Hyderabad: నిందితుడు ఓవరాక్షన్‌.. పోలీస్ లాకప్‌లో ఉన్నా.. ఫ్రెండ్స్‌తో రీల్స్‌ చేయిస్తూ సోషల్‌ మీడియాలో పోస్టులు..!

నేరస్థులకు పోలీసులన్నా లెక్కలేకుండా పోతోందా..? అరెస్ట్‌ చేసి లాకప్‌లో పెట్టినా భయమనేదే ఉండటం లేదా..? అంటే హైదరాబాద్‌ బండ్లగూడ పోలీస్‌స్టేషన్‌లో ఓ నిందితుడి ఓవరాక్షన్‌ చూస్తే అలాగే అనిపించక మానదు. ప్రేమ పేరుతో తమ అమ్మాయిని ఎత్తుకెళ్లాడంటూ బండ్లగూడ పోలీసులను ఆశ్రయించింది ఓ తల్లి. స్థానిక యువకుడు దస్తగిరిపై అనుమానం వ్యక్తం చేస్తూ ఫిర్యాదు చేసింది. కేసు నమోదు చేసిన పోలీసులు.. బాలికను మాత్రం కనిపెట్టలేకపోయారు. దీంతో బాలిక తల్లి పోలీసు ఉన్నతాధికారులను ఆశ్రయించడంతో చేసేదేమీలేక నిందితుడు దస్తగిరిని తీసుకొచ్చి లాకప్‌లో పడేశారు బండ్లగూడ పోలీసులు.

ఇక లాకప్‌లో ఉన్నా బాలిక కుటుంంబంపై బెదిరింపులకు దిగాడు దస్తగిరి. పోలీస్‌స్టేషన్‌లోనే ఫ్రెండ్స్‌తో రీల్స్‌ చేయిస్తూ సోషల్‌ మీడియాలో పోస్టులు పెట్టాడు దస్తగిరి. ఇందుకు సంబంధించిన వీడియోలు ప్రస్తుతం సోషల్ మీడియాలో తెగ చక్కర్లు కొడుతున్నాయి. ఈ నేపథ్యంలోనే నిందితుడు దస్తగిరికి పోలీసులు రాచమర్యాదలు చేస్తున్నారని బాధిత కుటుంబం ఆరోపిస్తోంది. అందుకు, పోలీస్‌స్టేషన్‌లో చేసిన రీల్సే రుజువు అంటున్నారు. పోలీస్‌స్టేషన్‌లో పోలీసుల ముందే రీల్స్‌ చేస్తుంటే ఎందుకు చర్యలు తీసుకోవడం లేదని ప్రశ్నిస్తోంది బాలిక ఫ్యామిలీ. దీంతో సోషల్‌ మీడియా ద్వారా పోలీసులు ఉన్నతాధికారులకు ఫిర్యాదు చేశారు పాతబస్తీ వాసులు.

మరిన్ని క్రైమ్ వార్తల కోసం ఇక్కడ క్లిక్ చేయండి..