EPF: మీకు ఒకటి కంటే ఎక్కువ పీఎఫ్ ఎకౌంట్స్ ఉన్నాయా? అయితే, వాటిని విలీనం చేయడం తప్పనిసరి.. ఎలాగంటే..

EPF: ఉద్యోగం మారడం అనేది సహజంగా జరుగుతూ ఉంటుంది. అయితే, ఉద్యోగం మారినపుడు కొన్ని ప్రక్రియలను తప్పనిసరిగా పూర్తి చేసుకోవాల్సి ఉంటుంది. ముఖ్యంగా ప్రభుత్వ పథకాలకు సమంధించిన విషయాలలో చాలా జాగ్రత్తగా ఉండాల్సి ఉంటుంది. వీటిలో మరింత ముఖ్యమైనది ప్రావిడెంట్ ఫండ్ కు సంబంధించిన విషయం. ఉద్యోగం మారినపుడు పీఎఫ్ ఖాతా కూడా కొత్తది రావడం జరుగుతూ ఉంటుంది. అయితే, ఒకటి కంటే ఎక్కువ పీఎఫ్ ఖాతాలు ఉన్నపుడు వాటిని విలీనం చేసుకోవడం అవసరం. ఒకటి కంటే ఎక్కువసార్లు ఉద్యోగం మారిన వ్యక్తుల ప్రావిడెంట్ ఫండ్ ఖాతాలను పాత యజమానుల నుంచి కొత్త దానితో విలీనం చేయడం చాలా ముఖ్యం. ఈపీఎఫ్ డబ్బు విత్‌డ్రా చేసుకున్నపుడు విధించే టాక్స్‌కు సంబంధించి సమస్యలు తలెత్తకుండా ఉండాలంటే అన్ని ఈపీఎఫ్ ఖాతాలు విలీనం అయి ఉండాల్సిన అవసరం ఉంది.

ఈ విషయంపై నిపుణులు ఇలా చెబుతున్నారు. “నిరంతర సేవా కాలంగా పరిగణించబడే ఉపాధిలో అంతరం లేదని నిర్ధారించడానికి మునుపటి యజమానుల నుండి అన్ని EPF ఖాతాలను ప్రస్తుతానికి విలీనం చేయడం ముఖ్యం. ఐదు సంవత్సరాల తరువాత ఈపీఎఫ్ ఖాతా నుంచి ఉపసంహరించుకునే సొమ్ము పన్నుల నుంచి మినహాయింపు పొందింది. అందువల్ల పీఎఫ్ అన్ని ఖాతాలను ఒకదాగ్గరగా ఉంచడం అవసరం. పాత యజమాని వద్ద నుంచి పీఎఫ్ ఖాతాను కొత్త ఖాతాతో విలీనం చేయకపోతే, ఈ ప్రయోజనం లభించదు.” యూనివర్సల్ అకౌంట్ నంబర్ లేదా యూఏఎన్ (UAN) ఉపయోగించి ఎవరైనా వారి వివిధ ఈపీఎఫ్ (EPF) ఖాతాలను విలీనం చేయవచ్చు . యూఏఎన్ (UAN) ఖాతాలోని అన్ని ఈపీఎఫ్ ఖాతాలను లింక్ చేసుకోవడానికి అనుమతిస్తుంది. మీరు పని చేసిన వివిధ సంస్థలు తెరిచిన బహుళ EPF ఖాతాలను ట్రాక్ చేయడానికి UAN మీకు సహాయపడుతుంది.

కొత్త సంస్థలో ప్రావిడెంట్ ఫండ్ ఖాతా ప్రారంభించడం కోసం ఈపీఎఫ్ సభ్యుడు తన యూఏఎన్ (UAN) ని కొత్త యజమానికి ఇవ్వవచ్చు. కొత్త ఖాతా తెరిచిన తర్వాత, మునుపటి యజమాని ఈపీఎఫ్ ఖాతా నుండి డబ్బు కొత్తదానికి బదిలీ చేయబడుతుంది. అయితే, కొత్త సంస్థ ద్వారా కొత్త యూఏఎన్ (UAN) ఏర్పాటు చేసి ఉన్నట్టయితే, మీరు మీ యూఏఎన్ (UAN) లన్నింటినీ ఒక యూఏఎన్ లో విలీనం చేయాల్సి ఉంటుంది. ఒక ఉద్యోగికి బహుళ యూఏఎన్లు ఉంటే, తాజాది కొత్త సంస్థతో లింక్ చేయబడాలి. పీఎఫ్ బ్యాలెన్స్‌లు, యూఏఎన్ (UAN)ల నుండి తాజా వాటికి బదిలీ చేయబడాలి అని నిపుణులు స్పష్టం చేస్తున్నారు.

రెండు లేదా అంతకంటే ఎక్కువ ఈపీఎఫ్ ఖాతాలను ఆన్‌లైన్ లో విలీనం చేయడానికి మీ యూఏఎన్ తప్పనిసరిగా మెంబర్ సేవా పోర్టల్‌లో యాక్టివేట్ చేయాలి . యూఏఎన్ (UAN)ని ఎలా యాక్టివేట్ చేయాలో తెలుసుకోవడానికి ఇక్కడ క్లిక్ చేయండి .

రెండు లేదా అంతకంటే ఎక్కువ EPF ఖాతాలను ఆన్‌లైన్‌లో విలీనం చేసుకోవడం ఇలా..

1: మెంబర్ సేవా పోర్టల్‌ను సందర్శించండి లేదా ఇక్కడ క్లిక్ చేయండి.

2: ‘ఆన్‌లైన్ సర్వీసెస్’ ట్యాబ్ కింద ‘వన్ మెంబర్ – వన్ ఇపిఎఫ్ అకౌంట్ (ట్రాన్స్‌ఫర్ రిక్వెస్ట్)’ ఎంచుకోండి.

3: తెరపై, మీ వ్యక్తిగత వివరాలు కనిపిస్తాయి. ఇది మీ ప్రస్తుత యజమాని వద్ద ఉన్న ఈపీఎఫ్ ఖాతా వివరాలను కూడా చూపుతుంది.

4:పాత/మునుపటి ఖాతాను బదిలీ చేయడానికి.. మీరు మునుపటి యజమాని లేదా ప్రస్తుత యజమాని ద్వారా ధృవీకరించబడాలి. బదిలీ అభ్యర్థనను వేగంగా ప్రాసెస్ చేయడానికి ఒక ఉద్యోగి ప్రస్తుత యజమాని ద్వారా ధృవీకరణను ఎంచుకోవచ్చు. పాత మెంబర్ ఐడిని నమోదు చేయండి, అనగా, మునుపటి PF ఖాతా నంబర్ లేదా మునుపటి UAN. ‘వివరాలను పొందండి’ పై క్లిక్ చేయండి. అప్పుడు స్క్రీన్ మీ మునుపటి EPF ఖాతాలకు సంబంధించిన వివరాలను చూపుతుంది.

5: ‘OTP పొందండి’ పై క్లిక్ చేయండి. మీ రిజిస్టర్డ్ మొబైల్ నంబర్‌కు వన్-టైమ్ పాస్‌వర్డ్ వస్తుంది. OTP ని నమోదు చేసి సబ్మిట్ మీద క్లిక్ చేయండి.

దీని తరువాత, EPF ఖాతా విలీనాల కోసం మీ అభ్యర్థన విజయవంతంగా ఫైల్ అవుతుంది. మీ ప్రస్తుత యజమాని మీరు సమర్పించిన విలీన అభ్యర్థనను ఆమోదించాల్సి ఉంటుంది. మీ యజమాని దానిని ఆమోదించిన తర్వాత, EPFO ​అధికారులు మీ మునుపటి EPF ఖాతాలను ప్రస్తుతంతో ప్రాసెస్ చేసి విలీనం చేస్తారు. విలీన స్థితి గురించి తెలుసుకోవడానికి పోర్టల్‌లో మళ్లీ తనిఖీ చేసుకోవాల్సి ఉంటుంది.

ఆన్‌లైన్ అభ్యర్థనను సమర్పించడానికి మీ పాత EPF ఖాతాలు తప్పనిసరిగా KYC కి అనుగుణంగా ఉండాలని గుర్తుంచుకోండి. మీరు ఒకటి కంటే ఎక్కువ పాత EPF ఖాతాను కలిగి ఉంటే, అప్పుడు అన్ని పాత EPF ఖాతాల కోసం విలీన అభ్యర్థన విడిగా సమర్పించాల్సి ఉంటుంది.

Aslo read:

AP Crime News: ఆంధ్రప్రదేశ్‌లో వరుస దారుణాలు.. ఫేస్‌బుక్ లైవ్ ఆన్ చేసి అతను.. భర్త వేధింపులకు ఆమె బలి..

Telangana Weather Report: తెలంగాణలో నేడు, రేపు భారీ వర్షాలు.. అలర్ట్ అయిన అధికారయంత్రాంగం..

Viral Video: అందరినీ హడలెత్తించిన లేడీ దెయ్యం.. అతను ఇచ్చిన ట్విస్ట్‌కు బిత్తరపోయింది.. వీడియో చూస్తే పగలబడి నవ్వుతారు..