IPL 2025: 8 మ్యాచ్ల్లో 5 ఓటములు.. అయినా, కేకేఆర్ ప్లే ఆఫ్స్ చేరే ఛాన్స్?
Kolkata Knight Riders Playoffs Qualification Scenario: కోల్కతా నైట్రైడర్స్ ఐపీఎల్ 2025 ప్లేఆఫ్స్కు అర్హత సాధించాలంటే మిగిలిన మ్యాచ్లలో అద్భుతమైన ప్రదర్శన కనబర్చాలి. కనీసం 5 విజయాలు సాధించడంతో పాటు తమ నెట్ రన్ రేట్ను కూడా మెరుగుపరచుకోవాలి. ఇతర జట్ల ఫలితాలు కూడా కేకేఆర్ ప్లేఆఫ్స్ అవకాశాలను ప్రభావితం చేస్తాయి. అయితే, కేకేఆర్ జట్టులో ప్రతిభావంతులైన ఆటగాళ్లు ఉన్నారు. వీళ్లంతా కలిసి కట్టుగా రాణిస్తేనే, కేకేఆర్ ప్లేఆఫ్స్ ఖాయమవుతాయి.
Updated on: Apr 22, 2025 | 8:49 AM
KKR Playoffs Qualification Scenario: గుజరాత్ టైటాన్స్ (GT) నిన్న అంటే ఏప్రిల్ 21న జరిగిన మ్యాచ్లో కోల్కతా నైట్రైడర్స్ (KKR) ను 39 పరుగుల తేడాతో ఓడించింది. ఈ మ్యాచ్లో గుజరాత్ కెప్టెన్ శుభమాన్ గిల్ అద్భుతమైన బ్యాటింగ్తో 90 పరుగులు చేయగా, సాయి సుదర్శన్ అతనికి చక్కటి సహకారం అందిస్తూ 52 పరుగులు చేశాడు. వీరిద్దరూ కలిసి మొదటి వికెట్కు 114 పరుగుల భాగస్వామ్యం నెలకొల్పారు. దీంతో గుజరాత్ టైటాన్స్ నిర్ణీత 20 ఓవర్లలో 3 వికెట్లు కోల్పోయి 198 పరుగులు చేసింది.
అనంతరం బ్యాటింగ్కు దిగిన కోల్కతా నైట్రైడర్స్ 198 పరుగుల లక్ష్యాన్ని ఛేదించడంలో విఫలమైంది. కోల్కతా జట్టు 20 ఓవర్లలో 8 వికెట్లు కోల్పోయి కేవలం 159 పరుగులు మాత్రమే చేయగలిగింది. కేకేఆర్ కెప్టెన్ అజింక్యా రహానే ఒంటరి పోరాటంతో 50 పరుగులు చేసినా.. ఇతర బ్యాటర్ల నుంచి సరైన సహకారం లభించలేదు. గుజరాత్ టైటాన్స్ బౌలర్లు సమష్టిగా రాణించడంతో.. కేకేఆర్ వరుసగా వికెట్లు కోల్పోతూ విజయానికి దూరమైంది. ముఖ్యంగా ప్రసిద్ధ్ కృష్ణ, రషీద్ ఖాన్ ఇద్దరూ చెరో రెండు వికెట్లు తీసి కేకేఆర్ బ్యాటింగ్ను కట్టడి చేశారు. గుజరాత్ టైటాన్స్ ఓపెనింగ్ బ్యాటర్ల భాగస్వామ్యం, పొదుపైన బౌలింగ్తో గుజరాత్ విజయం సొంతం చేసుకుంది.
ఈ ఓటమి కోల్కతా నైట్రైడర్స్ జట్టుకు చాలా ఖరీదుగా మారింది. ఇప్పటికే టోర్నమెంట్లో సగం మ్యాచ్లు ముగిసిన సంగతి తెలిసిందే. ప్లేఆఫ్స్ రేసులో నిలవాలంటే కేకేఆర్ మిగిలిన మ్యాచ్లలో తప్పక గెలవాల్సిన పరిస్థితి నెలకొంది. సొంత గడ్డపై జరిగిన ఈ మ్యాచ్లో ఓటమి పాలవడం కేకేఆర్ అభిమానులను నిరాశకు గురిచేసింది.
ప్రస్తుత పాయింట్ల పట్టికలో కేకేఆర్ స్థానం..
తాజా ఓటమితో కోల్కతా నైట్రైడర్స్ ప్రస్తుతం పాయింట్ల పట్టికలో 7వ స్థానంలో ఉంది. కేేకఆర్ ఇప్పటివరకు ఆడిన 8 మ్యాచ్లలో 3 విజయాలు, 5 ఓటములతో 6 పాయింట్లు సాధించింది. మరోవైపు గుజరాత్ టైటాన్స్ 8 మ్యాచ్ల్లో 6 విజయాలతో 12 పాయింట్లు సాధించి పట్టికలో అగ్రస్థానంలో కొనసాగుతోంది.
పాయింట్ల పట్టికను పరిశీలిస్తే, ఢిల్లీ క్యాపిటల్స్, రాయల్ ఛాలెంజర్స్ బెంగళూరు, పంజాబ్ కింగ్స్, లక్నో సూపర్ జెయింట్స్ వంటి జట్లు 10 పాయింట్లతో కేకేఆర్ కంటే ముందున్నాయి. ముంబై ఇండియన్స్ కూడా 8 పాయింట్లతో కేకేఆర్ కంటే కొంచెం మెరుగైన స్థానంలో ఉంది. రాజస్థాన్ రాయల్స్, సన్రైజర్స్ హైదరాబాద్, చెన్నై సూపర్ కింగ్స్ వంటి జట్లు కూడా కేకేఆర్తో పోటీ పడుతున్నప్పటికీ, ఆ జట్ల స్థానాలు కూడా అంత ఆశాజనకంగా లేవు. ఈ గణాంకాలను బట్టి చూస్తే, ప్లేఆఫ్స్ రేసు చాలా హోరాహోరీగా సాగుతోంది. ప్రతి జట్టు తమ స్థానాన్ని పదిలపరుచుకోవడానికి తీవ్రంగా ప్రయత్నిస్తోంది.
IPL 2025 పాయింట్ల పట్టిక (ఏప్రిల్ 21, 2025 నాటికి)
| స్థానం | జట్టు | ఆడినవి | గెలిచినవి | ఓడినవి | ఫలితం తేలనివి | నెట్ రన్ రేట్ | పాయింట్లు | చివరి మ్యాచ్ ఫలితాలు |
|---|---|---|---|---|---|---|---|---|
| 1 | గుజరాత్ టైటాన్స్ (GT) | 8 | 6 | 2 | 0 | +1.104 | 12 | గెలుపు, గెలుపు, ఓటమి, గెలుపు, గెలుపు |
| 2 | ఢిల్లీ క్యాపిటల్స్ (DC) | 7 | 5 | 2 | 0 | +0.589 | 10 | ఓ, గె, ఓ, గె, గె |
| 3 | రాయల్ ఛాలెంజర్స్ బెంగళూరు (RCB) | 8 | 5 | 3 | 0 | +0.472 | 10 | గె, ఓ, గె, ఓ, గె |
| 4 | పంజాబ్ కింగ్స్ (PBKS) | 8 | 5 | 3 | 0 | +0.177 | 10 | ఓ, గె, గె, ఓ, గె |
| 5 | లక్నో సూపర్ జెయింట్స్ (LSG) | 8 | 5 | 3 | 0 | +0.088 | 10 | గె, ఓ, గె, గె, గె |
| 6 | ముంబై ఇండియన్స్ (MI) | 8 | 4 | 4 | 0 | +0.483 | 8 | గె, గె, గె, ఓ, ఓ |
| 7 | కోల్కతా నైట్రైడర్స్ (KKR) | 8 | 3 | 5 | 0 | +0.212 | 6 | ఓ, ఓ, గె, ఓ, గె |
| 8 | రాజస్థాన్ రాయల్స్ (RR) | 8 | 2 | 6 | 0 | -0.633 | 4 | ఓ, ఓ, ఓ, ఓ, గె |
| 9 | సన్రైజర్స్ హైదరాబాద్ (SRH) | 7 | 2 | 5 | 0 | -1.217 | 4 | గె, ఓ, ఓ, ఓ, ఓ |
| 10 | చెన్నై సూపర్ కింగ్స్ (CSK) | 8 | 2 | 6 | 0 | -1.392 | 4 | ఓ, గె, ఓ, ఓ, ఓ |
కేకేఆర్ మిగిలిన మ్యాచ్ల షెడ్యూల్..
కోల్కతా నైట్రైడర్స్ ఇంకా ఆరు మ్యాచ్లు ఆడాల్సి ఉంది. ఈ మ్యాచ్లు వారి ప్లేఆఫ్స్ అవకాశాలను నిర్ణయిస్తాయి. ఆ మ్యాచ్ల వివరాలు..
పంజాబ్ కింగ్స్తో (హోమ్) – ఏప్రిల్ 26
ఢిల్లీ క్యాపిటల్స్తో (అవే) – ఏప్రిల్ 29
రాజస్థాన్ రాయల్స్తో (హోమ్) – మే 4
చెన్నై సూపర్ కింగ్స్తో (హోమ్) – మే 7
సన్రైజర్స్ హైదరాబాద్తో (అవే) – మే 10
రాయల్ ఛాలెంజర్స్ బెంగళూరుతో (అవే) – మే 17
ఈ మ్యాచ్లన్నీ కేకేఆర్కు చాలా కీలకం. ప్రతి మ్యాచ్లో విజయం సాధించడం ద్వారానే కోల్కతా ప్లేఆఫ్స్ రేసులో నిలవగలదు. ప్రత్యర్థుల బలాబలాలను బట్టి కేకేఆర్ తమ వ్యూహాలను మార్చుకోవాల్సిన అవసరం ఉంది. సొంత గడ్డపై జరిగే మ్యాచ్లు కేకేఆర్కు కొంత అనుకూలంగా ఉండవచ్చు. అయితే, అవే మ్యాచ్లలో కూడా గెలవడం చాలా ముఖ్యం.
కేకేఆర్ ప్లేఆఫ్స్ అవకాశాలు:
కోల్కతా నైట్రైడర్స్ ప్లేఆఫ్స్కు అర్హత సాధించాలంటే మిగిలిన ఆరు మ్యాచ్లలో తప్పక గెలవాల్సిందే. సాధారణంగా, ప్లేఆఫ్స్కు అర్హత సాధించడానికి ఒక జట్టుకు కనీసం 16 పాయింట్లు (8 విజయాలు) అవసరం. కేకేఆర్ ఇప్పటికే 8 మ్యాచ్లలో 3 విజయాలు సాధించింది. ఈ ప్రకారం మిగిలిన 6 మ్యాచ్లలో కనీసం 5 మ్యాచ్లు గెలవాల్సి ఉంటుంది. ఒకవేళ కేకేఆర్ 4 మ్యాచ్లు గెలిస్తే, అవకాశాలు గణనీయంగా తగ్గిపోతాయి. అయితే, కొద్దిగా అవకాశం కూడా ఉంటుంది. అది ఇతర జట్ల ఫలితాలపై ఆధారపడి ఉంటుంది. కానీ, కేకేఆర్ తమ తదుపరి ఆరు మ్యాచ్లలో అన్నింటినీ గెలిస్తే, నిస్సందేహంగా ప్లేఆఫ్స్లో తమ స్థానాన్ని ఖాయం చేసుకుంటుంది.
కేకేఆర్ ప్లేఆఫ్స్ అవకాశాలు కేవలం ఆ జట్టు ప్రదర్శనపై మాత్రమే ఆధారపడి ఉండవు. పాయింట్ల పట్టికలో ముందున్న ఢిల్లీ క్యాపిటల్స్, రాయల్ ఛాలెంజర్స్ బెంగళూరు, పంజాబ్ కింగ్స్, లక్నో సూపర్ జెయింట్స్ వంటి జట్లు తమ మిగిలిన మ్యాచ్లలో ఎలా రాణిస్తాయనే దానిపై కూడా ఆధారపడి ఉంటుంది. ఈ జట్లు కొన్ని మ్యాచ్లలో ఓడిపోతే, కేకేఆర్కు ప్లేఆఫ్స్కు చేరుకునే అవకాశం పెరుగుతుంది. అలాగే, ముంబై ఇండియన్స్ వంటి ఇతర జట్లు కూడా తక్కువ మ్యాచ్లు గెలిస్తే కేకేఆర్కు లాభం చేకూరుతుంది.
పాయింట్లు సమానంగా ఉన్న సందర్భంలో నెట్ రన్ రేట్ చాలా కీలకపాత్ర పోషిస్తుంది. కాబట్టి, కేకేఆర్ తమ మ్యాచ్లను గెలవడంతో పాటు, వీలైనంత ఎక్కువ పరుగుల తేడాతో గెలవడానికి ప్రయత్నించాలి. భారీ విజయాలు కేకేఆర్ నెట్ రన్ రేట్ను మెరుగుపరుస్తాయి. తద్వారా ఇతర జట్లతో పాయింట్లు సమానమైనా కేకేఆర్ జట్టుకు అర్హత సాధించే అవకాశం ఉంటుంది.
మరిన్ని ఐపీఎల్ వార్తల కోసం ఇక్కడ క్లిక్ చేయండి..
