E Rupee Vouchers: డిజిటల్ ఇండియాలో కీలక ముందడుగు.. ఈ-రూపీ వోచర్లపై ఆర్బీఐ ప్రత్యేక దృష్టి
ముఖ్యంగా ఆర్బీఐ గవర్నర్ ఈ-రూపీ వోచర్ విస్తృత పరిధిని పెంచడానికి కృషి చేస్తున్నట్లు ప్రకటించారు. ఈ-రూపీ వోచర్ల జారీలో నాన్-బ్యాంకింగ్ కంపెనీలను భాగస్వామ్యం చేయడానికి అనుమతిస్తున్నట్లు పేర్కొన్నారు. గతంలో కేవలం బ్యాంకులు మాత్రమే ఈ-రూపీ వోచర్ల జారీ చేసే అవకాశం ఉండేది.
Updated on: Jun 11, 2023 | 7:00 PM
భారతదేశంలో డిజిటల్ పేమెంట్ల శాతాన్ని పెంచేందుకు ఆర్బీఐ ఎప్పటికప్పుడు చర్యలు తీసుకుంటుంది. అయితే ఇటీవల రిజర్వ్ బ్యాంక్ ఆఫ్ ఇండియా మానిటరీ పాలసీ కమిటీ సమావేశం అనంతరం ఆర్బీఐ గవర్నర్ శక్తికాంత దాస్ రెపో రేటుకు సంబంధించి గమనార్హమైన ప్రకటన చేశారు. ముఖ్యంగా ఆర్బీఐ గవర్నర్ ఈ-రూపీ వోచర్ విస్తృత పరిధిని పెంచడానికి కృషి చేస్తున్నట్లు ప్రకటించారు. ఈ-రూపీ వోచర్ల జారీలో నాన్-బ్యాంకింగ్ కంపెనీలను భాగస్వామ్యం చేయడానికి అనుమతిస్తున్నట్లు పేర్కొన్నారు. గతంలో కేవలం బ్యాంకులు మాత్రమే ఈ-రూపీ వోచర్ల జారీ చేసే అవకాశం ఉండేది. కానీ ప్రస్తుతం ఈ-రూపీ వోచర్ల జారీని నాన్-బ్యాంకింగ్ సంస్థలకు కూడా అప్పగించడాన్ని చూస్తే ఆర్బీఐ మరో సంచలన నిర్ణయం తీసుకుందని మార్కెట్ నిపుణులు పేర్కొంటున్నారు. అసలు ఈ-రూపీ వోచర్లు అంటే ఏంటి? వాటి వల్ల ఉపయోగాలు ఏంటో? ఓసారి తెలుసుకుందాం.
ఈ-రూపీ వోచర్ను ఆగస్టు 2021లో ప్రారంచారు. ఇది నేషనల్ పేమెంట్స్ కార్పొరేషన్ ఆఫ్ ఇండియా (ఎన్పీసీఐ) పర్యవేక్షిస్తున్న యూనిఫైడ్ పేమెంట్స్ ఇంటర్ఫేస్ (యూపీఐ) సిస్టమ్ ఫ్రేమ్వర్క్లో పని చేస్తుంది. ప్రారంభంలో పరిమిత స్థాయిలో ఉన్నప్పటికీ కేంద్ర, రాష్ట్ర ప్రభుత్వాల తరఫున బ్యాంకులు మాత్రమే ఈ వోచర్ను జారీ చేసేవి. నగదు రహిత, కాంటాక్ట్లెస్ డిజిటల్ చెల్లింపు పద్ధతిగా పనిచేస్తూ ప్రభుత్వం తన సంక్షేమ పథకాలను సులభతరం చేయడానికి ఈ విధానాన్ని ఉపయోగించుకుంది. విశేషమేమిటంటే ఈ-రూపీ ఒకే క్యూఆర్ కోడ్ని స్కాన్ చేయడం ద్వారా వ్యక్తుల ఖాతాల్లోకి వేగంగా, అప్రయత్నంగా నగదు బదిలీని అనుమతిస్తుంది, మధ్యవర్తుల అవసరాన్ని కూడా తొలగిస్తుంది.
నెట్ బ్యాంకింగ్, ఐఎంపీఎస్ వంటి చెల్లింపు ఎంపికలను ఉపయోగించడం ద్వారా ఈ-రూపీ వోచర్ క్యూఆర్ కోడ్ల ద్వారా ఖాతాల మధ్య డబ్బు బదిలీలను సులభతరం చేస్తుంది. ఇది ప్రభావవంతంగా ప్రీపెయిడ్ వోచర్గా పనిచేస్తుంది. ఎస్బీఐ, యాక్సిస్ బ్యాంక్, బ్యాంక్ ఆఫ్ బరోడా, ఐసీఐసీఐ బ్యాంక్, హెచ్డిఎఫ్సి బ్యాంక్ వంటి అనేక బ్యాంకులు ఇప్పటికే ఈ సేవను అందించినప్పటికీ, ఆర్బీఐ ఇప్పుడు దాని పరిధిని విస్తృతం చేయాలని నిర్ణయించుకుంది. ఈ విస్తరణ ప్రధానంగా సంప్రదాయ మనీ ట్రాన్స్ఫర్ లేదా బ్యాంకింగ్ సేవలతో సంబంధం లేని వ్యక్తులకు ప్రయోజనం చేకూర్చడం లక్ష్యంగా పెట్టుకుంది.
మరిన్ని పర్సనల్ ఫైనాన్స్ వార్తల కోసం ఈ లింక్ క్లిక్ చేయండి..
