Viral: పూజ ధ్యాసలో పడిపోయి తీర్థంతోపాటు కృష్ణుడి విగ్రహాన్ని మింగేసిన వ్యక్తి.. కట్ చేస్తే.
కర్ణాటకకు చెందిన ఓ వ్యక్తి.. పూజ ధ్యాసలో మునిగిపోయి తీర్థంతోపాటు బాలకృష్ణుడి విగ్రహాన్ని మింగేశాడు. ఆ వ్యక్తి గొంతులో ఆ బుల్లి విగ్రహం ఇరుక్కుపోయింది.
Karnataka: ఏ మనిషికైనా భయం.. భక్తి ఉండాలి.. కాని అవి కూడా లిమిట్స్‌లో ఉండాలి. అతి ఏదైనా ప్రమాదమే. తాజాగా ఓ వ్యక్తి పూజ ధ్యాసలో పడి ఏకంగా ప్రాణాల మీదకే తెచ్చుకున్నాడు. భక్తిపారవశ్యంలో మునిగిపోయి…తీర్థంతోపాటు ఏకంగా బాలకృష్ణుడి విగ్రహాన్నే మింగేశాడు. దీంతో గొంతులో ఆ విగ్రహం ఇరుక్కుపోయింది. డాక్టర్లు అతి కష్టం మీద ఆ విగ్రహాన్ని బయటకు తీశారు. కర్ణాటకలో ఈ ఘటన వెలుగుచూసింది. బెళగావి(Belagavi)కి చెందిన ఓ 45 ఏళ్ల వ్యక్తికి కృష్ణుడు అంటే విపరీమతమైన భక్తి. ప్రతి పనికి ముందు కృష్ణుడి నామాన్ని జపిస్తూనే ఉంటాడు. రోజూ ఉదయం, సాయంత్రం బాలకృష్ణుడ్ని విగ్రహాన్ని పూజించేవాడు. అయితే.. ఓరోజు ఊహించని విధంగా తీర్థం తీసుకునేటప్పుడు పంచామృతంలో ఉన్న బాలకృష్ణుడి విగ్రహాన్ని మింగేశాడు. ఆ సమయంలో కానీ.. ఆ తర్వాత కానీ ఆ విషయాన్ని అతడు గుర్తించలేదు. రోజులు గడిచిన తర్వాత గొంతులో విపరీతమైన నొప్పి, వాపు రావడంతో భయంతో డాక్టర్ వద్దకు వెళ్లాడు. ఎక్స్‌రే చేసి చూడగా గొంతులో కృష్ణుడి విగ్రహం ఇరుక్కుపోయిందని నిర్ధారించారు వైద్యులు. బెళగావిలోని కేఎల్ఈఎస్ హాస్పిటల్‌కు అతడ్ని రిఫర్ చేశారు.
ఎండోస్కోపీ టెస్టులు చేసిన అక్కడి డాక్టర్లు.. ఆహార నాళికలో ఎడమవైపు కృష్ణుడి విగ్రహం ఇరుక్కుపోయిందని గుర్తించారు. ఆ తర్వాత ఆపరేషన్ ద్వారా దానిని బయటకు తీయాలని డిసైడయ్యారు. ENT విభాగానికి చెందిన డాక్టర్లు ప్రీతి హజారే, వినీత, చైతన్య కామత్‌తో కూడిన టీమ్ ఆపరేషన్ చేసి బాలకృష్ణుడి ప్రతిమను తొలగించారు. ప్రస్తుతం అతడు క్షేమంగానే ఉన్నట్లు డాక్టర్లు తెలిపారు.
