Chandrayaan-3: ఊహించినదాని కంటే ఎక్కువ.. చంద్రుడిపై ప్రయోగంలో కొత్త విషయాలు కనిపెట్టిన చంద్రయాన్‌-3! అవేంటంటే..?

ఇస్రో చేపట్టిన చంద్రయాన్‌-3 ప్రయోగంలో భాగంగా 2023 ఆగస్టు 23న చంద్రుడి దక్షిణ ధ్రువంపై మన ల్యాండర్‌ విజయవంతంగా దిగిన విషయం తెలిసిందే. ఇండియా సాధించిన అతి గొప్ప విజయాల్లో ఇదీ ఒకటి. అయితే తాజాగా చంద్రయాన్‌-3 ప్రయోగం వల్ల మనం సాధించిన విజయాలను ఇస్రో ఓ జర్నల్‌లో ప్రచూరించింది. గతంలో మనం(మొత్తం ప్రపంచం) ఊహించిన దాని కంటే కూడా ఎక్కువ నీరు చంద్రుడిపై ఉన్నట్లు చంద్రయాన్‌-3 గుర్తించింది. చంద్రుని దక్షిణ ధ్రువంపై విజయవంతంగా ల్యాండ్ అయిన మిషన్, చంద్రుని ఉపరితలం కింద, ముఖ్యంగా ధ్రువాల వద్ద మరిన్ని ప్రదేశాలలో మంచు ఉండవచ్చని సూచించే కీలకమైన ఉష్ణోగ్రత డేటాను అందించింది. అహ్మదాబాద్‌లోని ఫిజికల్ రీసెర్చ్ లాబొరేటరీ నుండి దుర్గా ప్రసాద్ కరణం నేతృత్వంలోని చంద్రయాన్-3 పరిశోధన బృందం, మంచు ఏర్పడటుకు అక్కడున్న వాతావరణ పరిస్థితులను గుర్తించింది.

ఉష్ణోగ్రతల్లో వైవిధ్యాలు చంద్రుని ఉపరితల లక్షణాలు, సౌర వికిరణ నమూనాల ద్వారా ప్రభావితమవుతాయి. ఈ పరిస్థితులలో ఏర్పడిన మంచు కణాల అధ్యయనం చంద్రుని భౌగోళిక చరిత్ర, ప్రారంభ భౌగోళిక ప్రక్రియలపై కీలక ఆధారాలు అందిస్తోంది. చంద్రయాన్-3 మిషన్‌లో భాగమైన ChaSTE ప్రోబ్, ఉపరితలం నుండి 10 సెంటీమీటర్ల లోతు వరకు ఉష్ణోగ్రతలను కొలిచింది, ఇది చాలా కచ్చితమైన పరిస్థితులను వెల్లడించింది. చంద్రుడి ఉపరితలంపై మన ల్యాండర్‌ దిగిన ప్రదేశానికి ఇస్రో ‘శివ శక్తి పాయింట్’ అని పేరు పెట్టిన విషయం తెలిసిందే. ఆ శివ శక్తి పాయింట్‌ సైట్ వద్ద ఉష్ణోగ్రతలు పగటిపూట 82C నుండి రాత్రి -170C వరకు ఉన్నాయి. పరిశోధకులు అభివృద్ధి చేసిన ఒక నమూనా ప్రకారం, సూర్యుని నుండి దూరంగా, 14 డిగ్రీల కంటే ఎక్కువ వాలు కలిగిన చంద్ర ఉపరితలం దగ్గర మంచు పేరుకుపోయేంత చల్లగా ఉష్ణోగ్రతలను ఉండొచ్చు. కమ్యూనికేషన్స్ ఎర్త్ అండ్‌ ఎన్విరాన్‌మెంట్ జర్నల్‌లో ప్రచురితమైన ఈ పరిశోధనలు, చంద్రునిపై స్థిరమైన మానవ ఉనికిని స్థాపించడం లక్ష్యంగా పెట్టుకున్న NASA యొక్క ఆర్టెమిస్ ప్రోగ్రామ్ వంటి భవిష్యత్ మిషన్లకు పోలి ఉన్నాయి.

చంద్రుడిపై ఉండే మంచు, అక్కడ స్థిర నివాసానికి కచ్చితంగా కీలకమైన వనరుగా ఉపయోగపడుతుంది. అయితే, చంద్రుని అల్ట్రా-హై వాక్యూమ్ వాతావరణం కారణంగా, మంచు.. నీటిలా కరగడానికి బదులుగా నేరుగా ఆవిరిలోకి మారుతోంది. భవిష్యత్ మిషన్ల కోసం చంద్రుడిపై మంచును కరిగించేందుకు టెక్నాలజీని అభివృద్ధి చేస్తే ఫలితం ఉండొచ్చు. చంద్రునిపై ఉన్న అధిక అక్షాంశ ప్రాంతాలు మంచు నిక్షేపాలకు ఆశాజనకమైన ప్రదేశాలుగా గుర్తించారు. ధ్రువాలతో పోలిస్తే ఈ ప్రాంతాల్లో ప్రయోగాలు చేయడం అంత కష్టం కాదు. ప్రస్తుతం చంద్రయాన్‌-3 అందించిన ఈ డేటా ఆధారంగా చండ్రుడిపై భవిష్యత్తులో చేసే ప్రయోగాలకు మరింత హెల్ప్‌ కానుంది. అయితే ఈ చంద్రయాన-3 ప్రయోగం చాలా కష్టంతో చేశారు. అలాగే దక్షిన ధ్రువంపై ల్యాండర్‌ను విజయవంతంగా దింపిన దేశంగా భారత్‌ చరిత్ర సృష్టించిన విషయం తెలిసిందే.

మరిన్ని సైన్స్ అండ్ టెక్నాలజీ వార్తల కోసం ఇక్కడ క్లిక్ చేయండి