FIFA World Cup 2026 : రెండు దశాబ్దాల ప్రయాణం, ఆరు ప్రపంచకప్‌లు.. కన్నీళ్లతో మైదానాన్ని వీడిన స్టార్ గోల్‌కీపర్

FIFA World Cup 2026 : ఫుట్‌బాల్ ప్రపంచంలో ఒక సుదీర్ఘమైన స్వర్ణ శకం ముగిసింది. మెక్సికో దేశానికి చెందిన లెజెండరీ గోల్‌కీపర్ గిలెర్మో ఒచోవా అంతర్జాతీయ ఫుట్‌బాల్ కెరీర్‌కు అధికారికంగా వీడ్కోలు పలికారు. ఫిఫా వరల్డ్ కప్ 2026 టోర్నమెంట్‌లో మెక్సికో ప్రయాణం ముగియడంతో ఆయన ఈ సంచలన నిర్ణయాన్ని ప్రకటించారు. సోమవారం నాడు తన దేశం తరఫున ఆయన చివరి మ్యాచ్ ఆడారు. ఒచోవాతో పాటు అదే రోజు బ్రెజిల్ స్టార్ ప్లేయర్ నేమార్ కూడా రిటైర్మెంట్ ప్రకటించడంతో ప్రపంచవ్యాప్తంగా ఉన్న ఫుట్‌బాల్ అభిమానులు తీవ్ర దిగ్భ్రాంతికి లోనయ్యారు. మరోవైపు స్టార్ ప్లేయర్ క్రిస్టియానో రొనాల్డో కూడా త్వరలోనే రిటైర్ కాబోతున్నారనే వార్తలు అభిమానుల గుండెల్ని పిండేస్తున్నాయి.

ఫిఫా వరల్డ్ కప్ 2026 రౌండ్ ఆఫ్ 16 పోరు

ఫిఫా ప్రపంచకప్ రౌండ్ ఆఫ్ 16 మ్యాచ్‌లో భాగంగా ఇంగ్లాండ్, మెక్సికో జట్ల మధ్య హోరాహోరీ పోరు సాగింది. ఈ ఉత్కంఠభరితమైన మ్యాచ్‌లో ఇంగ్లాండ్ 3-2 గోల్స్ తేడాతో మెక్సికోపై ఘన విజయం సాధించింది. ఇంగ్లాండ్ తరఫున జూడ్ బెల్లింగ్‌హామ్ అద్భుత ఆటతీరును కనబరిచి మ్యాచ్ 36వ నిమిషంలో మొదటి గోల్, ఆ వెంటనే 38వ నిమిషంలో రెండో గోల్ కొట్టి జట్టును ఆధిక్యంలోకి తీసుకెళ్లారు. మొదటి హాఫ్ ముగిసే సమయానికి మెక్సికో ఆటగాడు జూలియన్ క్వివనెస్ ఒక గోల్ కొట్టి స్కోరును తగ్గించే ప్రయత్నం చేశారు. అయితే, మ్యాచ్ 60వ నిమిషంలో ఇంగ్లాండ్ కెప్టెన్ హ్యారీ కేన్ పెనాల్టీ ద్వారా మూడో గోల్ సాధించి మెక్సికో ఆశలపై నీళ్లు చల్లారు. ఆ తర్వాత మెక్సికో మరో గోల్ చేసినప్పటికీ ఇంగ్లాండ్‌ను దాటలేకపోయింది.

రెండు దశాబ్దాల ప్రయాణం, ఆరు ప్రపంచకప్‌లు

ప్రపంచకప్ రేసు నుండి మెక్సికో జట్టు పూర్తిగా బయటకు వెళ్లడంతో ఆటగాళ్లంతా తీవ్ర నిరాశకు గురయ్యారు. మైదానంలోనే అందరి కళ్లలో నీళ్లు తిరిగాయి. ఈ భావోద్వేగ క్షణాల మధ్యే గిలెర్మో ఒచోవా అంతర్జాతీయ ఫుట్‌బాల్‌కు రిటైర్మెంట్ ఇస్తున్నట్లు కన్నీటి పర్యంతమవుతూ ప్రకటించారు. దాదాపు రెండు దశాబ్దాల (20 ఏళ్లు) పాటు ఆయన మెక్సికో జట్టుకు నమ్మకమైన గోల్‌కీపర్‌గా సేవలు అందించారు. తన కెరీర్‌లో ఏకంగా ఆరు ప్రపంచకప్‌లలో మెక్సికో దేశానికి ప్రాతినిధ్యం వహించి అత్యంత అరుదైన రికార్డును ఒచోవా తన పేరిట లిఖించుకున్నారు.

బ్రెజిల్ ఓటమితో షాకింగ్ నిర్ణయం తీసుకున్న నేమార్

మెక్సికో నిష్క్రమణకు ముందే ఫుట్‌బాల్ అభిమానులకు మరో పెద్ద షాక్ తగిలింది. నార్వేతో జరిగిన మ్యాచ్‌లో బ్రెజిల్ జట్టు ఘోర పరాజయాన్ని చవిచూసింది. ఈ ఓటమిని జీర్ణించుకోలేకపోయిన బ్రెజిల్ స్టార్ ఫుట్‌బాలర్ నేమార్ అంతర్జాతీయ ఫుట్‌బాల్‌కు గుడ్‌బై చెప్తున్నట్లు సంచలన ప్రకటన చేశారు. “నేను జట్టు గెలుపు కోసం శాయశక్తులా ప్రయత్నించాను, కానీ మేము ఓడిపోయాము. నేను ఇప్పుడు చాలా అలసిపోయాను. ఏ మైదానం నుంచి అయితే నా కెరీర్ ప్రయాణాన్ని ప్రారంభించానో, అదే మైదానంలో ముగింపు పలుకుతున్నాను” అంటూ నేమార్ భావోద్వేగ వ్యాఖ్యలు చేశారు.

రొనాల్డో ఫ్యాన్స్‌కు బ్యాడ్ న్యూస్?

ఈ స్టార్ ప్లేయర్ల రిటైర్మెంట్ వివాదం నడుస్తుండగానే, పోర్చుగల్ లెజెండ్ క్రిస్టియానో రొనాల్డో అభిమానుల్లో కూడా ఆందోళన మొదలైంది. రొనాల్డోకు ఇదే చివరి వరల్డ్ కప్ అని క్రీడా వర్గాలు భావిస్తున్నాయి. రౌండ్ ఆఫ్ 16 లో పోర్చుగల్ జట్టు బలమైన స్పెయిన్‌తో తలపడాల్సి ఉంది. ఈ మ్యాచ్‌లో పోర్చుగల్ గెలవడం చాలా కష్టమనే అంచనాలు ఉన్నాయి. కాగా ఈ ప్రపంచకప్ ముగిసిన వెంటనే రొనాల్డో అంతర్జాతీయ ఫుట్‌బాల్‌కు రిటైర్మెంట్ ప్రకటిస్తారని తన సోదరి ద్వారా తెలిసిందని కొన్ని అంతర్జాతీయ క్రీడా సంస్థలు వార్తలను ప్రచురించాయి. అయితే ఈ రూమర్లపై రొనాల్డో స్పందిస్తూ.. తాను ప్రస్తుతం రిటైర్మెంట్ గురించి అస్సలు ఆలోచించడం లేదని, ఈ మెగా టోర్నమెంట్ ముగిసిన తర్వాతే తన భవిష్యత్తు కెరీర్‌పై ఒక నిర్ణయానికి వస్తానని స్పష్టం చేశారు.

మరిన్ని క్రీడా వార్తల కోసం ఇక్కడ క్లిక్ చేయండి..