INS Sandhayak : దేశీయంగా రూపకల్పన చేసి నిర్మించిన మొట్టమొదటి “ఐఎన్ఎస్ సంధాయక్” నిష్క్రమించే వేళ.. 40 ఏళ్ల ప్రస్థానానికి ఇక వీడ్కోలు
దేశీయంగా రూపకల్పన చేసి నిర్మించిన మొట్టమొదటి నౌక సంధాయక్. ఈ నౌకకు ఇవాళ్టితో (జూన్ 04 శుక్రవారం) శాశ్వతంగా విరామం..
“ఐఎన్ఎస్ సంధాయక్”. 40 సంవత్సరాల పాటు భారతమాతకు సేవలందించిన భారతీయ నావికా దళానికి చెందిన హైడ్రోగ్రాఫిక్ సర్వే షిప్‌. దేశీయంగా రూపకల్పన చేసి నిర్మించిన మొట్టమొదటి నౌక సంధాయక్. ఈ నౌకకు ఇవాళ్టితో (జూన్ 04 శుక్రవారం) శాశ్వతంగా విరామం ఇవ్వనున్నారు. ఐఎన్ఎస్ సంధాయక్ డీకమిషన్ కార్యక్రమం నావల్ డాక్యార్డ్ విశాఖపట్నంలో ఈ సాయంత్రం సమయంలో జరుగుతుంది. కొవిడ్ ప్రోటోకాల్స్ పాటిస్తూ స్టేషన్ అధికారులు.. ఇంకా నావికులు మాత్రమే హాజరై నిరాడంబరంగా ఈ కార్యక్రమం నిర్వహించనున్నారు. ఐఎన్ఎస్ సంధాయక్ సేవలిక ముగిసాయనడానికి ప్రతీకగా శుక్రవారం సూర్యాస్తమయంలో ఆ నౌక వేదికగా నావల్ జెండా, కమిషనింగ్ పతాకాన్ని చివరిసారి అవనతం చేస్తారు. ఈఎన్ సి ఫ్లాగ్ ఆఫీసర్ కమాండింగ్-ఇన్-చీఫ్ వైస్ అడ్మిరల్ అజేంద్ర బహదూర్ సింగ్, ఎవిఎస్ఎమ్, విఎస్ఎమ్ సమక్షంలో ఈ వీడ్కోలు కార్యక్రమం జరుగుతుంది. తన అద్భుతమైన 40 సంవత్సరాల ప్రస్థానంలో సంధాయక్ నౌకకు మొత్తంగా 22 మంది కమాండింగ్ అధికారులు మారారు. చివరి కమాండింగ్ ఆఫీసర్ 17 జూన్ 19 న నౌక బాధ్యతలు స్వీకరించారు.
భారత నావికాదళంలోని హైడ్రోగ్రాఫర్‌లు ఈ నౌక నుండే అనేక పాఠాలను నేర్చుకున్నారు. తద్వారా ద్వీపకల్ప జలాల పూర్తి హైడ్రోగ్రాఫిక్ కవరేజీకి ఈ నౌక పునాదులు వేసింది. అలాగే, విజయవంతమైన ఆ నౌక డిజైన్ భారత నావికాదళంలోని అన్ని సర్వే నౌకలకు ఇటీవలి వరకు వివిధ మార్పులు చేయడానికి మార్గం సుగమం చేసింది. ఈ నౌక దేశంలోని తూర్పు, పశ్చిమ తీరాలు, అండమాన్ సముద్ర జలాలు, పొరుగు దేశాలలో కూడా సుమారు 200 ప్రధాన హైడ్రోగ్రాఫిక్ సర్వేలు, అనేక చిన్న సర్వేలను చేపట్టింది. సర్వే మిషన్లు మాత్రమే కాకుండా, ఆపరేషన్ పవన్ – 1987 లో శ్రీలంకలో భారత శాంతి పరిరక్షక దళానికి సహాయం చేయడం, ఆపరేషన్ సరోంగ్, ఆపరేషన్ రెయిన్బో – 2004 లో సునామి తరువాత మానవతా సహాయం అందించడం.. తొలిసారిగా పాల్గొనడం వంటి అనేక ముఖ్యమైన కార్యకలాపాలలో ఈ నౌక చురుకుగా పాల్గొంది.
‘టైగర్-ట్రయంఫ్’ పేరుతో ఇండో-అమెరికా ఉమ్మడి నౌకా విన్యాసంలో కూడా ఈ నౌక పాల్గొంది. ‘సంధాయక్’ నౌక అప్పటి చీఫ్ హైడ్రోగ్రాఫర్ రియర్ అడ్మిరల్ ఎఫ్ఎల్ ఫ్రేజర్, ఎవిఎస్ఎమ్, పద్మశ్రీ నేతృత్వంలో రూపకల్పన జరిగింది. ఈ డిజైన్ ను నావల్ హెడ్ క్వార్టర్స్ రూపొందించగా ఓడ నిర్మాణం 1978 లో జిఆర్ఎస్ఇ కోల్‌కతా దగ్గర ప్రారంభమైంది. ఈ నౌకను 26 ఫిబ్రవరి 1981 న భారత నావికా దళంలోకి అప్పటి తూర్పు నావికా దళం (ఈఎన్సి) ఫ్లాగ్ ఆఫీసర్ కమాండింగ్-ఇన్-చీఫ్ అడ్మిరల్ ఎంకె రాయ్, ఎవిఎస్ఎమ్ ప్రవేశపెట్టారు.
Read also : Vijay Mallya Cries : ఎక్కడుంది చీటింగ్.. ! ఎందుకు పదేపదే మోసగాడంటారు..? లండన్ నుంచి గలమెత్తిన విజయ్ మాల్కా
