ఏటీఎం చోరీకి దొంగ విఫలయత్నం.. క్యాష్‌ బాక్స్‌ ఎత్తుకెళ్లిన వైనం..

ఏటీఎం కార్డులతో అమాయకులను మోసం చేసి దోచుకునేవారు కొందరైతే.. ఏకంగా ఏటీఎంనే లూటీచేసేవారు మరికొందరు ఉంటారు. తాజాగా ఓ వ్యక్తి ఏటీఎంలో చోరీకి విఫలయత్నం చేశాడు. ఏటీఎంను ధ్వంసం చేసి అందులోని నగదును ఎత్తుకెళ్లేందుకు ప్రయత్నించాడు. ఈ సమాచారం తెలుసుకున్న ఓ పోలీస్‌ అధికారి వెంటనే అక్కడకు చేరుకున్నారు. ఆ దొంగను పట్టుకునేందుకు ప్రయత్నించగా అతడు తీవ్రంగా ప్రతిఘటించాడు. ఈ ఘటనకు సంబంధించిన వీడియో సోషల్‌ మీడియాలో వైరల్‌ అయింది. కర్ణాటకలోని బళ్లారి జిల్లాలో ఈ సంఘటన జరిగింది.

మంగళవారం అర్థరాత్రి బళ్లారిలోని కలమ్మ సర్కిల్ సమీపంలోని యాక్సిస్ బ్యాంక్ ఏటీఎంను ఒక వ్యక్తి పగులగొట్టాడు. అందులో ఉన్న క్యాష్‌ బాక్స్‌ చోరీ చేసేందుకు ప్రయత్నించాడు. ఈ విషయం ఎలాగో పోలీసులకు తెలిసింది. దీంతో రాత్రి వేళ పెట్రోలింగ్‌ విధుల్లో ఉన్న ఏఎస్‌ఐ మల్లికార్జున వెంటనే అక్కడకు చేరుకున్నారు. ఏటీఎం చోరీకి పాల్పడిన దొంగను పట్టుకునేందుకు ప్రయత్నించారు. అయితే పోలీస్‌ అధికారిపై ఆ వ్యక్తి దాడికి పాల్పడ్డాడు. ఈ క్రమంలో ఇద్దరిమధ్య కాసేపు పెనుగులాట జరిగింది. ఇంతలో అక్కడికి చేరుకున్న ఇతర పోలీస్‌ సిబ్బందిని ఆయన అలెర్ట్‌ చేశారు. చివరకు ఆ దొంగను అరెస్ట్‌ చేసి పోలీస్‌ స్టేషన్‌ను తరలించారు. ఆంధ్రప్రదేశ్‌లోని అనంతపురంలో నివసించే వెంకటేష్‌గా నిందితుడ్ని గుర్తించారు. ఇదంతా ఏటీఎం వద్ద ఉన్న సీసీటీవీలో రికార్డయింది. ఇప్పుడు ఈ దృశ్యాలు సోషల్‌ మీడియాలో వైరల్‌ అవుతున్నాయి.