IND vs SL: జడేజా, కుల్‌దీప్ ఉన్నా.. ఈ యంగ్ స్పిన్నర్‌ని చూస్తే లంక బ్యాటర్లు వణకాల్సిందే

IND vs SL: భారత జట్టు శ్రీలంక పర్యటనలో భాగంగా గాల్ క్రికెట్ గ్రౌండ్ వేదికగా జరగనున్న తొలి టెస్టు మ్యాచ్‌కు సిద్ధమవుతోంది. ఈ సిరీస్‌లో శ్రీలంక స్పిన్ అటాక్, ముఖ్యంగా గాల్ మైదానంలో అత్యంత ప్రమాదకరంగా మారే ప్రభాత్ జయసూర్యను టీమిండియా బ్యాటర్లు ఎలా ఎదుర్కొంటారనేది పెద్ద ప్రశ్నగా మారింది. అయితే లంక బ్యాటర్లకు కూడా భారత స్పిన్నర్లను ఎదుర్కోవడం ఏమంత తేలిక కాదు. సీనియర్ స్పిన్నర్లు రవీంద్ర జడేజా, కుల్‌దీప్ యాదవ్‌లతో పాటు యువ లెఫ్ట్ ఆర్మ్ స్పిన్నర్ మానవ్ సుతార్ తుది జట్టులో కీలక పాత్ర పోషించే అవకాశం ఉంది.

జడేజా, కుల్‌దీప్ ఉన్నా.. మానవ్ సుతార్ ఎందుకు ప్లస్

అనుభవంలో రవీంద్ర జడేజా, డిఫరెంట్ బౌలింగ్ స్టైల్ ఉన్న కుల్‌దీప్ యాదవ్ అత్యంత కీలకమైనప్పటికీ, గాల్ పిచ్‌పై మానవ్ సుతార్ అత్యంత ప్రభావవంతమైన బౌలర్‌గా మారతాడని విశ్లేషకులు భావిస్తున్నారు. శ్రీలంక మాజీ ఆల్‌రౌండర్ ఫార్వీజ్ మహరూఫ్ కూడా ఇదే అభిప్రాయాన్ని వ్యక్తం చేశారు. “భారత్ ముగ్గురు స్పిన్నర్లతో బరిలోకి దిగే అవకాశం ఉంది. గాల్ మైదానంలో పిచ్ నుంచి అదనపు బౌన్స్ రాబట్టే నైపుణ్యం మానవ్ సుతార్ సొంతం. ఈ పిచ్‌పై టర్న్ కంటే బౌన్సే బ్యాటర్లకు చుక్కలు చూపిస్తుంది” అని మహరూఫ్ పేర్కొన్నారు.

లంక స్టార్ స్పిన్నర్‎తో పోలిక

శ్రీలంక స్టార్ స్పిన్నర్ ప్రభాత్ జయసూర్య గాల్ వేదికగా ఏకంగా 81 వికెట్లు పడగొట్టి తన ఆధిపత్యాన్ని నిరూపించుకున్నాడు. పొడవైన శరీర సౌష్టవం కలిగి ఉండటం, లెఫ్ట్ ఆర్మ్ ఫింగర్ స్పిన్ వేస్తూ పిచ్ నుంచి లభించే బౌన్స్‌ను చక్కగా ఉపయోగించుకోవడం జయసూర్య విజయ రహస్యం. మానవ్ సుతార్ బౌలింగ్ శైలి కూడా సరిగ్గా జయసూర్యను పోలి ఉంటుంది. జడేజా, కుల్‌దీప్‌లతో పోలిస్తే ఎత్తుగా ఉండే సుతార్, ఈ అదనపు బౌన్స్‌తో లంక బ్యాటర్లను తీవ్రంగా ఇబ్బంది పెట్టగలడు. ఇప్పటివరకు ఒకే ఒక్క టెస్ట్ ఆడినప్పటికీ, ఈ పరిస్థితులకు అలవాటుపడితే సుతార్ మ్యాచ్ విన్నర్‌గా మారడం ఖాయం.

మరిన్ని క్రికెట్ వార్తల కోసం ఇక్కడ క్లిక్ చేయండి