కరువు సీమలో కాసులు కురిపిస్తున్న పంట.. అయితే అసలు తెలుసుకోవాల్సింది ఏంటంటే..

కరువుసీమగా పేరుపొందిన అనంతపురం జిల్లాలో వ్యవసాయం సవాలుతో కూడుకున్న పని. ఇలాంటి ప్రతికూల పరిస్థితుల్లోనూ ఆదర్శంగా నిలుస్తూ, అనంతపురం జిల్లా కూడేరు మండలం కమ్మూరు గ్రామానికి చెందిన రైతు పుల్లప్ప దానిమ్మ సాగుతో అద్భుత విజయం సాధించారు. ఉన్న కొద్దిపాటి నీటి వనరులను సద్వినియోగం చేసుకుని, మూడు ఎకరాల్లో దానిమ్మ పంటను సాగు చేసి భారీ దిగుబడులతో పాటు అధిక లాభాలను ఆర్జిస్తున్నారు. ఆయన సాగు పద్ధతులు, విజయం అనేక మంది రైతులకు స్ఫూర్తిగా నిలుస్తున్నాయి. పుల్లప్ప గతంలో సంప్రదాయ పంటలను సాగు చేసేవారు. అయితే వాటి ద్వారా ఆశించిన స్థాయిలో లాభాలు రాకపోవడంతో ప్రత్యామ్నాయ పంటల వైపు దృష్టి సారించారు. మార్కెట్‌లో మంచి ధర పలికే దానిమ్మను సాగు చేయాలని నిర్ణయించుకున్నారు. ఈ క్రమంలో 2023 ఏప్రిల్‌లో మహారాష్ట్రలోని జైన్ కంపెనీ నుంచి భగవా రకాన్ని ఎంచుకున్నారు. ఒక్కో మొక్కకు రూ.35 చొప్పున 1100 మొక్కలను కొనుగోలు చేసి తన మూడు ఎకరాల పొలంలో నాటారు. నాటిన 18 నెలల తర్వాత మొదటి దిగుబడి చేతికొచ్చింది. దాదాపు ఆరు టన్నుల దిగుబడిని సాధించిన పుల్లప్ప, టన్నుకు రూ.55,000 చొప్పున అమ్మి మొత్తం పెట్టుబడిని తిరిగి పొందడమే కాకుండా, రూ.2 లక్షల నికర లాభాన్ని కూడా ఆర్జించారు. ఆయన తొలి పంటలో మొత్తం ఆదాయం రూ.5.5 లక్షలుగా, పెట్టుబడి రూ.2 లక్షలుగా, నికర లాభం రూ.3.5 లక్షలుగా పేర్కొన్నారు. ప్రస్తుతం పుల్లప్ప రెండో పంట కోతకు సిద్ధంగా ఉన్నారు.

ఈసారి మూడు ఎకరాలకు సుమారు 20 టన్నుల దిగుబడి వచ్చే అవకాశం ఉందని అంచనా వేస్తున్నారు. ప్రస్తుత మార్కెట్ ధరలు టన్నుకు రూ.1,70,000 పైన పలుకుతుండటంతో, రెండో పంట ద్వారా రూ.34 లక్షల వరకు ఆదాయం వచ్చే అవకాశం ఉందని ఆశాభావం వ్యక్తం చేస్తున్నారు. బెంగళూరు, బళ్లారి వంటి ప్రాంతాల నుంచి వ్యాపారస్తులు వచ్చి నేరుగా పొలం నుంచే కాయలను కొనుగోలు చేస్తున్నారు. దానిమ్మ సాగుకు అనువైన వాతావరణం, సాగు పద్ధతుల పట్ల పుల్లప్ప చాలా జాగ్రత్తలు తీసుకుంటున్నారు. దానిమ్మ ఉష్ణమండల పంట అయినప్పటికీ, చలికాలంలో చల్లగానూ, ఎండాకాలంలో వేడిగా ఉండే మెట్ట ప్రదేశాలలో బాగా దిగుబడినిస్తుంది. కాయలు పెరిగే, పండే దశలో పొడిగా లేదా వేడిగా ఉండే వాతావరణం అవసరం. ఉష్ణోగ్రత తగినంతగా లేకపోతే కాయల్లో తీపి తగ్గిపోతుందని, వాతావరణంలో తేమ ఎక్కువగా ఉంటే కాయల నాణ్యత దెబ్బతింటుందని నిపుణులు సూచిస్తున్నారు. పుల్లప్ప స్థానిక ఉద్యాన రంగ నిపుణుల సలహాలు, సూచనలు పాటిస్తూ ముందుకు సాగుతున్నారు. పుల్లప్ప తన తోటలో సేంద్రీయ పద్ధతులకు ప్రాధాన్యతనిస్తున్నారు. వేపచెక్కను వాడటం, సన్నాయి వంటి పంటలను నానబెట్టి ఎరువుగా వాడటం వంటివి చేస్తున్నారు. బ్యాక్టీరియల్ బ్లైట్ వంటి సమస్యలను నివారించడానికి B.S-40తో పాటు వేపచెక్క, 10-20-26 వంటి ఎరువులను, ఫార్ములా 7ను కూడా ఉపయోగిస్తున్నారు. ఇవి కాయలకు మంచి రంగు, పరిమాణం రావడానికి సహాయపడతాయని తెలిపారు. దానిమ్మ పంటలో నెమటోడ్స్, బ్యాక్టీరియల్ బ్లైట్, ఎర్ర నల్లి, సర్కోస్పోరా మచ్చలు, ఆంత్రక్నోస్ వంటి తెగుళ్లు, చీడపీడలు సమస్యలు ఉంటాయి.

ఎర్ర నల్లి సమస్య ఉన్నప్పుడు మధ్యాహ్నం పూట మందులు పిచికారీ చేయడం వల్ల మంచి ఫలితాలు వస్తాయని, మిటిగేట్, డైఫెన్త్రిన్, ఇథియాన్ వంటి మందులను వాడవచ్చు అని నిపుణులు సూచిస్తున్నారు. బ్యాక్టీరియల్ బ్లైట్ వల్ల కాయలపై ఆయిల్ స్పాట్స్ ఏర్పడి, కాయ పగిలిపోవడానికి దారితీస్తుంది. సరైన సమయంలో తోటను పరిశీలిస్తూ, నిపుణుల సలహాలతో సరైన నివారణ చర్యలు తీసుకోవడం ద్వారా మంచి నాణ్యత గల దిగుబడిని సాధించి అధిక లాభాలు పొందవచ్చని పుల్లప్ప తన అనుభవం ద్వారా నిరూపించారు. పుల్లప్ప విజయం కరువుసీమలోని ఇతర రైతులకు ఆశాదీపంగా మారింది.