Araku: మంచు దుప్పటి కప్పుకున్న మాడగడ.. పోటెత్తుతున్న పర్యాటకులు.. ప్రాచుర్యం కల్పించాలని కోరుతున్న స్థానికులు
పర్యాటకులే కాకుండా అరకులోయలోని స్థానికులు కూడా కొత్తగా వెలుగులోకి వచ్చిన ఈ మాడగడ మేఘసంద్రాన్ని చూసేందుకు తరలిరావడం విశేషం. చిన్నపాటి ట్రాఫిక్ సమస్యలు ఏర్పడినప్పటికీ యువకులు చోరవ చూపడంతో పర్యాటకుల ప్రశాంతంగా ఈ అందాలను వీక్షించారు
Updated on: Oct 30, 2022 | 2:22 PM
అల్లూరి సీతారామ జిల్లా అరకులోయ మండలంలోని మంచు మేఘాలతో సముద్రంలా కనువిందు చేస్తున్న మాడగడకు పర్యాటకులు పోటెత్తుతున్నారు. ఇటీవలే వెలుగులోకి వచ్చిన ఈ పొగమంచు అందాలను ఆస్వాదించేందుకు జనం తరలివస్తున్నారు. ఉదయం ఐదు గంటల నుంచి పర్యాటకులు భారులు తీరారు. పర్యాటాకుల ఊహలకు తగ్గట్టుగానే తెల్లవారుజాము నుంచి చుట్టూ ఉన్న కొండల మధ్యలో మేఘాలతో ప్రకృతి పాల కడలిలా కమ్మేసింది. దీంతో పర్యాటకులు ఉత్సాహంగా ఉరకలు వేస్తూ పొగమంచును ఎంజాయ్ చేశారు. ప్రతి ఒక్కరూ సెల్ఫీలు దిగుతూ ఆనందోత్సాహాలు వ్యక్తం చేశారు. అరకులోయ కు 8 కిలోమీటర్ల దూరంలో ఇంత అద్భుత అందం ఇన్నాళ్లు దాగుందా అంటూ పర్యాటకులు ఆశ్చర్యం వ్యక్తం చేశారు.
చాలామంది చలిమంటలను కాచుకుంటూ తెల్లవారి నుంచి ఈ అందాల కోసం వెయిట్ చేసారు. పర్యాటకులే కాకుండా అరకులోయలోని స్థానికులు కూడా కొత్తగా వెలుగులోకి వచ్చిన ఈ మాడగడ మేఘసంద్రాన్ని చూసేందుకు తరలిరావడం విశేషం. చిన్నపాటి ట్రాఫిక్ సమస్యలు ఏర్పడినప్పటికీ యువకులు చోరవ చూపడంతో పర్యాటకుల ప్రశాంతంగా ఈ అందాలను వీక్షించారు. మరికొన్ని సదుపాయాలు కల్పించి మరింత ప్రాచుర్యంలోకి తీసుకువస్తే ఈ మాడగడ మేఘసంద్రం మరింత గుర్తింపు లోకి వస్తుందని అంటున్నారు పర్యాటకులు.
సుమారు నాలుగు నెలలు పాటు మేఘాలు ఇలాగే కనువిందు చేస్తాయని, చూపర్లను ఇట్టే ఆకట్టుకుంటాయని చుట్టుపక్కల గ్రామాల గిరిజనులు తెలియజేశారు. పాడేరు ఐటిడిఏ. పర్యాటక శాఖ వారు మాడగడ మేఘసంద్రానికి వెళ్లే త్రోవను మెరుగుపరిచి పార్కింగ్కు సరైన సౌకర్యాలు కల్పిస్తే పర్యాటకులు ఎటువంటి ఇబ్బందులకు గురికాకుండా ఈ అందాలను తిలకించే అవకాశం ఉంది.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..
