Andhra Pradesh: శివలింగంపై గోమాత పాదముద్ర.. ఈ అద్భుత ఆలయం ఎక్కడుందో తెలుసా..? వీడియో చూస్తే..

భారతదేశంలోని ప్రముఖ శైవ క్షేత్రాలలో ఒక్కో ఆలయానికి ఒక్కో విశిష్ట చరిత్ర, పురాణ గాథ ఉంటాయి. ముఖ్యంగా ఆయా ఆలయాల్లో కొలువై ఉన్న శివలింగాల ఆకృతి, వాటి వెనుక దాగి ఉన్న రహస్యాలు భక్తులను ఎంతగానో ఆకట్టుకుంటాయి. అలాంటి అరుదైన, అత్యంత విశిష్టమైన క్షేత్రం ఆంధ్రప్రదేశ్‌లోని కడప జిల్లాలో ఉంది. అదే ప్రసిద్ధ సంగమేశ్వర స్వామి దేవాలయం. ఇక్కడి శివలింగంపై సాక్షాత్తు గోమాత పాదముద్రతో పాటు కర్రతో కొట్టిన గుర్తు ఇప్పటికీ స్పష్టంగా కనిపించడం విశేషం. ప్రాచీన కాలంలో శాతవాహనులు, చోళ రాజుల హయాంలో ఈ ఆలయం ఎంతో అభివృద్ధి చెందింది. ఇక్కడి ప్రశాంత వాతావరణం, ఆలయ నిర్మాణ శైలి భక్తులకు ఆధ్యాత్మిక అనుభూతిని కలిగిస్తాయి. ఈ ఆలయంలోని శివలింగంపై గోమాత పాదముద్ర, కర్ర దెబ్బ గుర్తు ఉండటం వెనుక ఒక ఆసక్తికరమైన స్థలపురాణం ప్రచారంలో ఉంది. పూర్వకాలంలో ఒక గోవు ప్రతిరోజూ మందలో నుంచి పక్కకు వెళ్లి, అక్కడున్న ఒక చీమల పుట్టపై తన పొదుగు నుంచి పాలను ధారగా పోసేది. ఆ పుట్టలో స్వయంభువుగా వెలసిన శివలింగం ఉండటంతో ఆ గోమాత నిత్యం స్వామివారికి పాలాభిషేకం చేసేదని భక్తుల విశ్వాసం.

అయితే సాయంత్రం ఇంటికి వెళ్లేసరికి ఆ ఆవు పొదుగులో చుక్క పాలు కూడా లేకపోవడంతో గోవుల కాపరికి అనుమానం వచ్చింది. పాలు ఎక్కడికి పోతున్నాయో తెలుసుకోవాలని ఒకరోజు ఆ ఆవును రహస్యంగా వెంబడించాడు. అప్పుడు ఆ ఆవు ఒక చీమల పుట్టపై పాలు కార్చడాన్ని కాపరి చూశాడు. పుట్ట లోపల శివలింగం ఉన్న విషయం తెలియని ఆ కాపరి, ఆవు వృథాగా నేలపై పాలను కారుస్తోందని భావించి కోపంతో తన చేతిలోని కర్రతో దానిని కొట్టబోయాడు. ఆ దెబ్బ తప్పించుకునే క్రమంలో ఆ గోమాత తన కాలిని బలంగా వేయగా, దాని పాదముద్ర లోపల ఉన్న శివలింగంపై పడింది. అదే సమయంలో కాపరి విసిరిన కర్ర దెబ్బ కూడా నేరుగా ఆ శివలింగంపై తగిలింది. ఆనాడు పడిన గోమాత పాదముద్ర, కర్ర దెబ్బ మచ్చ నేటికీ ఆ శివలింగంపై చెక్కుచెదరకుండా అలాగే కనిపిస్తాయి.

బ్రహ్మ ముద్ర కూడా..

గోమాత పాదముద్ర, కర్ర గుర్తు మాత్రమే కాకుండా ఈ పవిత్ర శివలింగంపై సాక్షాత్తు బ్రహ్మ ముద్ర కూడా ఉందని స్థలపురాణం చెబుతోంది. ఇన్ని విశేషాలు ఉండటం వల్లే కడప జిల్లాలోని సంగమేశ్వర స్వామి దేవాలయానికి ఎంతో ప్రాముఖ్యత ఏర్పడింది. వివిధ ప్రాంతాల నుంచి భక్తులు ఇక్కడికి తరలివచ్చి, ఆ అరుదైన శివలింగాన్ని దర్శించుకుని ప్రత్యేక పూజలు నిర్వహిస్తుంటారు.

వీడియో చూడండి..