కంపెనీల మాయాజాలం.. పేరుకు రూ.18 లక్షల ప్యాకేజీ.. చేతికి ఇచ్చేది కేవలం రూ.6 లక్షలు! అది ఎలాగంటే..?
ఐటీ రంగంలో అధిక CTC ప్యాకేజీలు యువతను ఆకర్షిస్తున్నప్పటికీ, ఆఫర్ లెటర్లోని లక్షలు మీ బ్యాంకు ఖాతాకు చేరవు. పనితీరు బోనస్లు, ESOPలు వంటి షరతులతో కూడిన భాగాలు మొత్తం ప్యాకేజీని పెంచుతాయి, కానీ వాస్తవ స్థిర జీతం చాలా తక్కువగా ఉంటుంది.
Updated on: Jan 31, 2026 | 9:35 PM
ఈ మధ్యకాలంలో ఐటీ రంగంలో భారీ ప్యాకేజీతో పలు కంపెనీలు యువతను హైర్ చేసుకుంటున్నాయి. ఆ నంబర్లు చూస్తుంటే.. మతి పోతుంది. ఏకంగా రూ.12 లక్షలు, రూ.15 లక్షలు, రూ.18 లక్షల ప్యాకేజీ అంటూ ఊదరగొడుతున్నాయి. కానీ వీటి వెనుక ఓ మాయాజాలం ఉంది. ఆఫర్ లెటర్పై ముద్రించిన లక్షలు తరచుగా ఆకర్షణీయంగా ఉంటాయి, కానీ పూర్తి మొత్తం వాస్తవానికి వారి బ్యాంక్ ఖాతాకు చేరుతుందా? అంటే చేరదు. ఇటీవల ఒక స్టార్టప్ వ్యవస్థాపకుడు లింక్డ్ఇన్లో కఠినమైన వాస్తవాన్ని వెల్లడించాడు. కంపెనీలు అధిక CTC చూపించి అభ్యర్థులను ఎలా ఆకర్షిస్తాయి, వాస్తవ జీతం ఎలా ఉంటుందో వివరించాడు.
రూ.18 లక్షల ఆఫర్ గురించి షాకింగ్ నిజం
బ్లాక్స్ బ్లాక్ వ్యవస్థాపకుడు సాహిల్ ఠాకూర్ ఇటీవల సోషల్ మీడియాలో ఒక సంఘటనను పంచుకున్నారు. ఇది కార్పొరేట్ ప్రపంచంలో జీతాల నిర్మాణాల గురించి కొత్త చర్చకు దారితీసింది. తన విద్యార్థులలో ఒకరి కథను ఆయన వివరించారు, వారికి స్టార్టప్ నుండి సంవత్సరానికి రూ.18 లక్షల (LPA) ఉద్యోగ ఆఫర్ లభించింది. ఈ సంఖ్య ఒక కొత్త విద్యార్థికి ఆకట్టుకునేలా అనిపించవచ్చు.
సాహిల్ ఠాకూర్ ఈ ఆఫర్ను లోతుగా పరిశీలించినప్పుడు, ఈ 18 లక్షల రూపాయల ప్యాకేజీ వాస్తవానికి పలు షరతులతో కూడి ఉంటుంది. ఆఫర్ వివరణాత్మక విశ్లేషణలో ఉద్యోగి స్థిర మూల జీతం సంవత్సరానికి రూ.6 లక్షలు మాత్రమే అని తేలింది. దీని అర్థం నెలకు రూ.50,000 మాత్రమే అతని ఖాతాలో జమ అవుతాయి. మిగిలిన రూ.12 లక్షలు వేరే ఖర్చుల్లో కంపెనీ ఖాతాలోనే ఉండిపోతాయి.
పనితీరు బోనస్ల భ్రమ
కంపెనీలు జీతం పెంచడానికి వివిధ లొసుగులను ఎలా జోడించాయో వివరించారు. రూ.18 లక్షల్లో రూ.4 లక్షలు “పనితీరు బోనస్” గా కేటాయిస్తారు. ఉద్యోగి తమ లక్ష్యంలో 120 శాతం సాధించినట్లయితే మాత్రమే ఈ బోనస్ చెల్లిస్తారు. వాస్తవమేమిటంటే ఈ లక్ష్యాలను నిర్వాహకులు నిర్దేశిస్తారు. అవి చాలా కష్టంగా ఉంటాయి.
షేర్లు
జీతం ప్యాకేజీని గణనీయంగా పెంచడానికి రూ.5 లక్షల విలువైన ESOP లు (ఉద్యోగుల స్టాక్ ఎంపికలు) కూడా యాడ్ చేస్తారు. ఇవి కంపెనీ షేర్లు వీటి విలువ కంపెనీ ప్రస్తుత వాల్యుయేషన్ ఆధారంగా ఉంటుంది. ఉద్యోగి ఈ షేర్లను నాలుగు సంవత్సరాల కాలంలో వాయిదాలలో అందుకుంటారు. అతిపెద్ద ప్రమాదం ఏమిటంటే కంపెనీ స్టాక్ ఎక్స్ఛేంజ్ (IPO)లో జాబితా చేయబడితే లేదా పెద్ద కంపెనీ కొనుగోలు చేస్తేనే ఈ షేర్లు అర్థవంతంగా మారతాయి. అలా జరగకపోతే ఆ రూ.5 లక్షల విలువ సున్నాగా మారవచ్చు.
మరిన్ని బిజినెస్ వార్తల కోసం ఇక్కడ క్లిక్ చేయండి
