IPL 2025: KKR మిస్టరీ స్పిన్నర్ కు భారీ షాక్ ఇచ్చిన BCCI! ఆ ఒక్క పనితో చావు దెబ్బ తీసిందిగా!
CSKతో జరిగిన మ్యాచ్‌లో అవుట్ అయిన బ్రెవిస్‌కు వీడ్కోలు సంజ్ఞ ఇచ్చిన వరుణ్ చక్రవర్తికి BCCI భారీ జరిమానా విధించింది. ఆయన లెవల్ 1 నేరాన్ని అంగీకరించి మ్యాచ్ ఫీజులో 25% కోత, ఒక డీమెరిట్ పాయింట్ ఎదుర్కొన్నారు. మ్యాచ్‌లో బాగా ఆడినప్పటికీ, KKR జట్టు ఓటమి చెందింది. ప్లేఆఫ్ ఆశలు నిలబెట్టుకోవాలంటే రాబోయే మ్యాచ్‌లు అత్యంత కీలకంగా మారాయి.
Narsimha |
Updated on: May 08, 2025 | 7:16 PM
ఐపీఎల్ 2025 సీజన్‌లో కోల్‌కతా నైట్ రైడర్స్ (KKR) జట్టు స్పిన్నర్ వరుణ్ చక్రవర్తికి అనుచిత ప్రవర్తన కారణంగా భారీ శిక్ష విధించబడింది. చెన్నై సూపర్ కింగ్స్ (CSK)తో బుధవారం ఈడెన్ గార్డెన్స్‌లో జరిగిన మ్యాచ్ సందర్భంగా వరుణ్ చక్రవర్తి ప్రవర్తనా నియమావళిని ఉల్లంఘించినట్లు తేలింది. మ్యాచ్ రెండో ఇన్నింగ్స్‌లో వరుణ్, CSK మిడిల్ ఆర్డర్ బ్యాటర్ డెవాల్డ్ బ్రెవిస్‌ను అవుట్ చేసిన తరువాత అతనికి వీడ్కోలు సూచించే విధంగా సంజ్ఞ ఇచ్చాడు. ఇది ప్రత్యర్థి ఆటగాడిని రెచ్చగొట్టే చర్యగా పరిగణించబడింది. IPL ప్రవర్తనా నియమావళిలోని ఆర్టికల్ 2.5 ప్రకారం, అవుట్ అయిన ఆటగాడిని ఉద్దేశించి ఏవైనా దూకుడు భాషలు, సంజ్ఞలు వినియోగించడం నిషిద్ధం. ఈ ఉల్లంఘనకు సంబంధించి వరుణ్ తన తప్పును అంగీకరించి లెవల్ 1 నేరాన్ని ఒప్పుకున్నాడు. అందువల్ల అతనిపై మ్యాచ్ ఫీజులో 25 శాతం జరిమానా విధించడంతో పాటు ఒక డీమెరిట్ పాయింట్ కూడా జత చేశారు.
ఈ మ్యాచ్‌లో వరుణ్ తన నాలుగు ఓవర్లలో కేవలం 18 పరుగులు ఇచ్చి 2 కీలక వికెట్లు తీసి అద్భుత ప్రదర్శన చేశాడు. అయినప్పటికీ, KKR జట్టు 179 పరుగుల లక్ష్యాన్ని రక్షించలేకపోయింది. బ్రెవిస్ 25 బంతుల్లో 52 పరుగులు చేస్తూ దూకుడు ప్రదర్శించగా, ఉర్విల్ పటేల్ 11 బంతుల్లో 31, శివమ్ దూబే 40 బంతుల్లో 45 పరుగులు చేసి విజయంలో కీలక పాత్ర పోషించారు. చివరి ఓవర్లో దిగిన మహేంద్ర సింగ్ ధోని ఒక బారీ సిక్సర్‌తో చెన్నై విజయం సాధించేందుకు ముగింపు పలికాడు. ఈ ఓటమితో కోల్‌కతా జట్టు పాయింట్ల పట్టికలో 12 మ్యాచ్‌ల్లో 11 పాయింట్లతో ఆరో స్థానంలో నిలిచింది. ప్లేఆఫ్ అవకాశాలు తగ్గిపోతున్న నేపథ్యంలో, వచ్చే మ్యాచ్‌లు జట్టుకు అత్యంత కీలకం కానున్నాయి. మే 10న సన్‌రైజర్స్ హైదరాబాద్ (SRH)తో, మే 17న రాయల్ ఛాలెంజర్స్ బెంగళూరు (RCB)తో తలపడనుంది. ఈ రెండు మ్యాచుల్లో విజయాలు సాధిస్తేనే ప్లేఆఫ్ ఆశలను బతికించుకునే అవకాశం KKRకు ఉంటుంది.
వరుణ్ చక్రవర్తికి విధించిన జరిమానా, ఇప్పటికీ ఐపీఎల్‌లో ఆటగాళ్లు ప్రవర్తనా నియమాలను ఎంత కఠినంగా పాటించాల్సిన అవసరం ఉందో చూపిస్తుంది. ప్రతీ ఆటగాడి చర్యలు కేవలం మ్యాచ్ ఫలితానికే కాకుండా, జట్టు మానసిక స్థితికి, అభిమానుల అభిప్రాయానికి కూడా ప్రభావం చూపుతాయి. వరుణ్ లాంటి అనుభవజ్ఞుడైన ఆటగాడు ఈ సంఘటనకు ఒప్పుకొని తన తప్పును అంగీకరించడం, అతని వృత్తిపరమైన నిబద్ధతను ప్రతిబింబిస్తుంది. అయితే, ఇలాంటి దృశ్యాలు మళ్లీ రాకుండా జాగ్రత్తలు తీసుకోవడం మిగతా ఆటగాళ్లకు కూడా అవసరం. ఐపీఎల్ వేదికపై ఎప్పుడూ క్రీడాస్ఫూర్తి మెరుగ్గా నిలవాలంటే, ఆటగాళ్ల ప్రవర్తనను పటిష్ఠంగా నియంత్రించాల్సిన అవసరం ఉంది.
మరిన్ని క్రికెట్ వార్తల కోసం ఇక్కడ క్లిక్ చేయండి..
