Getup Srinu: రోజా కామెంట్స్‌పై గెటప్ శ్రీను రియాక్షన్ ఇదే.. సూటిగా.. సుత్తిలేకుండా
తనపై మంత్రి రోజా చేసిన వ్యాఖ్యలపై గెటప్ శ్రీను స్పందించారు. పవన్ కల్యాణ్‌పై అభిమానం ఉంది కాబట్టే.. జనసేన తరఫున ప్రచారం చేసినట్లు తెలిపారు. తమ అంతట తామే ఫోన్‌ చేసి మరీ ప్రచారానికి వెళ్లాం తప్ప వాళ్లు రమ్మని అడగలేదన్నారు గెటప్ శ్రీను.
మెగా ఫ్యామిలీకి వ్యతిరేకంగా మాట్లాడితే ఇండస్ట్రీలో లేకుండా చేస్తారనే భయంతోనే కొందరు జబర్దస్త్ ఆర్టిస్టులు ఆ కుటుంబానికి మద్దతుగా ఉంటున్నారని ఇటీవల ఏపీ మంత్రి రోజా కామెంట్స్ చేసిన విషయం తెలిసిందే. అంతేకాదు ఆమె ఓ లాజిక్ కూడా చెప్పారు. మెగా ఫ్యామిలీ ‘మా’ ఎన్నికల్లో ప్రకాశ్‌రాజ్‌కి సపోర్ట్‌ చేసినప్పుడు ఇంతమంది ఉన్నా ఆయనెందుకు గెలవలేదని రోజా ప్రశ్నించారు. గెటప్ శ్రీను, సుడిగాలి సుధీర్‌ వంటివారిని అనడం వేస్ట్ అని.. వారితో ఎవరు మాట్లాడిస్తున్నారో వారి గురించి ఆలోచించాలని వ్యాఖ్యానించారు. తాజాగా ‘రాజు యాదవ్‌’ సినిమా ట్రైలర్‌ రిలీజ్ ఈవెంట్‌లో రోజా కామెంట్స్‌పై గెటప్ శ్రీను స్పందించారు. మెగా ఫ్యామిలీతో మాత్రమే కాకుండా.. వెంకటేశ్‌, ఎన్టీఆర్‌, నాని వంటి హీరోలతోనూ సినిమాలు చేసినట్లు గుర్తు చేశారు. ఇతర హీరోల చిత్రాల్లో కూడా తనకు ఆఫర్లు వస్తున్నాయని చెప్పారు. ఏ మనిషి అయినా అందరికీ నచ్చాలని లేదు అని.. పవన్ కల్యాణ్‌పై అభిమానం ఉంది కాబట్టే.. జనసేన తరఫున ప్రచారం చేసినట్లు చెప్పుకొచ్చారు. పిఠాపురంలో ప్రచారానికి మంచి స్పందన లభించిందని.. పవన్ లక్ష మెజారిటీతో గెలుస్తారని గెటప్ శ్రీను జోస్యం చెప్పారు. జనసేన నుంచి ఎవరూ తమని రమ్మని పిలవలేదని.. పవన్‌పై ఉన్న ఇష్టంతోనే… తమంతట తామే ప్రచారానికి వెళ్లినట్లు గెటప్ శ్రీను చెప్పారు.
కాగా పిఠాపురంలో సినిమా స్టార్ల సందడి కొనసాగుతోంది. పవన్, నాగబాబు వంటివారు ప్రచారం కొనసాగిస్తూనే ఉన్నారు. వరుణ్ తేజ్, వైష్ణవ్ తేజ్ కూడా క్యాంపెయిన్ చేశారు. త్వరలో సాయి దుర్గ తేజ్ కూడా వెళ్లనున్నారు. పలువురు జబర్దస్త్ ఆర్టిస్టులు, సినిమా, సిరియల్ నటీనటులు పిఠాపురంలో పవన్ తరఫున ప్రచారంలో పాల్గొంటున్నారు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి…
