Year Ender 2023: వన్డేల్లో అత్యధిక పరుగులు చేసిన భారత బ్యాటర్లు వీరే.. లిస్టులో టాప్ ప్లేస్ ఎవరిదంటే?

Year Ender 2023: మరో వారంలో 2023వ (Year End 2023) సంవత్సరం ముగుస్తుంది. 2024ను సందడితో స్వాగతించేందుకు అందరూ సిద్ధమవుతున్నారు. అదే సమయంలో కొందరు 2023లో జరిగిన కొన్ని మధుర క్షణాలను నెమరువేసుకుంటున్నారు. అందులో క్రికెట్ అభిమానులు కూడా ఉన్నారు. స్వదేశంలో జరిగిన వన్డే ప్రపంచకప్‌లో ఫైనల్‌లో ఓడిపోవడం ఈ ఏడాది అత్యంత చేదు జ్ఞాపకంగా చెప్పుకోవచ్చు. అయితే, వరల్డ్ కప్ గెలవకపోయినా టీమిండియా బ్యాట్స్ మెన్ ఎన్నో వ్యక్తిగత రికార్డులను లిఖించారు. సీనియర్ ఆటగాళ్లు రోహిత్ శర్మ, విరాట్ కోహ్లితో పాటు శుభ్‌మన్ గిల్, ఇషాన్ కిషన్, యశస్వీ జైస్వాల్ వంటి యువకులు అంతర్జాతీయ క్రికెట్‌లో తమదైన ముద్ర వేశారు.

ఈ ఏడాది వన్డేల్లో అత్యధిక పరుగులు చేసిన టాప్ 3 ఆటగాళ్లు భారత క్రికెటర్లే​కావడం గమనార్హం. భారత ఓపెనింగ్ బ్యాట్స్‌మెన్ శుభ్‌మన్ గిల్‌కి ఈ ఏడాది చాలా ప్రత్యేకమైనది. ఈ ఏడాది గిల్ పరుగుల వర్షం కురిపించింది. వన్డే క్రికెట్‌లో అత్యధిక పరుగులు చేసిన విరాట్ కోహ్లీ, రోహిత్ శర్మలను అధిగమించాడు. గిల్ ఈ ఏడాది మొత్తం 29 మ్యాచ్‌లు ఆడి 1584 పరుగులు చేశాడు. ఇందులో 5 సెంచరీలు, 9 అర్ధసెంచరీలు ఉన్నాయి. 2023లో అత్యధిక పరుగులు చేసిన ప్రపంచ నంబర్ వన్ బ్యాట్స్‌మెన్‌గా గిల్ నిలిచాడు.

ఈ జాబితాలో భారత దిగ్గజం విరాట్ కోహ్లీ రెండో స్థానంలో ఉన్నాడు. ఈ ఏడాది 27 వన్డేల్లో కోహ్లీ 1377 పరుగులు చేశాడు. 6 సెంచరీలు, 8 అర్ధసెంచరీలతో కోహ్లీ ఈ ఏడాది వన్డేల్లో అత్యధిక పరుగులు చేసిన బ్యాట్స్‌మెన్‌గా నిలిచాడు.

ఈ జాబితాలో భారత కెప్టెన్ రోహిత్ శర్మ మూడో స్థానంలో ఉన్నాడు. రోహిత్ 27 వన్డేల్లో 1255 పరుగులు చేశాడు. ఈ ఏడాది 2 సెంచరీలు, 9 అర్ధసెంచరీలు చేశాడు. న్యూజిలాండ్ ఆటగాడు డెరెల్ మిచెల్ నాలుగో స్థానంలో ఉన్నాడు. 26 మ్యాచ్‌ల్లో 1204 పరుగులు చేశాడు. ఇందులో 5 సెంచరీలు, 3 అర్ధసెంచరీలు ఉన్నాయి.

శ్రీలంక ఆటగాడు పాతుమ్ నిశాంక ఐదో స్థానంలో ఉన్నాడు. 29 వన్డేల్లో 1151 పరుగులు చేశాడు. ఇందులో 2 సెంచరీలు, 9 అర్ధసెంచరీలు ఉన్నాయి. పాకిస్థాన్ స్టార్ బ్యాట్స్‌మెన్ బాబర్ అజామ్ ఆరో స్థానంలో ఉండగా, కేఎల్ రాహుల్ ఏడవ స్థానంలో, ఐడెన్ మార్క్రామ్ 8వ స్థానంలో, మహ్మద్ రిజ్వాన్ తొమ్మిదో స్థానంలో, విల్ యంగ్ పదో స్థానంలో ఉన్నారు.

మరిన్ని క్రీడా వార్తల కోసం ఇక్కడ క్లిక్ చేయండి..