వైద్య సిబ్బందికి కరోనా సోకకుండా..‘అభేద్యా’ రక్షణ

కరోనా పంజా నుంచి ఎవరూ తప్పించుకోలేకపోతున్నారు. దేశాధ్యక్షులు, ప్రధానులు, మంత్రులు, ఇలా అనేక మంది రాజకీయ ప్రముఖులు వైరస్ బారినపడుతున్నారు. అంతేకాదు, తమ ప్రాణాలకు తెగించి రోగులను కాపాడుతున్న వైద్యులు, వైద్య సిబ్బంది కూడా పెద్ద సంఖ్యలో కరోనా కాటుకు గురవుతున్నారు. ఈ నేపథ్యంలో వైద్యులు, వైద్య సిబ్బందికి వైరస్ సోకకుండా ఉండేందుకు ఎయిమ్స్ జోధ్‌పూర్, ఇస్కాన్ సర్జికల్స్ లిమిటెడ్ కలిసి ఒక కొత్త రక్షణ కవచాన్ని తయారు చేశాయి.

ఒక పెట్టె మాదిరిగా ఉండే యంత్రానికి ‘అభే‌ద్యా’ అని పేరు పెట్టారు. ఈ పరికరాన్ని మంగళవారం ఆవిష్కరించారు. రోగులకు అనెస్థీషియా ఇచ్చేటప్పుడు లేదా వారి నుంచి స్రవాలను బయటకు తీసేటప్పుడు డాక్టర్లు, వైద్య సిబ్బందికి ఇది ఎంతో ఉపయోగపడుతుందని ఎయిమ్స్ జోధ్‌పూర్ డైరెక్టర్ డాక్టర్ సంజీవ్ మిశ్రా తెలిపారు. పెట్టె మాదిరిగా ఉండే దీనిలో అనేక పరికరాలు ఉంటాయని, రోగులను అందులో ఉంచితే ఆయా విధులు నిర్వహించే వైద్య సిబ్బందికి వైరస్ వంటివి సోకకుండా రక్షణ కల్పిస్తుందని వారు వెల్లడించారు.