మిగిలింది ఇంకా రెండే నెలలు.. 60 ఏళ్ల క్రితమే రాసిపెట్టిన మరణ శాసనం..! ప్రపంచానికి అదే ఆఖరి రోజు?
సూర్యుని చుట్టూ పరిభ్రమించే గ్రహాలలో జీవం ఉన్న ఏకైక గ్రహం భూమి. సుమారు నాలుగున్నర బిలియన్ సంవత్సరాల క్రితం ఆవిర్భవించిన నాటి నుండి నేటి వరకు మానవాళి ఎన్నో మార్పులను చూసింది. అయితే, తరచుగా ప్రపంచం అంతం కాబోతోంది అంటూ వస్తున్న ప్రచారాలు ప్రజల్లో ఆందోళన కలిగిస్తూనే ఉన్నాయి. తాజాగా 2026 నవంబర్ 13న ప్రపంచ వినాశనం జరుగుతుందంటూ సోషల్ మీడియాలో విపరీతమైన ప్రచారం సాగుతోంది. అసలు ఈ ప్రచారం వెనుక ఉన్న శాస్త్రీయ నిజాలేంటో చూద్దాం.
Updated on: Aug 26, 2026 | 7:44 PM
ఇటీవలి కాలంలో సోషల్ మీడియాలో ఒక విచిత్రమైన ప్రచారం బాగా వైరల్ అవుతోంది. రాబోయే నవంబర్ 13వ తేదీన ప్రపంచం అంతమైపోతుందనే వార్తలు నెటిజన్లలో తీవ్ర భయాందోళనలను కలిగిస్తున్నాయి. మానవాళి ఉనికి ముగిసిపోతుందంటూ వస్తున్న ఈ కథనాల వెనుక ఉన్న అసలు శాస్త్రీయ నిజాలు ఏమిటో ఇప్పుడు వివరంగా తెలుసుకుందాం.
1960 నాటి పరిశోధనా పత్రం:
ఈ భయాలన్నిటికీ మూలం 1960లో ప్రచురితమైన ఒక పాత పరిశోధనా పత్రం. 1960లో ఆస్ట్రియన్ భౌతిక శాస్త్రవేత్త హెంజ్ ఫోర్స్టర్ తన సహచరులు పాట్రిసియా ఎం. మోరా, లారెన్స్ డబ్ల్యూ. అమియోట్లతో కలిసి ఒక పరిశోధనా పత్రాన్ని ప్రసిద్ధ సైన్స్ పత్రికలో ప్రచురించారు. దానికి ప్రళయం: శుక్రవారం, నవంబర్ 13, క్రీ.శ. 2026 అని పేరు పెట్టారు. గత రెండు వేల సంవత్సరాల జనాభా వివరాలను విశ్లేషించి, జనాభా పెరుగుదల హైపర్బోలిక్ రేటుతో సాగుతోందని వారు ఒక గణిత సమీకరణాన్ని రూపొందించారు.
అసలు డూమ్స్డే అంటే ఏమిటి?:
ఈ వ్యాసంలో డూమ్స్డే అనే పదాన్ని చూసి చాలామంది భూమి బద్దలవుతుందని లేదా ఏదో గ్రహశకలం వచ్చి పడుతుందని పొరబడ్డారు. కానీ, ఫోర్స్టర్ తన అధ్యయనంలో భూగోళం లేదా ప్రకృతి వినాశనం గురించి మాట్లాడలేదు. ఫోర్స్టర్ అంచనా ప్రకారం, 1960ల నాటి వృద్ధి రేటు ఇలాగే కొనసాగితే 2026 నవంబర్ 13 నాటికి ప్రపంచ జనాభా పరిమితి దాటి అనంతానికి చేరుకుంటుంది. అయితే, ఇక్కడ గమనించాల్సిన ముఖ్య విషయమేమిటంటే, వారు వర్ణించిన అపోకలిప్స్ గ్రహశకలాలు పడటం లేదా భూమి పగిలిపోవడం వంటి సంపూర్ణ విధ్వంసం కాదు! కేవలం అధిక జనాభా వల్ల ఆహారం, నీరు వంటి వనరులు సరిపోక తీవ్రమైన ఆకలి చావులు సంభవిస్తాయని మాత్రమే వారు చెప్పారు.
తప్పుగా నిరూపితమైన గణిత నమూనా:
ప్రకృతి, మానవ సమాజం ఫోర్స్టర్ ఊహించిన దిశలో పయనించలేదు. 1960లో అధ్యయనం చేసినప్పుడు ప్రపంచ జనాభా 300 కోట్లుగా ఉండేది. 1963 నాటికి వృద్ధి రేటు 2.2 శాతంతో గరిష్ఠ స్థాయికి చేరినప్పటికీ, అప్పటి నుండి క్రమంగా తగ్గుతూ వచ్చింది. ఐక్యరాజ్యసమితి గణాంకాల ప్రకారం 2026 నాటికి ప్రపంచ జనాభా వృద్ధి రేటు 0.84 శాతానికి పడిపోయింది. విద్య, పట్టణీకరణ, మహిళా సాధికారత, గర్భనిరోధక సాధనాల వాడకం, పెరిగిన జీవన వ్యయం వంటి కారణాల వల్ల ప్రపంచవ్యాప్తంగా జననాల రేటు తగ్గింది.
నేడు ప్రపంచ జనాభా 8.2 బిలియన్లకు చేరినప్పటికీ, ఫోర్స్టర్ లెక్కించినట్లుగా అది అనంతం కావడం లేదు. కాబట్టి, నవంబర్ 13న ప్రపంచానికి ఎలాంటి ముప్పూ లేదు. ప్రపంచం అంతమవుతుందనే వార్తల్లో ఎలాంటి నిజం లేదు. ఇది కేవలం 60 ఏళ్ల నాటి ఒక గణిత నమూనాను సరిగ్గా అర్థం చేసుకోకుండా సోషల్ మీడియాలో సృష్టించిన పుకారు మాత్రమే. సోషల్ మీడియాలో వస్తున్న పుకార్లను నమ్మి ఎలాంటి భయాందోళన చెందాల్సిన అవసరం లేదని పరిశోధకులు స్పష్టం చేస్తున్నారు.
మరిన్ని ట్రెండింగ్ న్యూస్ కోసం క్లిక్ చేయండి..
