జె‌ఎన్‌యు ఘటన.. విద్యార్థులకు దీపిక సంఘీభావం.. బీజేపీ ఆగ్రహం

ఢిల్లీలోని జవహర్ లాల్ నెహ్రు యూనివర్సిటీలో ఇటీవల జరిగిన ఘటనల నేపథ్యంలో విద్యార్థులకు సంఘీభావంగా అక్కడికి వెళ్లిన బాలీవుడ్ నటి దీపికా పదుకోన్ వ్యవహారంపై బీజేపీ భగ్గుమంది. ‘టుక్దే టుక్దే గ్యాంగ్’కు దీపిక సపోర్ట్ ఇస్తున్నారని ఈ పార్టీ అధికార ప్రతినిధి సాంబిత్ పత్రాతో బాటు కొంతమంది నేతలు, మంత్రులు ఆమెను విమర్శించారు.ఆమె నటించిన సినిమాలను బహిష్కరించాలని సూచించారు. (మంత్రి ప్రకాష్ జవదేవకర్ మాత్రం.ఎవరైనా.. . ఎక్కడికైనా వెళ్ళవచ్చునని,  నిరభ్యంతరంగా తమ అభిప్రాయాలు తెలియజేయవచ్చునని వ్యాఖ్యానించారు). ఈ నెల 6 వ తేదీ రాత్రి యూనివర్సిటీ  క్యాంపస్‌లో జరిగిన హింసాకాండకు నిరసన తెలిపిన విద్యార్థులకు సంఘీభావంగా దీపిక మంగళవారం సాయంత్రం అక్కడికి వెళ్లారు.అయితే దీనిపై మీడియాతో మాట్లాడేందుకు ఆమె నిరాకరించారు. తాను వీరికి మద్దతు తెలిపేందుకే వచ్చానన్నారు.

ఈ యూనివర్సిటీ స్టూడెంట్ లీడర్ ఐషే ఘోష్ సహా ఇతర విద్యార్థుల భుజంపై చెయ్యి వేసి ఆమె నిలబడిన తీరు అందరి ‘కళ్ళలో పడి ప్రాధాన్యత’  సంతరించుకుంది. కాగా బీజేపీ నేతలు తేజేందర్ బగ్గా, షానవాజ్ హుసేన్, రామ్ కదమ్ వంటివారు దీపిక తీరును తీవ్రంగా విమర్శించారు.’అఫ్జల్ గ్యాంగ్’ వంటి విద్యార్థుల గుంపును సమర్థించిన ఆమె సినిమాలను బహిష్కరించాలని ట్వీట్ చేశారు. కాగా–యాసిడ్ బాధితురాలి పాత్రలో దీపిక నటించిన ‘ ఛపాక్ ‘ మూవీ ఈ నెల 10న రిలీజ్ కానుంది.