Part Time Job Scam: ఉద్యోగం పేరుతో కేటుగాళ్ల నయా స్కెచ్.. రూ.57 లక్షలు హాంఫట్..!

ఎలక్ట్రికల్ పోల్స్ పరిశ్రమకు చెందిన 27 ఏళ్ల యువకుడిని పార్ట్ టైమ్ జాబ్ పేరుతో కేటుగాళ్లు రూ.57.75 లక్షల మేర మోసం చేశారు. పని తక్కువ రాబడి ఎక్కువ పేరుతో ఓ వ్యక్తి మాయమాటలు చెప్పడంతో బాధితుడు పెద్ద మొత్తంలో డబ్బును బదిలీ చేశఆడు అయితే ఈ కేసులో ప్రమేయం ఉన్నందుకు ఐపీసీ, ఐటీ చట్టంలోని వివిధ సెక్షన్ల కింద 14 మందిపై సైబర్ క్రైమ్ పోలీసులు ఎఫ్ఐఆర్ నమోదు చేశారు. ఆగస్టు 16న బాధితుడికి అనసూయ అనే మహిళ నుంచి టెలిగ్రామ్ ద్వారా మెసేజ్ వచ్చింది. ప్రతి రోజూ కేవలం మూడు గంటలు ఆన్‌లైన్ ద్వారా పని చేస్తే  రోజుకు రూ. 4,650 సంపాదించవచ్చని ఆ మెసేజ్‌లో ఉంది. అలాగే ఓ రెండు రోజుల తర్వాత అభినయ అనే మరో మహిళ, ‘మ్యాంగో ఫ్యాషన్’ అనే కంపెనీతో తనకు సంబంధం ఉందని పేర్కొంటూ అతన్ని సంప్రదించింది. 

ఈ కంపెనీ ప్లాట్‌ఫారమ్‌లో నమోదు చేసుకోవాలని ఆమె సూచించింది. నమోదు చేసుకున్న అనంతరం అక్కడ అతని డిజిటల్ వాలెట్‌కు రూ. 10,000 బోనస్ జమ అయ్యింది. బాధితుడు వేగంగా టాస్క్‌లను పూర్తి చేయడం కొనసాగించడంతో అతని వాలెట్ బ్యాలెన్స్ పెరిగింది. దీంతో ఆ ప్లాట్ ఫారమ్ నమ్మకమైందని అనుకున్నాడు. భారీ వ్యాలెట్ బ్యాలెన్స్‌తో ఉన్న బాధితుడి ఫ్రేమ్‌లోకి మళ్ల అభినయ వచ్చింది. మ్యాంగో ఫ్యాషన్‌లో పెట్టుబడి పెడితే ఇంకా ఎక్కువ లాభాలు వస్తాయని చెప్పింది. అలాగే దఫదఫాలుగా బాధితుడు స్కామర్లు అందించిన 11 వేర్వేరు బ్యాంకు ఖాతాలకు మొత్తం రూ.58.06 లక్షలను బదిలీ చేశాడు. అతని డిజిటల్ వాలెట్ లాభాలతో సహా రూ. 76 లక్షలు చూపించింది. కానీ అతను నిధులను ఉపసంహరించుకోవడానికి ప్రయత్నించినప్పుడు అతను రెండు చిన్న లావాదేవీలలో రూ. 30,858 మాత్రమే తిరిగి పొందాడు. 

పెద్ద మొత్తాలను ఉపసంహరించుకోవడానికి పదేపదే చేసిన ప్రయత్నాలు విఫలమవడంతో అతను మోసపోయానని గ్రహించాడు. ఆగస్ట్ 29న, అతను సైబర్ క్రైమ్ హెల్ప్‌లైన్‌కు చేరుకుని ఫిర్యాదు చేశాడు. అనంతరం పోలీసులు విచారణ తర్వాత బాధితుడిని మోసం చేసిన 14 మందిపై డిసెంబర్ 24న ఎఫ్ఐఆర్ నమోదు చేశారు. ఈ కేసు అనేది చదువుకున్న వ్యక్తులు ఈజీ ఎలా మోసపోతున్నారో? తెలుసుకోవచ్చని నిపుణులు చెబుతున్నారు. ముఖ్యంగా జాబ్ ఆఫర్ పేరుతో పెట్టుబడుల మార్గం వైపు తీసుకెళ్లే ఏ కంపెనీను నమ్మవద్దని చెబుతున్నారు. ఒకవేళ నమ్మాల్సి వస్తే కచ్చితంగా ఒకటికి రెండు సార్లు ధ్రువీకరించుకోవాలని పేర్కొంటున్నారు. ముఖ్యంగా నిజంగా ఉద్యోగాలు ఇచ్చే ఎలాంటి కంపెనీలు డబ్బు అడగవని, ఇలాంటి మోసాలకు గురైతే కచ్చితంగా ఎలాంటి భయం లేకుండా పోలీసులను ఆశ్రయించాలని చెబుతున్నారు. 

మరిన్ని బిజినెస్ వార్తల కోసం ఇక్కడ క్లిక్ చేయండి