Andhra News: భర్త దాడిలో డ్యాన్సర్ మృతి.. శిక్ష వద్దంటున్న కుటుంబ సభ్యులు.. అసలు కారణం తెలిస్తే..

భర్త దాడి చేశాడు.. భార్య తల పోల్‌కు తగిలి గాయాలపాలై ప్రాణాలు కోల్పోయింది. ప్రేమించి పెళ్లి చేసుకున్న కుటుంబంలో తీవ్ర విషాదాన్ని నింపింది. అయితే.. ఎక్కడైనా భర్త దాడిలో భార్య ప్రాణాలు కోల్పోతే కఠినంగా శిక్షించాలని డిమాండ్ చేస్తారు.. కానీ ఇక్కడ మాత్రం స్టోరీ డిఫరెంట్. భర్తకు పడే శిక్ష తగ్గించి న్యాయం చేయాలని కోరుతున్నారు కుటుంబ సభ్యులు, సహచరులు.. విశాఖలో జరిగిన ఈ ఘటన అందర్నీ ఆలోచింపజేస్తోంది. విశాఖలో ఇద్దరు డాన్సర్లు.. బంగారు రాజు, రమాదేవి..! ఇద్దరూ స్టేజ్ షోలు చేస్తుంటారు.. ప్రేమించుకున్నారు.. పెళ్లి కూడా చేసుకున్నారు.. అన్యోన్య దాంపత్యం వారిది. వాళ్లకు ముద్దులొలికే ఇద్దరు పిల్లలు. కానీ మనస్పర్ధలతో క్షణికావేశం ఆ దాంపత్య జీవితంలో తీవ్ర విషాదాన్ని నింపింది. క్షణికావేషంలో భర్త దాడి చేయడంతో.. తల పక్కనే ఉన్న పోల్కు తగిలి భార్య ఆసుపత్రిపాలైంది. చివరకు ప్రాణాలు కోల్పోయింది.

మాధవదారకు చెందిన అలమండ బంగార్రాజు, అల్లిపురానికి చెందిన రమాదేవి డాన్సర్లు. గత ఏడేళ్లుగా అదే వృత్తిలో కొనసాగుతున్నారు. డ్యాన్సర్ వృత్తి వారి జీవనాధారం. ఇద్దరూ ప్రేమించుకొని ఐదేళ్ల క్రితం వివాహం చేసుకున్నారు. మాధవధారలో కాపురం పెట్టారు. వీరికి ఇద్దరు పిల్లలు. అన్యోన్యంగా ఉండే జీవితంలో కాస్త మనస్పర్ధలు ఏర్పడ్డాయి. దీంతో రమాదేవి పుట్టింటికి వెళ్ళిపోయింది. మార్చి 30 న బంగారు రాజు అక్కడికి వెళ్లి తనతో పాటు రమ్మన్నాడు. ఇద్దరి మధ్య వాగ్వాదం జరిగింది. పోలీసులకు ఫిర్యాదు చేస్తానని రమాదేవి బయలుదేరింది. ఆమెను అడ్డగించే క్రమంలో భర్తతో వాగ్వాదం చోటు చేసుకుంది. కోపంతో రమాదేవి ముఖంపై కొట్టాడు బంగార్రాజు. కిందపడిన రమాదేవి పక్కనే ఉన్న పోల్‌కు తల తగిలింది. హుటా హుటిన ఆమెను ఆసుపత్రికి తరలించారు. అక్కడ రెండు రోజులపాటు చికిత్స పొందుతూ ప్రాణాలు కోల్పోయింది రమాదేవి.

మృతదేహాన్ని పోస్టుమార్టం కోసం మార్చురికి తరలించారు. అక్కడికి కుటుంబ సభ్యులు, రమాదేవి సహచరులు, డ్యాన్సర్లు భారీగా చేరుకున్నారు. ఎక్కడైనా భర్త దాడిలో భార్య ప్రాణాలు కోల్పోతే నిందితుడిని కఠినంగా శిక్షించాలని డిమాండ్ చేస్తారు. కానీ ఇక్కడ మాత్రం.. భర్త బంగారు రాజుకు శిక్ష తగ్గించాలని వేడుకుంటున్నారు కుటుంబ సభ్యులు సహచరులు. ఎందుకంటే ఇద్దరూ అన్యోన్య దాంపత్యంలో.. క్షణికావేశంలో ఘటన జరిగిందే తప్ప.. కావాలని బంగార్రాజు రమాదేవి ప్రాణాలు తీయలేదని అంటున్నారు. అంతేకాదు.. తల్లి రమాదేవి ప్రాణాలు కోల్పోయింది, ఇప్పుడు భర్త బంగార్రాజుకు శిక్ష పడితే మరి ఇద్దరు పిల్లల పరిస్థితి ఏంటి అనేది వాళ్ళ ఆవేదన. ఆర్థికంగా అంతా కలిసి పిల్లలను ఆదుకుంటాం. కానీ తల్లి లేని లోటు తండ్రి దూరమైన ఆప్యాయత ఎలా తీర్చగలమని ఆవేదన చెందుతున్నారు. ఫిర్యాదు కూడా ఇచ్చేందుకు ముందుకు రావడం లేదు.

దీంతో ఈ కేసులో ఏం చేయాలో తెలియక పోలీసులు సంశయంలో పడ్డారు. చట్టం ప్రకారం కేసు నమోదు చేసి పోలీసులు ముందుకు వెళ్లాల్సి ఉంటుంది. మృతదేహాన్ని పోస్టుమార్టం నిర్వహించిన పోలీసులు బంధువులకు అప్పగించారు. ఈ కేసులో నిందితుడైన రమాదేవి భర్త బంగార్రాజును అదుపులోకి తీసుకున్నారు పోలీసులు. మా పని మేం చేస్తాం.. కోర్టులో తేల్చుకోవాలని అంటున్నారు పోలీసులు.. దీంతో ఈ కేసు చర్చనీయాంశంగా మారింది.