Champions Trophy 2025: తొలి మ్యాచ్ కు ముందే ఇండియాకు భారీ షాక్! అనారోగ్యంతో బాధపడుతున్న జట్టు సారధి!

ఛాంపియన్స్ ట్రోఫీ 2025లో భాగంగా భారత్ తన తొలి గ్రూప్ A మ్యాచ్‌లో బంగ్లాదేశ్‌ను ఎదుర్కోనున్న నేపథ్యంలో, భారత కెప్టెన్ రోహిత్ శర్మ మ్యాచ్‌కు ముందు జరిగిన విలేకరుల సమావేశంలో మీడియాతో మాట్లాడాడు. అయితే, ఈ సందర్భంగా అతను కెమెరా ముందు చాలాసార్లు దగ్గుతూ అస్వస్థతకు గురయ్యాడు. అయినప్పటికీ, రోహిత్ ప్రశాంతంగా ప్రశ్నలకు సమాధానమిచ్చాడు. విలేకరుల సమావేశం మధ్యలో స్థానిక ఆర్గనైజింగ్ కమిటీ సభ్యుడు అతనికి నీటిని అందించగా, “నేను బాగున్నాను” అంటూ తిరస్కరించాడు. అయితే, రోహిత్ పూర్తి ఫిట్‌నెస్‌లో ఉన్నాడా? బంగ్లాదేశ్‌తో మ్యాచ్ ఆడతాడా? అనే అంశంపై అభిమానులు ఆందోళన వ్యక్తం చేస్తున్నారు.

ఈ సమావేశం దుబాయ్‌లోని ఇంటర్నేషనల్ క్రికెట్ స్టేడియంలో జరిగింది. భారత్ ఈ టోర్నమెంట్‌లో తమ అన్ని మ్యాచ్‌లను ఇక్కడే ఆడనుండగా, ఫిబ్రవరి 23న చిరకాల ప్రత్యర్థి పాకిస్థాన్‌తో తలపడనుంది. ఈ సెషన్‌లో భారత జట్టుతో సంబంధిత పలు కీలక అంశాలు చర్చించబడ్డాయి. ముఖ్యంగా, 5 గురు స్పిన్-బౌలింగ్ ఎంపికలను జట్టులో చేర్చడాన్ని రోహిత్ ఒక పరిమితిగా చూడడం లేదని స్పష్టం చేశాడు. “మాకు ఇద్దరు స్పిన్నర్లు, ముగ్గురు ఆల్‌రౌండర్లు ఉన్నారు. నేను వారిని ఐదుగురు స్పిన్నర్లుగా చూడటం లేదు. జడేజా, అక్షర్, వాషింగ్టన్ బ్యాటింగ్‌లో మాకు లోతునిస్తారు” అని రోహిత్ వివరించాడు.

దుబాయ్ క్రికెట్ పిచ్ పరిస్థితుల గురించి మాట్లాడుతూ, అతను వీలైనంత త్వరగా పిచ్‌ను అంచనా వేసుకోవడం ముఖ్యం అని నొక్కి చెప్పాడు. “గతంలో మనం ఇక్కడ చాలా క్రికెట్ ఆడాము. మనం వీలైనంత త్వరగా అలవాటు చేసుకోవాలి. పరిస్థితిని బట్టి మన ఆటతీరు మార్చుకోవాలి” అని రోహిత్ వ్యాఖ్యానించాడు. అంతేకాకుండా, అంతర్జాతీయ క్రికెట్ షెడ్యూల్ నిండిపోవడంతో గాయాలు తథ్యమని, కానీ జట్టులోని అనుభవజ్ఞులైన ఆటగాళ్లు ఎల్లప్పుడూ అందుబాటులో ఉంటారని విశ్వాసం వ్యక్తం చేశాడు.

ఈ టోర్నమెంట్ రోహిత్ శర్మ, విరాట్ కోహ్లీ వంటి సీనియర్ ఆటగాళ్లకు చివరిసారిగా ఐసిసి ట్రోఫీ గెలుచుకునే అవకాశం కావడంతో, వారి ప్రదర్శనపై అందరి దృష్టి ఉంది. ఛాంపియన్స్ ట్రోఫీకి ముందు భారత జట్టు పరిమిత అంతర్జాతీయ మ్యాచ్‌లు ఆడినా, ఇంగ్లాండ్ సిరీస్ ద్వారా తాము చాలా ప్రణాళికలను అమలు చేశామని రోహిత్ వెల్లడించాడు. “మేము ప్రపంచ కప్‌లో ఆపిన చోటు నుంచి ఇంగ్లాండ్ సిరీస్‌లో ముందుకు వెళ్లి, ఇప్పుడు ఛాంపియన్స్ ట్రోఫీలో కూడా అదే చేసేందుకు ప్రయత్నిస్తున్నాం” అని చెప్పాడు.

దుబాయ్ వాతావరణంలో మంచు ప్రభావం ఉంటుందా అనే అంశంపై రోహిత్ స్పందిస్తూ, అది అనూహ్యమని, దీనిపై ఎక్కువ ఆలోచించలేమని చెప్పాడు.

తన ఆరోగ్యంపై ఆందోళనలు ఉన్నప్పటికీ, రోహిత్ శర్మ భారత జట్టు విజయంపై దృష్టి సారించినట్లు తెలుస్తోంది. ముఖ్యంగా, అభిమానులంతా ఆసక్తిగా ఎదురు చూస్తున్న భారత్-పాకిస్తాన్ హై-వోల్టేజ్ మ్యాచ్ కొన్ని రోజుల దూరంలోనే ఉంది.

Break🚨 Rohit Sharma mild Cough will be checked up by Medical Team Tomorrow morning according to UAE time and then final call will be taken whether he is fit to play or not as of now he will

— @imsajal (@sajalsinha4) February 19, 2025

మరిన్ని క్రీడా వార్తల కోసం ఇక్కడ క్లిక్ చేయండి..