క్వారంటైన్‌కి కుక్కను తీసుకెళ్లిన వ్యక్తి.. పెద్ద కారణమే ఉందండోయ్..!

కరోనా అనుమానిత లక్షణాలు ఉన్న వారిని, వైరస్‌ సోకిన వారితో కాంటాక్ట్ అయిన వారిని క్వారంటైన్ సెంటర్‌కి తరలిస్తోన్న విషయం తెలిసిందే. అయితే మనుషులు ఉండాల్సిన క్వారంటైన్‌ సెంటర్‌లోకి ఓ కుక్కకు అనుమతి ఇచ్చారు అధికారులు. దీనికి సంబంధించిన వీడియో సోషల్ మీడియాలో వైరల్‌గా మారింది. కాగా క్వారంటైన్‌ సెంటర్‌లోకి కుక్కను తరలించడానికి వెనుక ఓ కారణం ఉంది.

వివరాల్లోకి వెళితే జమ్ముకశ్మీర్‌లోని తకురాయ్‌ గ్రామానికి చెందిన ఓ డ్రైవర్‌కి ఇటీవల కరోనా పాజిటివ్‌గా తేలింది. దీంతో ఆయనతో కాంటాక్ట్ అయిన వారందరినీ క్వారంటైన్ సెంటర్‌కు తరలించారు అధికారులు. వారిలో ఫిల్లార్ గ్రామానికి చెందిన ఓ వ్యక్తి కూడా ఉన్నారు. అయితే ఆ వ్యక్తిని క్వారంటైన్‌కు తరలించే క్రమంలో తన కుక్కను కూడా తీసుకొస్తానని అతడు అధికారులతో చెప్పాడు. ఎందుకని అడగ్గా.. ”నేను ఈ కుక్కను పదివేలు పెట్టి తెచ్చుకున్నాను. నేను క్వారంటైన్ సెంటర్‌కి వస్తే ఈ కుక్కను చూసుకునేందుకు నా ఇంట్లో ప్రస్తుతం ఎవరూ లేరు. అందుకే నేను ఎక్కడుంటే నా కుక్క కూడా నాతో అక్కడే ఉంటుంది” అని తెలిపాడు. ఈ విషయంపై పైఅధికారులతో చర్చించిన అధికారులు.. క్వారంటైన్‌ సెంటర్‌లో కుక్కకు కూడా అనుమతిని ఇచ్చారు. ఇక అక్కడ ఆ వ్యక్తి తన కుక్క యోగక్షేమాలు చూసుకుంటుండగా.. దానికి సంబంధించిన వీడియో వైరల్‌గా మారింది.

Read This Story Also: పదో తరగతి పరీక్షలు ఎన్నిసార్లు రద్దయ్యాయంటే..!