పర్సనల్‌ లోన్‌ ఈజీగా రావాలంటే మన వద్ద ఏం ఉండాలి? ఎలాంటి డాక్యూమెంట్స్‌ అవసరం!

అత్యవసర ఖర్చులు, వైద్య అవసరాలు, విద్య, పెళ్లిళ్ల సమయంలో చాలా మంది పర్సనల్ లోన్లు తీసుకుంటూ ఉంటారు. తక్కువ డాక్యుమెంటేషన్‌తో వేగంగా రుణం లభించడం వల్ల చాలా మంది బ్యాంకులు, NBFCల వైపు మొగ్గు చూపుతున్నారు. అయితే పర్సనల్ లోన్ పొందేందుకు కొన్ని ముఖ్యమైన అర్హతలను తప్పనిసరిగా పాటించాల్సి ఉంటుందని ఆర్థిక నిపుణులు చెబుతున్నారు. సాధారణంగా పర్సనల్ లోన్ కోసం దరఖాస్తు చేసే వ్యక్తి వయస్సు కనీసం 21 సంవత్సరాలు ఉండాలి. ఎక్కువ బ్యాంకులు గరిష్ట వయస్సును 58 నుంచి 60 సంవత్సరాల మధ్య నిర్ణయిస్తున్నాయి. ఉద్యోగులు, స్వయం ఉపాధి పొందేవారు ఇద్దరూ లోన్‌కు అర్హులే అయినప్పటికీ, స్థిరమైన ఆదాయం ఉండటం అత్యంత కీలకంగా పరిగణించబడుతోంది.

నెలవారీ ఆదాయం కూడా ముఖ్యమైన ప్రమాణం. చాలా బ్యాంకులు కనీసంగా నెలకు రూ.15 వేల నుంచి రూ.25 వేల వరకు ఆదాయం ఉండాలని కోరుతున్నాయి. మెట్రో నగరాల్లో ఈ పరిమితి ఇంకా ఎక్కువగా ఉండొచ్చు. ఉద్యోగులు కనీసం 6 నెలల నుంచి ఒక సంవత్సరం వరకు ప్రస్తుత సంస్థలో పనిచేసి ఉండాలని, స్వయం ఉపాధి పొందేవారికి కనీస వ్యాపార అనుభవం ఉండాలని బ్యాంకులు పరిశీలిస్తాయి. అత్యంత ముఖ్యమైన అంశం క్రెడిట్ స్కోర్‌. సాధారణంగా 750 లేదా అంతకంటే ఎక్కువ CIBIL Score ఉన్నవారికి లోన్ ఆమోదం సులభంగా లభించే అవకాశాలు ఎక్కువగా ఉంటాయి.

గతంలో EMIలు ఆలస్యం చేయడం, క్రెడిట్ కార్డు బకాయిలు పెరగడం వంటి అంశాలు లోన్ అవకాశాలను ప్రభావితం చేయవచ్చు. దరఖాస్తు సమయంలో ఆధార్‌, PAN కార్డు, బ్యాంక్ స్టేట్‌మెంట్లు, జీత స్లిప్‌లు లేదా ఆదాయ పన్ను రిటర్నులు వంటి పత్రాలు సమర్పించాల్సి ఉంటుంది. ప్రస్తుతం HDFC Bank, ICICI Bank, Bajaj Finserv వంటి సంస్థలు పూర్తిగా డిజిటల్ విధానంలో కూడా పర్సనల్ లోన్లు అందిస్తున్నాయి. ఆర్థిక నిపుణుల హెచ్చరిక ఏమిటంటే, అవసరానికి మించిన లోన్లు తీసుకోవడం భవిష్యత్తులో EMI భారం పెంచే ప్రమాదం ఉంది. అందువల్ల ఆదాయం, చెల్లించే సామర్థ్యాన్ని అంచనా వేసుకుని మాత్రమే పర్సనల్ లోన్ తీసుకోవాలని సూచిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి