భవిష్యత్తులో కరెంట్‌ బిల్లు కట్టినట్టు.. AI బిల్లు కట్టాల్సిందే: OpenAI CEO

ఆర్టిఫిషియల్ ఇంటెలిజెన్స్ (AI) ప్రపంచవ్యాప్తంగా పని విధానాలు, విద్యా వ్యవస్థ, వ్యాపారాలను వేగంగా మార్చుతున్న సాంకేతికతగా భావిస్తున్నారు. అయితే ఓపెన్‌ ఏఐ అధినేత సామ్‌ ఆల్ట్‌మాన్‌ అభిప్రాయం ప్రకారం భవిష్యత్తులో AI చాలా సాధారణ సేవగా మారే అవకాశం ఉంది. ప్రజలు దానిని ప్రత్యేక సాంకేతికతగా కాకుండా రోజువారీ అవసరంగా ఉపయోగించవచ్చని ఆయన తెలిపారు. వాషింగ్టన్ డీసీలో జరిగిన బ్లాక్‌రాక్‌ యూఎస్‌ ఇన్‌ఫ్రా సమ్మిట్‌లో మాట్లాడుతూ ఆల్ట్‌మాన్ ఈ అభిప్రాయాన్ని వ్యక్తం చేశారు. ఆయన ప్రకారం భవిష్యత్తులో AI విద్యుత్ లేదా నీటి సేవల మాదిరిగా యుటిలిటీ సర్వీస్ గా మారవచ్చు. అంటే వినియోగదారులు AI సేవలకు స్థిర చార్జ్ చెల్లించడం కాకుండా, వారు ఉపయోగించినంత మేరకు మాత్రమే చెల్లించే విధానం రావచ్చని చెప్పారు.

ఈ విధానంలో AI అందించే మేధస్సు కూడా విద్యుత్‌లా మీటర్ ఆధారంగా కొనుగోలు చేసే సేవగా మారవచ్చు. ఒక పని కోసం ఎంత కంప్యూటింగ్ శక్తి అవసరమైతే అంతకు అనుగుణంగా చెల్లింపు ఉండే అవకాశం ఉందని ఆయన వివరించారు. ప్రస్తుతం అనేక సంస్థల్లో AI ఇప్పటికే రోజువారీ పనుల్లో భాగమవుతోంది. ఉదాహరణకు సాఫ్ట్‌వేర్ అభివృద్ధిలో ఇంజనీర్లు గంటల తరబడి చేసే కోడింగ్ పనులను కొన్ని AI వ్యవస్థలు తక్కువ సమయంలో పూర్తి చేయగలుగుతున్నాయి. ఈ సాంకేతికత కోడింగ్‌కే పరిమితం కాకుండా పరిశోధన, సైన్స్, డేటా విశ్లేషణ వంటి అనేక రంగాల్లో కూడా ఉపయోగపడుతోంది.

కొన్ని కార్యాలయాల్లో ఉద్యోగులు స్వయంగా పనిని చేయడం కంటే AI వ్యవస్థలను ఎలా ఉపయోగించాలో మార్గనిర్దేశం చేయడంపై ఎక్కువ సమయం కేటాయించడం ప్రారంభించారు. రాబోయే సంవత్సరాల్లో ఈ ధోరణి మరింత పెరిగే అవకాశం ఉందని ఆల్ట్‌మాన్ తెలిపారు. OpenAI సంస్థలో పనిచేస్తున్న సమయంలో కొత్త ఉత్పత్తి ఆలోచనలు లేదా వ్యాపార వ్యూహాలపై చర్చించేముందు తాను తరచుగా AI సాధనాల నుంచి అభిప్రాయం తీసుకుంటానని కూడా ఆయన వెల్లడించారు.

అయితే ఈ సాంకేతికత విస్తృతంగా అందుబాటులోకి రావాలంటే భారీ మౌలిక సదుపాయాలు అవసరం. శక్తివంతమైన AI మోడళ్లను అమలు చేయడానికి పెద్ద డేటా సెంటర్లు, అధిక కంప్యూటింగ్ శక్తి, విపరీతమైన విద్యుత్ అవసరం అవుతాయి. ఈ అవసరాలను తీర్చడానికి Amazon, Nvidia, SoftBank వంటి సంస్థలతో కలిసి OpenAI భారీగా పెట్టుబడులు పెడుతోంది. లక్ష్యం ఏమిటంటే AIను కొద్దిమంది మాత్రమే ఉపయోగించే ఖరీదైన సాంకేతికతగా కాకుండా సాధారణ ప్రజలకు అందుబాటులో ఉండే సేవగా మార్చడం. ఆల్ట్‌మాన్ అభిప్రాయం ప్రకారం భవిష్యత్ తరాలు AIను ప్రత్యేక సాంకేతికతగా చూడకపోవచ్చు. విద్యుత్ లేదా ఇంటర్నెట్‌లాగే అవసరమైనప్పుడు ఉపయోగించే సాధారణ సేవగా అది మారే అవకాశం ఉందని ఆయన పేర్కొన్నారు.

మరిన్ని టెక్‌ వార్తల కోసం ఇక్కడ క్లిక్‌ చేయండి