భార్య మీద కోపంతో నాలుగు వందల కిలోమీటర్లు నడుచుకుంటూ వెళ్లిన భర్త!

ఆలుమగలన్నాక చిరుకోపాలు, అలకలు సహజం! కొట్టేసుకునేంత వరకు వెళితేనే ప్రాబ్లం… ఇటలీలోని కోమోలో ఓ మొగుడు పెళ్లాలున్నారు.. రోజూ గొడవపడందే వారికి నిద్రపట్టదు.. ఓసారి మాత్రం ఆ గొడవ తారస్థాయికి వెళ్లింది.. ఇద్దరూ గట్టిగా తిట్టేసుకున్నారు.. నువ్వు తిడితే నేనేందుకు పడాలి అని గాట్టిగా ఒక్కటిచ్చుకుంది భార్యామణి.. ఆ దెబ్బకు మనవాడు బాగా హర్టయ్యాడు.. ‘నా మీద చేయి చేసుకుంటావా? ఒక్క క్షణం కూడా ఈ ఇంట్లో ఉండను’ అంటూ బయటకెళ్లాడు.. వెళ్లినవాడు కాసేపు అటూ ఇటూ తిరిగి ఇంటికొస్తే బాగుండేది.. కానీ అతడేమో అలా నడుచుకుంటూ వెళ్లిపోయాడు.. రాజకీయ నాయకులు పాదయాత్ర చేస్తున్నట్టుగా నడుస్తూ పోయాడు.. ఎన్నో ఊళ్లు దాటాడు.. అయినప్పటికీ అతగాడి కోపం తగ్గలేదు.. అలా వెళుతూ వెళుతూ చాలా దూరం వెళ్లిపోయాడు. ఎంతనుకుంటున్నారు..? 418 కిలోమీటర్లు…నమ్మకం కుదరడం లేదు కదూ! నిజంగానే అంతదూరం నడిచాడు.. ఈ విషయం ఇటలీ పోలీసులే చెప్పారు.. ఇటలీ పోలీసులకు అబద్దాలు చెప్పే అవసరం ఏముంటుంది? వాళ్లకు మట్టుకు ఎలా తెలిసిందంటారా? గిమర్రా పట్టణంలో లాక్‌డౌన్‌ కర్ఫ్యూను ఉల్లంఘించి ఇతడు ఒంటరిగా నడుచుకుంటూ వెళుతుంటే అనుమానం వచ్చి పోలీసులు ఆపారు.. విషయం తెలుసుకున్నారు.. ఔరా అని ముక్కున వేలేసుకున్నారు. అప్పటికే ఇతను తప్పిపోయినట్టు అర్ధాంగి కంప్లయింట్‌ ఇవ్వడంతో పోలీసులు అతడిని స్టేషన్‌కు పట్టుకొచ్చారు..ఎందుకు బాబూ…! అలా నడిచావు అని అడిగితే భార్యమీద కోపం పట్టలేక అని సింపుల్‌గా జవాబిచ్చాడు.. ఆ కోపంతోనే వారం రోజులపాటు నడుస్తూ వెళ్లానని, దారిలో కొందరు దయతో తన ఆకలిదప్పులు తీర్చారని అన్నాడు..తన ఆరోగ్యం బ్రహ్మండంగా ఉందని, కాకపోతే కాసింత అలసిపోయానంతేనని చెబుతున్నాడు. 48 ఏళ్ల వయసులో అలా అంతదూరం నడవడం కష్టమే! కాకపోతే భార్య మీద వచ్చిన కోపం అలాంటిది మరి!