంది. ఇందులో భాగంగా దర్గర్లోని పోస్టాఫీస్కు వెళితే అక్కడి సిబ్బంది వ్యాక్సిన్ రిజిస్ట్రేషన్ చేసే సేవను అందుబాటులోకి తీసుకొచ్చారు. ఇందు కోసం ఒక ఫొటో ప్రూఫ్ ఐడీ, ఓటీపీ కోసం మొబైల్ను వెంట తీసుకొని వెళ్లాలి. హైదరాబాద్ రీజియన్లోని 36 హెడ్ పోస్టాఫీస్లు, 643 సబ్ పోస్ట్ ఆఫీసులు, 10 బ్రాంచ్ పోస్టాఫీసుల్లో ఇప్పటికే ఈ సేవలు అందుబాటులోకి వచ్చాయి. రెండో దశలో భాగంగా మరో 800 పోస్టాఫీసుల్లో ఈ సేవను అందించనున్నారు. అయితే దీనికి ఎలాంటి రుసుము చెల్లించాల్సిన అవసరం లేదని, పూర్తిగా ఉచితంగా రిజిస్ట్రేషన్ చేస్తారని అధికారులు తెలిపారు. రిజిస్ట్రేషన్ కోసం పోస్టల్ సిబ్బంది కోవిన్ యాప్ను ఉయోగించుకోనున్నారు. కాబట్టి రిజిస్ట్రేషన్ చేసుకోవడం తెలియని వారు ఈ సేవలను వినియోగించుకోవాలని పోస్టల్ అధికారులు సూచించారు.
