ముడా కేసులో కర్ణాటక సీఎంకు బిగ్ రిలీఫ్.. సిద్ధరామయ్యతోపాటు ఆయన కుటుంబానికి క్లీన్ చిట్

మైసూర్ అర్బన్ డెవలప్‌మెంట్ అథారిటీ (MUDA) భూ కేటాయింపు కేసులో ముఖ్యమంత్రి సిద్ధరామయ్య తోపాటు ఆయన కుటుంబానికి రిటైర్డ్ జడ్జి పిఎన్ దేశాయ్ నేతృత్వంలోని కమిషన్ క్లీన్ చిట్ ఇచ్చింది. కర్ణాటక మంత్రివర్గం ఈ నివేదికను ఆమోదించింది. ఈ అక్రమాలకు కారణమైన అధికారులపై చట్టపరమైన చర్యలు తీసుకోవాలని నివేదిక సిఫార్సు చేసింది. 2020-2024 మధ్య మైసూర్‌లో జరిగిన అక్రమ ప్రత్యామ్నాయ భూ కేటాయింపు కుంభకోణంలో సిద్ధరామయ్య కుటుంబం పాల్గొన్నారనే ఆరోపణలను దేశాయ్ కమిషన్ దర్యాప్తు చేసింది.

పరిహారంగా భూమిని కేటాయించడం చట్టవిరుద్ధమని చెప్పలేమని కమిషన్ పేర్కొంది. ‘కేసారే గ్రామంలోని సర్వే నంబర్ 464లో నోటిఫై చేయని భూమిని ఉపయోగించడం గురించి, భూమి యజమాని ప్రత్యామ్నాయ అభివృద్ధి చేయని భూమిని పరిహారంగా ఇవ్వాలని పట్టుబట్టినప్పటికీ, 2017లో ప్రతిపాదన కూడా ఆమోదించబడినప్పటికీ, అది అమలు కాలేదు. దీని తర్వాత, 2022లో, ఇతరులకు కేటాయించినట్లుగా, చెల్లింపు పద్ధతి ప్రకారం 50-50 నిష్పత్తిలో భూమిని కేటాయించారు’ అని కమిషన్ పేర్కొంది. చట్టం, అసెంబ్లీ వ్యవహారాల మంత్రి హెచ్‌కె పాటిల్ మంత్రివర్గ నిర్ణయాన్ని ధృవీకరించారు.

జస్టిస్ పిఎన్ దేశాయ్ అధ్యక్షతన ఏక సభ్య కమిషన్‌ను ఏర్పాటు చేయడం జరిగింది. అది రెండు భాగాలుగా తన నివేదికను సమర్పించింది. కర్ణాటక ముఖ్యమంత్రి సిద్ధరామయ్య, ఆయన కుటుంబంపై వచ్చిన ఆరోపణల్లో నిజం లేదని నివేదికలో స్పష్టం చేయడం జరిగింది. అనేక కేసుల్లో కొంతమంది అధికారులపై చర్యలు తీసుకోవాలని కమిషన్ అభ్యర్థించింది. కర్ణాటక కేబినెట్ జస్టిస్ పిఎన్ దేశాయ్ ఇచ్చిన నివేదిక, దాని సిఫార్సులను ఆమోదించామని మంత్రి హెచ్‌కె పాటిల్ అన్నారు.

ఆరోపణలు ఏమిటి?

సిద్ధరామయ్య, ఆయన భార్య పార్వతి బిఎమ్‌లను కమిషన్ నిర్దోషులుగా విడుదల చేసింది. కేసరే గ్రామంలో పార్వతికి ఉన్న 3.16 ఎకరాల భూమికి బదులుగా 14 ప్లాట్లను ఆమెకు కేటాయించడంలో ఎటువంటి అక్రమం జరగలేదని పేర్కొంది. ముడా ఈ భూమిని లేఅవుట్ నిర్మించడానికి ఉపయోగించిందని ఆరోపించారు. మైసూరులోని అప్‌మార్కెట్ విజయనగర లేఅవుట్ యొక్క మూడవ, నాల్గవ దశలలో పార్వతికి కేటాయించిన పరిహార ప్లాట్లు ఆమె అసలు భూమి కంటే ఎక్కువ ఆస్తి విలువను కలిగి ఉన్నాయనే ఆరోపణలపై ఈ కేసు నమోదైంది. ముడా 50-50 నిష్పత్తి పథకం కింద, భూమిని కోల్పోయిన వారికి నివాస లేఅవుట్ల కోసం సేకరించిన అభివృద్ధి చేయని భూమికి బదులుగా 50 శాతం అభివృద్ధి చేసిన భూమి లభించింది.

మైసూరు తాలూకా కసబా హోబ్లీలోని కేసారే గ్రామంలోని సర్వే నంబర్ 464లోని 3.16 ఎకరాల భూమిపై పార్వతికి చట్టబద్ధమైన హక్కు లేదని కూడా ఆరోపణలు వచ్చాయి. అయితే 2006-జూలై 2024 మధ్య ముడా పనితీరుపై దేశాయ్ కమిషన్ దర్యాప్తు చేసింది. ఆధారాలు లేకపోవడంతో లోకాయుక్త పోలీసులు గతంలో సిద్ధరామయ్య, పార్వతి సహా ఇతరులకు క్లీన్ చిట్ ఇచ్చారు.

మరిన్ని జాతీయ వార్తల కోసం ఇక్కడ క్లిక్ చేయండి..