IND vs PAK: ‘ఇకపై భారత్, పాక్ మ్యాచ్లుండవ్.. ఏ ఐసీసీ టోర్నమెంట్లోనూ ఆడేదిలే’
India vs Pakistan: ఏప్రిల్ 22న జమ్మూ కాశ్మీర్లోని పహల్గామ్లో జరిగిన ఉగ్రవాద దాడిలో దాదాపు 26 మంది ప్రాణాలు కోల్పోయారు. ఈ దాడిపై దేశవ్యాప్తంగా నిరసనలు వ్యక్తమవుతున్నాయి. దీంతో పాటు, బీసీసీఐ కూడా కఠినమైన వైఖరితో ముందుకు వెళ్లాలని, ఇకపై ఏ టోర్నమెంట్లోనూ పాకిస్థాన్తో మ్యాచ్ ఆడకూడదనే డిమాండ్లు మరోసారి తెరపైకి వచ్చాయి.
Updated on: Apr 25, 2025 | 11:12 AM
Pahalgam Terror Attack: జమ్మూ కాశ్మీర్లోని పహల్గామ్లో జరిగిన ఉగ్రవాద దాడి తర్వాత, పాకిస్తాన్పై చర్య తీసుకోవాలనే డిమాండ్ ఊపందుకుంది. ఇటువంటి పరిస్థితిలో, పాకిస్తాన్తో క్రికెట్ ఆడకూడదని బీసీసీఐ నుంచి డిమాండ్ ఉంది. ఐసీసీ టోర్నమెంట్లలో భారత్ వర్సెస్ పాకిస్తాన్లను ఒకే గ్రూపులో ఉంచవద్దని భారత క్రికెట్ నియంత్రణ మండలి (బీసీసీఐ) అంతర్జాతీయ క్రికెట్ కౌన్సిల్ (ఐసీసీ)ని అభ్యర్థించినట్లు ఊహాగానాలు వస్తున్నాయి. అయితే, ఈ వార్తల్లో ప్రస్తుతానికి ఎటువంటి నిజం లేదని క్రిక్బజ్ నివేదిక పేర్కొంది.
మహిళల ప్రపంచ కప్ ప్రభావితం కావొచ్చు..
భారత్, పాకిస్తాన్ మధ్య మ్యాచ్లు జరగకపోతే, దాని మొదటి ప్రభావం సెప్టెంబర్-అక్టోబర్లో భారతదేశంలో జరగనున్న మహిళల వన్డే ప్రపంచ కప్పై ఉంటుంది. పాకిస్తాన్ ఇటీవలే దీనికి అర్హత సాధించిన సంగతి తెలిసిందే. ఈ ఎనిమిది జట్లు పాల్గొనే టోర్నమెంట్ రౌండ్-రాబిన్ ఫార్మాట్లో జరుగుతుంది. ఇందులో ఎటువంటి గ్రూపింగ్ ఉండదు. ఇటువంటి పరిస్థితిలో, ప్రతి జట్టు మిగతా అన్ని జట్లతో ఒక్కో మ్యాచ్ ఆడవలసి ఉంటుంది.
మహిళల వన్డే ప్రపంచ కప్లో పాకిస్తాన్ మ్యాచ్లన్నీ శ్రీలంకలోనే జరుగుతాయి. అయితే భారత్ వర్సెస్ పాకిస్తాన్ మధ్య మ్యాచ్లు జరుగుతాయో లేదో అనే సందేహం ఉంది. ఈ టోర్నమెంట్లో భారత్, పాకిస్తాన్లతో పాటు, ఆస్ట్రేలియా, ఇంగ్లాండ్, న్యూజిలాండ్, దక్షిణాఫ్రికా, శ్రీలంక, బంగ్లాదేశ్ జట్లు పాల్గొంటున్నాయి. మహిళల ప్రపంచ కప్నకు ముందు పురుషుల ఆసియా కప్ ఉంది. ఆసియా కప్కు కూడా బీసీసీఐ ఆతిథ్యం ఇస్తుంది. ఇప్పుడు ఈ టోర్నమెంట్ నిర్వహణ గురించి కూడా ప్రశ్నలు తలెత్తుతున్నాయి.
ప్రభుత్వ వైఖరి వైపే బీసీసీఐ చూపు..
జమ్మూ కాశ్మీర్లోని పహల్గామ్లో జరిగిన ఉగ్రవాద దాడి తర్వాత దేశవ్యాప్తంగా ఆగ్రహ వాతావరణం నెలకొంది. రెండు దేశాల మధ్య ద్వైపాక్షిక క్రికెట్ సిరీస్లు లేవని, భవిష్యత్తులో కూడా ఇదే పరిస్థితి కొనసాగుతుందని భారత క్రికెట్ నియంత్రణ బోర్డు ఇప్పటికే స్పష్టం చేసింది. “బోర్డు కూడా బాధితులకు అండగా నిలుస్తుంది. ఈ దాడిని తీవ్రంగా ఖండిస్తుంది. ప్రభుత్వ వైఖరి ఇలాగే ఉన్నంత వరకు, మేం పాకిస్తాన్తో ద్వైపాక్షిక క్రికెట్ ఆడం. మేం ఐసీసీ టోర్నమెంట్లలో పాల్గొంటాం. ఎందుకంటే ఇది ప్రత్యేక అంతర్జాతీయ ఒప్పందంలో భాగం” అని బీసీసీఐ ఉపాధ్యక్షుడు రాజీవ్ శుక్లా అన్నారు.
విచారం వ్యక్తం చేసిన బీసీసీఐ కార్యదర్శి దేవ్జిత్ సైకియా..
పహల్గామ్ దాడితో అందరూ షాక్కు గురయ్యారని, బాధపడ్డారని బీసీసీఐ కార్యదర్శి దేవ్జిత్ సైకియా అన్నారు. ఇది పిరికి చర్య, మేం దీనిని తీవ్రంగా ఖండిస్తున్నాం. దుఃఖంలో ఉన్న కుటుంబాలకు తోడుగా నిలుస్తాం. చనిపోయిన వారి ఆత్మలకు శాంతి చేకూరాలని ప్రార్థిస్తున్నాం అంటూ చెప్పుకొచ్చాడు. ఐపీఎల్ 41వ మ్యాచ్ సందర్భంగా రాజీవ్ గాంధీ అంతర్జాతీయ స్టేడియంలో దాడిలో మరణించిన 26 మంది పౌరులకు నివాళులర్పించేందుకు 60 సెకన్ల పాటు మౌనం పాటించిన సంగతి తెలిసిందే. టాస్ సమయంలో ఇరు జట్ల కెప్టెన్లు బాధితులకు సంతాపం తెలిపారు. ఆటగాళ్లందరూ, అంపైర్లు, వ్యాఖ్యాతలు నల్ల బ్యాండ్లు ధరించి మైదానంలోకి ప్రవేశించారు. మ్యాచ్ సమయంలో సంగీతం, డీజే, చీర్ లీడర్లు లేదా బాణసంచా ప్రదర్శనలు లేవు. జాతీయ సంతాపం, గౌరవాన్ని ప్రదర్శించడానికి బీసీసీఐ ఈ నిర్ణయం తీసుకుంది.
మరిన్ని క్రీడా వార్తల కోసం ఇక్కడ క్లిక్ చేయండి..
