Indian Railways: అది భారత్ రేంజ్ అంటే.. ప్రపంచంలోనే అత్యంత శక్తివంతమైన హైడ్రోజన్‌ రైలు ఇంజిన్‌..

భారతీయ రైల్వే అభివృద్ధి పథంలో దూసుకెళ్తోంది.. గతంలో ఎన్నడూ లేని విధంగా రైల్వే ఆధునికీకరణకు ప్రణాళికలు రచించడంతోపాటు.. సరికొత్త ఆవిష్కరణలతో ముందుకెళ్తోంది.. ఒకప్పుడు బొగ్గు ఇంజిన్లతో నడిచిన రైళ్లు ఆ తర్వాత డీజిల్.. ఇప్పుడు పూర్తి స్థాయి ఎలక్ట్రిక్ రైళ్లుగా రూపాంతరం చెందాయి. ఆ తర్వాత ఆధునిక హంగులు జోడిస్తూ.. వందే భారత్ పట్టాలెక్కించిన కేంద్ర ప్రభుత్వం ఇప్పుడు మరో నూతన ఆవిష్కరణ వేపు అడుగులు వేస్తోంది. కొంతకాలంలోనే.. బుల్లెట్ రైళ్లను పట్టాలెక్కించేందుకు ప్లాన్ ను రచించింది..హైడ్రోజన్ రైలును అందుబాటులోకి తీసుకువచ్చేందుకు సమాయత్తమవుతోంది. ఈ క్రమంలోనే.. భారతీయ రైల్వే మరో మైలురాయిని సాధించింది… స్వదేశీ 1,200 HP హైడ్రోజన్ ఇంజిన్‌ను అభివృద్ధి చేసింది.. ప్రపంచంలోనే అత్యంత శక్తివంతమైనది..

భారతీయ రైల్వే అభివృద్ధి చేసిన హైడ్రోజన్‌తో నడిచే రైలు ఇంజిన్ ప్రపంచంలోనే అత్యంత శక్తివంతమైనదని రైల్వే మంత్రి అశ్విని వైష్ణవ్ గురువారం ప్రకటించారు. ప్రవాసీ భారతీయ దివస్ కన్వెన్షన్ సందర్భంగా “గ్రీన్ కనెక్షన్లు: సుస్థిర అభివృద్ధికి సహకారం” అనే ప్లీనరీ సెషన్‌లో అశ్విని వైష్ణవ్ మాట్లాడుతూ, ప్రపంచంలోని నాలుగు దేశాలు మాత్రమే ఇటువంటి రైలు ఇంజిన్‌లను తయారు చేస్తున్నాయని చెప్పారు. “వారు 500 నుండి 600 హార్స్‌పవర్ల మధ్య ఉత్పత్తి చేస్తారు.. అయితే భారతీయ రైల్వేలు స్వదేశీ సాంకేతికతను ఉపయోగించి ఉత్పత్తి చేసే ఇంజిన్ 1,200 హార్స్‌పవర్‌ల ఉత్పత్తిని కలిగి ఉంది.. ఈ విభాగంలో ఇప్పటివరకు అత్యధికం” అని వైష్ణవ్ చెప్పారు

జింద్-సోనిపట్ మార్గంలో త్వరలో హర్యానాలో మొదటి రైలు ట్రయల్ రన్ చేయనున్నట్లు మంత్రి తెలిపారు. ఇంజిన్ తయారీ పూర్తి కాగా, దాని సిస్టమ్ ఇంటిగ్రేషన్ ప్రస్తుతం పురోగతిలో ఉందని వైష్ణవ్ పేర్కొన్నారు. దేశం ఇంత స్థాయిలో హైడ్రోజన్‌తో నడిచే రైలు ఇంజిన్‌ను నిర్మించగలిగినప్పుడు.. ట్రక్కులు, టగ్‌బోట్‌లు.. ఇతర వాటి కోసం.. పవర్ రైళ్లను తయారు చేయడానికి ఉపయోగించే ఈ సాంకేతికతను ఉపయోగించుకునే అవకాశం ఉందన్నారు.

ఇటువంటి సాంకేతిక పురోగతి దేశానికి విశ్వాసాన్ని ఇస్తుందని, సాంకేతిక స్వయం సమృద్ధిని సాధించే విషయంలో భారతదేశం చాలా దూరం ప్రయాణించాల్సి ఉందని.. విలువ గొలుసులో భాగాలను తయారు చేయాల్సిన అవసరం ఉందని ఆయన పేర్కొన్నారు.

మరిన్ని జాతీయ వార్తల కోసం ఇక్కడ క్లిక్ చేయండి..