RS 75 Coin: రూ. 75 నాణెన్ని ఎందుకు తీసుకొచ్చారు.? దీనిని ఎలా కొనుగోలు చేయాలో తెలుసా.?
ప్రధానమంత్రి నరేంద్ర మోదీ మే 28న లోక్‌సభ ఛాంబర్‌లో జరిగిన ప్రారంభోత్సవ కార్యక్రమంలో కొత్త పార్లమెంట్ భవనం ప్రారంభోత్సవానికి గుర్తుగా ప్రత్యేక స్మారక రూ.75 నాణెం విడుదల చేశారు. కేంద్ర ఆర్థిక మంత్రిత్వ శాఖ ఆధ్వర్యంలోని ఆర్థిక వ్యవహారాల శాఖ అధికారిక నోటిఫికేషన్ ప్రకారం..
Updated on: May 30, 2023 | 7:34 PM
ప్రధానమంత్రి నరేంద్ర మోదీ మే 28న లోక్‌సభ ఛాంబర్‌లో జరిగిన ప్రారంభోత్సవ కార్యక్రమంలో కొత్త పార్లమెంట్ భవనం ప్రారంభోత్సవానికి గుర్తుగా ప్రత్యేక స్మారక రూ.75 నాణెం విడుదల చేశారు. కేంద్ర ఆర్థిక మంత్రిత్వ శాఖ ఆధ్వర్యంలోని ఆర్థిక వ్యవహారాల శాఖ అధికారిక నోటిఫికేషన్ ప్రకారం, నాణెం బరువు దాదాపు 35 గ్రాములు ఉంటుంది. అసలు ఈ నాణెం ఎవరు తీసుకోవచ్చు. దేనిని బయట చెలామణీలోకి తీసుకువస్తారా? వంటి దీనికి సంబంధించి మరిన్ని వివరాలు తెలుసుకుందాం.
ముందుగా అసలు ప్రభుత్వం రూ.75 నాణెం ఎందుకు తీసుకొచ్చింది? అనే విషయాన్ని చూద్దాం.. మే 28న, కొత్త పార్లమెంట్ భవనం ప్రారంభోత్సవానికి గుర్తుగా ఆర్థిక మంత్రిత్వ శాఖ రూ.75 డినామినేషన్ నాణెంతో వచ్చింది. మంత్రిత్వ శాఖ చెబుతున్న దాని ప్రకారం, నాణెం ముందరి వైపు మధ్యలో ‘అశోక స్తంభం’ సింహం, రాజధానిని కలిగి ఉంటుంది. దాని కింద ‘సత్యమేవ జయతే’ అని రాసి ఉంటుంది. అశోక స్తంభానికి ఎడమ అంచున దేవనాగ్రి లిపిలో ‘భారత్’ అలాగే కుడి అంచున ఆంగ్లంలో ‘ఇండియా’ అనే పదం ఉంటుంది.
ఈ నాణెం సాధారణ చలామణిలో ఉంటుందా అనేది తెలుసుకుందాం.. ఇవి సాధారణ చెలామణీ కోసం తీసుకువచ్చిన నాణేలు కావు. వీటిని స్మారక నాణేలు అని పిలుస్తారు, వీటిని లావాదేవీలకు ఉపయోగించలేమని ఆర్థిక మంత్రిత్వ శాఖ అధికారి తెలిపారు. స్మారక నాణేలు సాధారణంగా ముఖ్యమైన సంఘటనల జ్ఞాపకార్థం విడుదల చేస్తారు. అవి ప్రాతినిధ్యం వహించే సందర్భాన్ని ప్రతిబింబించే ప్రత్యేక డిజైన్‌లను ప్రదర్శిస్తాయి. ఈ నాణేలు నాణేల సేకరణకు గొప్ప విలువను కలిగి ఉంటాయి. నాణేలు సేకరించే హాబీ ఉన్నవారికి ఇవి చాలా విలువైనవిగా ఉంటాయి. 1964 నుంచి ఇలా ప్రత్యేక నాణేలు విడుదల చేస్తూ వస్తున్నారు. ఇప్పటివరకూ దాదాపు 150 కంటే ఎక్కువ నాణేలు విడుదల చేశారు.
వీటిని ఎవరు.. ఎలా కొనుక్కోవచ్చు అనే అంశాన్ని పరిశీలిద్దాం.. ఎవరైనా ప్రభుత్వ వెబ్‌సైట్ www.indiagovtmint.in నుంచి ఈ నాణేన్ని కొనుగోలు చేయవచ్చు. ముఖ్యంగా, ప్రభుత్వం రాసే సమయానికి ఇప్పటివరకు నాణెం ధరను లిస్ట్ చేయలేదు కానీ అది త్వరలో వెల్లడి అవుతుందని భావిస్తున్నారు. అయితే ఈ నాణెం తయారీకి వాడిన మెటీరీయల్ ధర కనీసం 13 వందల రూపాయలు ఉండవచ్చని జ్యుయలరీ నిపుణులు అంచనా వేస్తున్నారు. నాణెం తయారీ తరువాత అమ్మకానికి ఎంత ధర ఉంటుంది అనేది ప్రభుత్వం నిర్ణయించాల్సి ఉంటుంది.
రూ.75 నాణెం తయారీలో ఏ లోహాలను ఉపయోగిస్తారో తెలుసుకుందాం. నాణెం 44 మిమీ వ్యాసం కలిగి ఉంది. ఇది 50 శాతం వెండి, 40 శాతం రాగి, 5 శాతం నికెల్, 5 శాతం జింక్‌తో కూడిన క్వాటర్నరీ మిశ్రమంతో కూడి ఉంటుందని ఆర్థిక మంత్రిత్వ శాఖ గతంలో ఒక ప్రకటనలో తెలిపింది. ముఖ్యంగా, 35 గ్రాముల బరువున్న నాణెం దాని అంచుల వెంట 200 సెర్రేషన్‌లను కలిగి ఉంటుంది.
మరిన్ని బిజినెస్ వార్తల కోసం క్లిక్ చేయండి..
