తమన్నా భాటియా

తమన్నా భాటియా తెలుగు చిత్ర పరిశ్రమలో అగ్ర కథానాయిక. అభిమానులు ఆమెను ముద్దుగా మిల్కీ బ్యూటీ అని పిలుచుకుంటారు. తెలుగుతోపాటు తమిళం, హిందీ భాషలలో అనేక చిత్రాల్లో నటించి తనకంటూ ఓ గుర్తింపు తెచ్చుకుంది. 1989 డిసెంబర్ 21న ముంబైలో సంతోష్, రజనీ భాటియా అనే దంపతులకు జన్మించింది. ముంబైలో మేనకాజీ కూపర్ ఎడ్యుకేషన్ ట్రస్ట్ స్కూల్లో పాఠశాల విద్యను పూర్తి చేసింది. ఆ తర్వాత 13 ఏళ్ల వయసులోనే నటనపై ఆసక్తితో యాక్టింగ్ స్కూల్లో చేరి శిక్షణ తీసుకుంది. 2005లో అభిజీత్ సావంత్ రూపొందించిన ఆప్కా అభిజీత్ లోని లఫ్జో మే పాటతో సినీరంగంలోకి అడుగుపెట్టింది. ఆ తర్వాత హిందీలో చాంద్ సా రోష్ చెహ్రా సినిమాతో హీరోయిన్ గా మారింది. 2006లో మంచు మనోజ్ నటించిన శ్రీ సినిమాతో తెలుగు తెరకు పరిచయమైంది. కానీ ఈ సినిమా విజయం సాధించలేదు. ఆ మరుసటి ఏడాది శేఖర్ కమ్ముల తెరకెక్కించిన హ్యాపీడేస్ సినిమాతో సూపర్ హిట్ అందుకుంది. ఈ మూవీ తర్వాత తమన్నాకు తెలుగు, తమిళంలో వరుస ఆఫర్స్ క్యూ కట్టాయి. సౌత్ ఇండస్ట్రీలో అనేక చిత్రాల్లో నటించిన తమన్నా.. ఇప్పుడు ఓటీటీ ప్లాట్ ఫామ్స్ లోనూ సత్తా చాటుతుంది. అలాగే స్టార్ హీరోల సినిమాల్లో స్పెషల్ పాటలతో రచ్చ చేస్తుంది. ఇప్పుడు ఇండస్ట్రీలో అత్యధిక రెమ్యునరేషన్ తీసుకునే హీరోయిన్లలో తమన్నా ఒకరు.