ICC T20 World Cup : క్రికెట్లో చరిత్ర సృష్టించిన జపాన్.. క్వాలిఫయర్‌లో కువైట్‎ను చిత్తు చేసి ఏకంగా సూపర్ సిక్స్‌కు అర్హత

ICC T20 World Cup : టీ20 క్రికెట్‌లో పెద్దగా పేరు లేని జపాన్ జట్టు ఒక అద్భుతమైన విజయాన్ని నమోదు చేసింది. ఒమన్ వేదికగా జరిగిన ఐసీసీ టీ20 వరల్డ్ కప్ ఈస్ట్ ఆసియా పసిఫిక్ క్వాలిఫయర్స్లో భాగంగా గురువారం జరిగిన మ్యాచ్‌లో జపాన్ జట్టు కువైట్‌ను ఐదు వికెట్ల తేడాతో ఓడించి సంచలనం సృష్టించింది. ఈ చారిత్రక విజయంతో జపాన్ జట్టు సూపర్ సిక్స్ దశకు అర్హత సాధించింది.

ఐసీసీ టీ20 వరల్డ్ కప్ ఆసియా అండ్ ఈస్ట్ ఆసియా పసిఫిక్ క్వాలిఫయర్ 2025 టోర్నమెంట్‌లో భాగంగా అల్ అమెరాత్ క్రికెట్ గ్రౌండ్‌లో జరిగిన మ్యాచ్‌లో జపాన్ జట్టు, కువైట్‌పై ఐదు వికెట్ల తేడాతో చారిత్రక విజయాన్ని సాధించింది. ఈ విజయంతో జపాన్, అంతకుముందు నెగ్గిన నేపాల్ జట్లు ఒక మ్యాచ్ మిగిలి ఉండగానే టోర్నమెంట్‌లో కీలకమైన సూపర్ సిక్స్ దశకు అర్హత సాధించాయి. మరోవైపు, తమ తొలి మ్యాచ్‌లో నేపాల్ చేతిలో 58 పరుగుల తేడాతో ఓటమి పాలైన కువైట్, ఈ ఓటమితో టోర్నమెంట్ నుంచి నిష్క్రమించింది.

మొదట బ్యాటింగ్ చేసిన కువైట్ జట్టు నిర్ణీత 20 ఓవర్లలో 6 వికెట్ల నష్టానికి 177 పరుగులు చేసింది. కువైట్ బ్యాటర్లలో అలీ జహీర్ 31 బంతుల్లో 41 పరుగులు చేసి టాప్ స్కోరర్‌గా నిలిచాడు. అతనికి యాసిన్ పటేల్ (40), క్లింటో అంటో (34), మీట్ భావ్‌సర్ (29) గట్టి సపోర్ట్ ఇచ్చారు. అయితే, ఇతర కువైట్ బ్యాటర్లు సింగిల్ డిజిట్స్ దాటలేకపోయారు. జపాన్ బౌలర్లలో డెక్లాన్ సుజుకి-మెక్‌కాంబ్ అత్యంత ప్రభావవంతంగా బౌలింగ్ చేసి 3 వికెట్లు (3-22) పడగొట్టాడు. ఎస్. రవిచంద్రన్ రెండు వికెట్లు, అబ్దుల్ సమద్ ఒక వికెట్ తీసుకున్నారు.

178 పరుగుల లక్ష్యంతో బరిలోకి దిగిన జపాన్ జట్టు అద్భుతంగా ఆడింది. ముఖ్యంగా ఈసామ్ రెహమాన్ విధ్వంసకర ఇన్నింగ్స్‌తో జట్టును విజయతీరాలకు చేర్చాడు. రెహమాన్ కేవలం 39 బంతుల్లో 9 ఫోర్లు, 2 సిక్సర్లతో 64 పరుగులు చేసి జట్టు విజయంలో కీలక పాత్ర పోషించాడు. ఓపెనర్ కెండల్ ఫ్లెమింగ్ 19 బంతుల్లో 28 పరుగులు చేయగా, ఎస్. రవిచంద్రన్ (39), ఇబ్రహీం తకహషి (15 బంతుల్లో 26 పరుగులు) తమ వంతు సహకారం అందించారు. చివరికి జపాన్ జట్టు 19.3 ఓవర్లలో 5 వికెట్లు కోల్పోయి 178 పరుగులు చేసి విజయాన్ని అందుకుంది. కువైట్ బౌలర్లలో మహమ్మద్ ఆఖిఫ్ ఫరూఖ్, యాసిన్ పటేల్, షిరాజ్ ఖాన్ తలో ఒక వికెట్ తీశారు.

🚨 Historic win for Japan Cricket! ❤️ 🇯🇵

Japan beat Kuwait by 5 wickets in the T20 World Cup Asia & EAP Qualifiers 2025.

Kuwait – 177/6 (20 overs)Japan – 178/5 (19.3 overs) pic.twitter.com/zxHL4THNkX

— ICC Asia Cricket (@ICCAsiaCricket) October 9, 2025

ఈ విజయంతో సూపర్ సిక్స్‌లోకి అడుగుపెట్టిన జపాన్ జట్టు, తమ గ్రూప్ స్టేజ్‌లో చివరి మ్యాచ్‌లో శుక్రవారం నేపాల్‌తో తలపడనుంది. కాగా, ఇదే క్వాలిఫయర్‌లో జరిగిన మరో మ్యాచ్‌లో యూఏఈ జట్టు ఖతార్‌ను ఏడు వికెట్ల తేడాతో ఓడించి సునాయాసంగా విజయాన్ని నమోదు చేసింది.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..