Second Marriage: హిజ్రా ప్రేమలో మునిగిన భర్త.. రెండో పెళ్లి చేసిన భార్య! ఎక్కడ జరిగిందంటే..

Man married transwoman with wife consent: కుటుంబంలో భార్య, భర్తల మధ్య విబేధాలు తలెత్తడానికి ప్రధాన కారణం వివాహేతర సంబంధాలు. వీరిరువురిలో ఎవరు తప్ప(ప్పు)టడుగు వేసినా కాపురం అల్లకల్లోలం అవుతుంది. ఐతే ఇందుకు విరుద్ధంగా ఓ భార్య తన భర్త వేరే మహిళను ప్రేమించాడని తెలుసుకుని ఏకంగా పెళ్లి చేసింది. సినిమాను తలపించేలా ఉన్నా ఇది నిజంగా జరిగిన సంఘటన. వివరాల్లోకెళ్తే..

ఒరిస్సా రాష్ట్రంలోని కలహండి జిల్లా పరిధిలోని డోర్‌కుట్‌ గ్రామంలో ఈ వింత సంఘటన చోటు చేసుకుంది. ఈ గ్రామానికి చెందిన ఫకీర్‌ నియాల్‌ (32)కు అయిదేళ్ల క్రితం వివాహం జరిగింది. ఈ దంపతులకు రెండేళ్ల కుమారుడు కూడా ఉన్నాడు. ఫకీర్‌ నియాల్‌ ఏడాది క్రితం అదే గ్రామానికి చెందిన సంగీత అనే హిజ్రాతో ప్రేమలో పడ్డాడు. ఈ విషయం తెలుసుకున్న భార్య, భర్తతో గొడవపడకుండా ఆ హిజ్రాతో మాట్లాడి తన భర్తతో సెప్టెంబర్‌ 11న గుడిలో సంప్రదాయబద్ధంగా పెళ్లి జరిపించింది. మొదటి భార్యకు విడాకులు ఇవ్వకుండా రెండో పెళ్లి చేసుకోవడం చట్టరిత్యా నేరం. ఐతే మొదటి భార్య అనుమతితో ఈ వివాహం జరగడం వల్ల.. ఈ పెళ్లికి సంబంధించి ఎవరి వైపు నుంచైనా అభ్యంతరాలు తలెత్తితే చర్యలు తీసుకుంటామని స్థానిక పోలీసులు చెబుతున్నారు. చట్ట రిత్యా ఈ వివాహం అంగీకరించబడదని, దీనిని లివ్‌ ఇన్‌ రిలేషన్‌షిప్‌గా పరిగణించబడుతుందని న్యాయ నిపుణులు అంటున్నారు. ఆదివారం జరిగిన ఈ పెళ్లికి ట్రాన్స్‌జెండర్లు అనేక మంది హాజరయ్యారు. ఒంటరైన తాను ఫకీరును ప్రేమించినందుకు, ఆయన భార్య కొత్త జీవితం ప్రసాదించిందని, తనకు ఇప్పుడు ఓ కుటుంబం ఉందనే ఆనందం వ్యక్తం చేసింది హిజ్రా మహిళ.