Monsoon: ఉక్కపోతతో ఉక్కిరిబిక్కిరి అవుతున్న వారికి గుడ్‌న్యూస్.. కేరళను తాకనున్న రుతుపవనాలు..!

ఎండలు, వడగాలులు, ఉక్కపోతతో ఇబ్బందులు పడుతున్న ప్రజలకు శుభవార్త. నేడు కేరళ తీరాన్ని తాకనున్నాయి నైరుతి రుతుపవనాలు. ప్రస్తుతం వాతావరణం చల్లబడడం, గాలులు వీస్తుండడం, కేరళ సహా పలు రాష్ట్రాల్లో వర్షాలు పడుతుండడంతో రుతుపవనాల ఎంట్రీకి మార్గం సుగమం అయినట్టు వాతావరణ శాఖ అధికారులు తెలిపారు. కేరళను నైరుతి తాకిన నాలుగు ఐదు రోజుల్లోనే ఆంధ్రా, తెలంగాణకు కూడా విస్తరిస్తాయని వాతావరణ నిపుణులు చెప్పారు. నైరుతి రాకతో అగ్నిగోళంలా మండుతున్న రాష్ట్రాలు చల్లబడనున్నాయి.

రెమాల్ తుఫాను కారణంగా, నైరుతి రుతుపవనాలు గురువారం నాటికి కేరళ తీరం, ఈశాన్య ప్రాంతాలను తాకవచ్చని వాతావరణ కార్యాలయం అంచనా వేసింది, అయితే ఈసారి రుతుపవనాలు కేరళలో సమయం కంటే ముందే వస్తున్నాయి. వచ్చే 24 గంటల్లో కేరళలో నైరుతి రుతుపవనాలు ప్రవేశించేందుకు పరిస్థితులు అనుకూలంగా కొనసాగుతాయని భారత వాతావరణ శాఖ బుధవారం తెలిపింది. కాగా, మే 31 నాటికి కేరళలో రుతుపవనాలు ప్రారంభమవుతాయని వాతావరణ కేంద్రం మే 15న ప్రకటించింది.

గతేడాది రుతుపవనాలు అంచనా వేసిన సమయానికంటే ఆలస్యంగా వచ్చాయని, ఇప్పుడు మాత్రం రుతుపవనాల వ్యాప్తికి వాతావరణం అనుకూలంగా ఉందని అధికారులు చెప్పారు. ఇక, వచ్చే 3-4 రోజుల్లో వాయువ్య, మధ్య భారతదేశంలో గరిష్ట ఉష్ణోగ్రతలు 3-4 డిగ్రీల వరకు తగ్గే అవకాశం ఉందని ఐఎండీ చెప్పింది. నైరుతి రుతుపవనాలు వేగంగా కదిలితే.. అంతే వేగంగా దేశం మొత్తం రుతుపవనాలు వ్యాపిస్తాయి. ఇక దేశంలో ఈసారి సాధారణం కంటే అధిక వర్షపాతం నమోదయ్యే అవకాశాలు ఉన్నాయని అంచనా వేసింది ఐఎండీ.

ఆదివారం పశ్చిమ బెంగాల్ – బంగ్లాదేశ్‌ మధ్య రెమల్ తుఫాను తీరం దాటడం, రుతుపవనాల ప్రవాహాన్ని బంగాళాఖాతాన్ని తాకిందని వాతావరణ శాఖ తెలిపింది. ఇది ఈశాన్య దిశగా పయనించి త్వరగా రుతుపవనాలు రావడానికి ఒక కారణమని వాతావరణ శాస్త్రవేత్తలు తెలిపారు. ఇక అరుణాచల్ ప్రదేశ్, త్రిపుర, నాగాలాండ్, మేఘాలయ, మిజోరాం, మణిపూర్, అస్సాంలలో సాధారణ రుతుపవనాల ప్రారంభ తేదీ జూన్ 5గా పేర్కొంది.

వ్యవసాయ ఆధారిత భారతదేశానికి రుతుపవనాలు కీలకం. నికర సాగు విస్తీర్ణంలో 52 శాతం దానిపై ఆధారపడి ఉంది. దేశవ్యాప్తంగా విద్యుదుత్పత్తి కాకుండా, తాగునీటికి కీలకమైన రిజర్వాయర్లను నింపడానికి కూడా ఇది చాలా కీలకం. జూన్, జూలైలను వ్యవసాయానికి అత్యంత ముఖ్యమైన రుతుపవన నెలలుగా పరిగణిస్తారు. ఎందుకంటే ఖరీఫ్ పంటకు చాలా వరకు విత్తనాలు ఈ కాలంలోనే జరుగుతాయి.

ప్రస్తుతం ఎల్ నినో పరిస్థితులు నెలకొని ఉన్నాయని, ఆగస్టు-సెప్టెంబర్ నాటికి లా నినా ఏర్పడవచ్చని శాస్త్రవేత్తలు చెబుతున్నారు. ఎల్ నినో – మధ్య పసిఫిక్ మహాసముద్రంలో ఉపరితల జలాల ఆవర్తన వేడెక్కడంతో భారతదేశంలో బలహీనమైన రుతుపవనాల గాలులు, పొడి పరిస్థితులు ఏర్పడినట్లు నిపుణులు అభిప్రాయపడుతున్నారు. లా నినా – ఎల్ నినో వ్యతిరేకత- వర్షాకాలంలో సమృద్ధిగా వర్షపాతానికి కారణమవుతుందంటున్నారు. దీని ప్రభావంతో దక్షిణ భారతదేశంలోని అనేక రాష్ట్రాల్లో భారీ వర్షాలు కురుస్తాయంటున్నారు. IOD ప్రస్తుతం ‘తటస్థంగా’ ఉంది. ఆగస్టు నాటికి సానుకూలంగా మారుతుందని భావిస్తున్నారు.

మరిన్ని జాతీయ వార్తల కోసం ఇక్కడ క్లిక్ చేయండి..