భారతీయ పౌరులకు గుడ్న్యూస్.. కీలక నిర్ణయం తీసుకున్న UAE ప్రభుత్వం! ఇప్పుడు ఈజీగా గోల్డెన్ వీసా..
UAE ప్రభుత్వం కొత్త నామినేషన్ ఆధారిత వీసా విధానం వలన భారతీయులు ఇప్పుడు సులభంగా జీవితకాల గోల్డెన్ వీసాను పొందవచ్చు. ఆస్తి కొనుగోలు లేదా వ్యాపార లైసెన్స్ అవసరం లేకుండా, AED 100,000 చెల్లించి వీసా పొందవచ్చు. ఈ విధానం నైపుణ్యులు, విద్యావేత్తలు, క్రీడాకారులకు కూడా అవకాశం కల్పిస్తుంది.
Updated on: Jul 06, 2025 | 8:52 PM
UAE ప్రభుత్వం ఇటీవల రూపొందించిన కొత్త నామినేషన్ ఆధారిత వీసా విధానం కారణంగా భారతీయ పౌరులు ఇప్పుడు చాలా సులభంగా యూఏఈ లైఫ్ టైమ్‌ గోల్డెన్ వీసాను పొందవచ్చు. గతంలో అక్కడ వ్యాపార పెట్టుబడి పెట్టేవాళ్లకు మాత్రమే ఈ వీసా ఇచ్చేవారు. కానీ, ఇప్పుడు ఆస్తిని కొనుగోలు చేయకుండా, వాణిజ్య లైసెన్స్ కలిగి ఉండాల్సిన అవసరం లేకుండానే జీవితకాల గోల్డెన్ వీసాను పొందవచ్చు. అయితే ఈ గోల్డెన్ వీసా కావాల్సిన వారు 100,000 AED లను ఒకేసారి చెల్లించి గోల్డెన్ వీసా పొందవచ్చు, ఇది భారతీయ కరెన్సీలో దాదాపు రూ. 23.3 లక్షలు. గతంలో 2 మిలియన్‌ AEDలతో యూఏఈలో ఆస్తి కొనుగోలు చేయడం లేదా వ్యాపారంలో పెట్టుబడితేనే ఈ వీసా ఇచ్చేవారు. కానీ, ఇప్పుడు అది అవసరం లేదు.
నామినేషన్ ఆధారిత పాలసీ జీవితాంతం గోల్డెన్ వీసాను అందిస్తుంది, ఇది నైపుణ్యం కలిగిన నిపుణులు, విద్యావేత్తలు, సృజనాత్మక వ్యక్తులు, ఇ-స్పోర్ట్స్ ఆటగాళ్లకు కూడా మార్గాన్ని సులభతరం చేస్తుంది. ఈ చొరవ ప్రపంచ ప్రతిభను ఆకర్షించడానికి, విభిన్న వర్గాల నివాసితులకు మద్దతు ఇవ్వడానికి UAE నిరంతర నిబద్ధతను ప్రతిబింబిస్తుంది. ఈ నమూనాను ప్రయోగాత్మకంగా అమలు చేయడానికి భారతదేశం, బంగ్లాదేశ్ మొదటి రెండు దేశాలుగా ఎంపికయ్యాయి. భారతదేశంలో ప్రారంభ దశను పరీక్షించడానికి రాయద్ గ్రూప్ అనే కన్సల్టెన్సీ సంస్థను నియమించారు. రాయద్ గ్రూప్ మేనేజింగ్ డైరెక్టర్ రాయద్ కమల్ అయూబ్ దీనిని భారతీయులకు సువర్ణావకాశం అని అభివర్ణించారు.
UAE గోల్డెన్ వీసా కార్యక్రమం ఇప్పుడు పెట్టుబడిదారులు, వ్యవస్థాపకులు, శాస్త్రవేత్తలు, పరిశోధకులు, కార్యనిర్వాహకులు, అథ్లెట్లు, ఫ్రంట్‌లైన్ కార్మికులు వంటి 10 ప్రధాన వర్గాలను కవర్ చేస్తుంది. అదనంగా ఐదు కొత్త వర్గాలను ఇందులో చేర్చారు. 15 సంవత్సరాల కంటే ఎక్కువ అనుభవం ఉన్న నర్సులు, ఉపాధ్యాయులు, విశ్వవిద్యాలయ అధ్యాపకులు, డిజిటల్ కంటెంట్ సృష్టికర్తలు, 25 ఏళ్లు అంతకంటే ఎక్కువ సంవత్సరాల వయస్సు గల ఇ-స్పోర్ట్స్ నిపుణులు, 40 మీటర్ల కంటే ఎక్కువ ఓడలు కలిగిన లగ్జరీ యాచ్ యజమానులను ఇందులో చేర్చారు. ఆవిష్కరణ, విద్య, సృజనాత్మక పరిశ్రమలకు ప్రపంచ కేంద్రంగా తనను తాను నిలబెట్టుకోవాలనే UAE విస్తృత వ్యూహాంలో భాగంగా ఈ మార్పులు చేశారు.
ఈ గోల్డెన్ వీసా కోసం దరఖాస్తు ప్రక్రియ పూర్తిగా డిజిటల్, యూజర్ ఫ్రెండ్లీగా చేశారు. ఆసక్తిగల దరఖాస్తుదారులు అర్హతను తనిఖీ చేసి ICP స్మార్ట్ సర్వీసెస్ పోర్టల్ లేదా GDRFA దుబాయ్ వెబ్‌సైట్/యాప్ ద్వారా దరఖాస్తు చేసుకోవచ్చు. అవసరమైన కీలక పత్రాలు.. పాస్‌పోర్ట్, విద్యా లేదా వృత్తిపరమైన ఆధారాలు, ఆదాయం లేదా పెట్టుబడి రుజువు, అక్రిడిటేషన్ లేదా సర్వీస్ లెటర్స్. దరఖాస్తు రుసుము AED 2,800 నుండి AED 4,000 వరకు ఉంటుంది. ఆ తర్వాత వైద్య పరీక్ష, బయోమెట్రిక్ రిజిస్ట్రేషన్ ఉంటుంది. విజయవంతమైన దరఖాస్తుదారులు సాధారణంగా 30 రోజుల్లోపు వారి ఎమిరేట్స్ ID, గోల్డెన్ వీసాను అందుకుంటారు.
మరిన్ని జాతీయ వార్తల కోసం ఇక్కడ క్లిక్ చేయండి
