అమెరికా ఉపాధ్యక్షురాలు కమలా హారిస్ కి బెదిరింపులు, ఫ్లోరిడాకు చెందిన నర్సు అరెస్ట్
అమెరికా ఉపాధ్యక్షురాలు కమలా హారిస్ ను హతమారుస్తానంటూ బెదిరించిన ఓ నర్సును పోలీసులు అరెస్టు చేశారు. ఫ్లోరిడాకు చెందిన ఈమెను నివియన్ పెటిట్ హెల్ప్స్ గా గుర్తించారు.
Umakanth Rao | Edited By: Phani CH
Updated on: Apr 18, 2021 | 11:24 AM
అమెరికా ఉపాధ్యక్షురాలు కమలా హారిస్ ను హతమారుస్తానంటూ బెదిరించిన ఓ నర్సును పోలీసులు అరెస్టు చేశారు. ఫ్లోరిడాకు చెందిన ఈమెను నివియన్ పెటిట్ హెల్ప్స్ గా గుర్తించారు. 39 ఏళ్ళ ఈ నర్సు.. 2001 నుంచి జాక్సన్ హెల్త్ సిస్టం హాస్పిటల్ లో పని చేస్తున్నట్టు పోలీసులు తెలిపారు. గత ఫిబ్రవరి 13-18 తేదీల మధ్య నివియన్.. కమలా హారిస్ కు భౌతికంగా హాని చేస్తానని, హతమారుస్తానని బెదిరించిందట. తొలి బ్లాక్ వుమన్, మొట్టమొదటి దక్షిణాసియన్ అమెరికన్ అయిన 56 ఏళ్ళ కమలా హారిస్ కు ఒక నర్సు నుంచి ఈ విధమైన బెదిరింపులు అందడం ఆశ్చర్యకరమని పోలీసులు పేర్కొన్నారు. ప్రస్తుతం జైలు శిక్ష అనుభవిస్తున్న తన భర్తకు నివియన్ ఈ మేరకు వీడియో మెసేజ్ లు పంపినట్టు వారు చెప్పారు.
అధ్యక్షుడు జోబైడెన్ పట్ల, కమలా హారిస్ పట్ల ద్వేష పూరిత వ్యాఖ్యలు చేసిన ఈ నర్సు వ్యవహారం పోలీసులకు అంతుబట్టడంలేదు. బహుశా జాతి వివక్షతో ఇలా ఈమె హారిస్ ను బెదిరించి ఉండవచ్చునని భావిస్తున్నారు. ఈ రోజు నుంచి 50 రోజుల్లోగా మిమ్మల్ని చంపుతానని హెల్ప్స్..ఫిబ్రవరి 18 న తన వీడియో మెసేజ్ లో హారిస్ ను ఉద్దేశించి వార్నింగ్ ఇచ్చింది. ఉపాధ్యక్షురాలిగా ప్రమాణ స్వీకారం చేస్తున్నప్పుడు మీరు మీ చేతిని బైబిల్ పై పెట్టేబదులు మీ క్లచ్ పర్సుపై పెట్టారని ఈ నర్సు తన హెచ్చరికలో ఆరోపించింది. ఇది అగౌరవ సూచకమని పేర్కొంది. ఇంకా ఓ పిస్టల్ పట్టుకుని ఓ షూటింగ్ రేంజ్ లో హెల్ప్స్ చేసిన హంగామా తాలూకు ఫోటోను పోలీసులు గమనించారు. ఆయుధాలను రహస్యంగా దాచుకునేందుకు తనకు లైసెన్స్ ఇవ్వాలని కూడా అధికారులను ఈమె కోరిందట. మార్చి 3 న పోలీసులు, డిటెక్టివ్ లు ఈమె ఇంటికి వెళ్లినప్పుడు వారితో మాట్లాడేందుకు ఫెల్ప్స్ నిరాకరించిందని, అయితే ఆ తరువాత మళ్ళీ వారు ఆమె ఇంటికి వెళ్లగా తన యవ్వారం ముగిసిందని భయపడిన ఈ నర్సు తనకు ఇప్పుడు కమలా హారిస్ అంటే ద్వేషం లేదని చెప్పినట్టు తెలిసింది.
మరిన్ని ఇక్కడ చూడండి: ఐఏఎస్ చదివే యువకుడు అకస్మాత్తుగా సూసైడ్.. విచారణలో పోలీసులకు మైండ్ బ్లాంక్.. వామ్మో ఏం స్కెచ్
