అమెరికా-కెనడా ట్రేడ్ వార్.. డొనాల్డ్ ట్రంప్‌ సంచలన నిర్ణయం!

అమెరికా, కెనడా మధ్య వాణిజ్య సంబంధాల్లో మరోసారి ఉద్రిక్తతలు నెలకొన్నాయి. ఇరు దేశాలు వాణిజ్య ఒప్పందంపై తుది అంగీకారానికి రాకపోవడంతో కెనడా నుంచి దిగుమతి అయ్యే కొన్ని వస్తువులపై అమెరికా భారీ సుంకాలు విధించినట్లు సమాచారం. అమెరికా చర్యకు ప్రతిస్పందనగా కెనడా కూడా సమాన స్థాయిలో ప్రతీకార సుంకాలు విధిస్తామని ప్రధానమంత్రి మార్క్ కార్నీ ప్రకటించారు. దీంతో ఇప్పటికే విభేదాలతో సాగుతున్న ఇరు దేశాల సంబంధాలపై ఈ పరిణామం మరింత ప్రభావం చూపే అవకాశం కనిపిస్తోంది.

కెనడాతో వాణిజ్య ఒప్పందాన్ని ఖరారు చేసేందుకు అమెరికా ప్రతిపాదించిన నిబంధనలను ఆ దేశం చివరి దశలో అంగీకరించలేదని అమెరికా వాణిజ్య ప్రతినిధి జామీసన్ గ్రీర్ ఆరోపించారు. అమెరికా మార్కెట్‌కు ఎగుమతులు చేసే ప్రధాన దేశాల్లో కెనడాకు అత్యంత అనుకూలమైన నిబంధనలను ప్రతిపాదించినప్పటికీ.. కెనడా కొత్త డిమాండ్లను తెరపైకి తీసుకురావడంతో చర్చలు నిలిచిపోయాయని ఆయన తెలిపారు.

అయితే అమెరికా ప్రతిపాదనల్లో చివరి నిమిషంలో చేసిన మార్పులు తమ దేశానికి అన్యాయంగా, ఆర్థికంగా నష్టదాయకంగా ఉన్నాయని కెనడా ప్రధాని మార్క్ కార్నీ విమర్శించారు. గత కొన్ని వారాల్లో ఇరు దేశాల మధ్య చర్చల్లో గణనీయమైన పురోగతి సాధించామని, అయితే కెనడా ప్రజల ప్రయోజనాలను కాపాడే స్థాయిలో ఒప్పందం కుదిరే పరిస్థితి ఇంకా రాలేదని పేర్కొన్నారు. అమెరికా సుంకాలకు కెనడా తగిన విధంగా స్పందిస్తుందని కార్నీ స్పష్టం చేశారు. అమెరికా విధించే కొత్త సుంకాలకు డాలర్‌కు డాలర్‌ ప్రాతిపదికన ప్రతీకార చర్యలు తీసుకుంటామని హెచ్చరించారు.

ఇప్పటికే నాటో రక్షణ సహకారం, చైనాతో వాణిజ్య విధానాలు, సరిహద్దు అంశాలు వంటి పలు విషయాల్లో అమెరికా-కెనడా మధ్య విభేదాలు కొనసాగుతున్నాయి. తాజాగా వాణిజ్య సుంకాల అంశం కూడా ఈ జాబితాలో చేరడంతో రెండు దేశాల మధ్య ఆర్థిక, దౌత్య సంబంధాలు మరింత సంక్లిష్టంగా మారే అవకాశం ఉంది. అమెరికా-కెనడా వాణిజ్యంపై ఆధారపడే వ్యాపారాలు, పరిశ్రమలపై ఈ పరిణామాల ప్రభావం ఎలా ఉంటుందన్నది ఇప్పుడు కీలకంగా మారింది.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..