Viral: ఆ ప్రాంతంలో శుభ్రం చేస్తుండగా ఏదో రాయి మాదిరిగా పారకు తగిలింది.. తవ్వి చూడగా..

మధ్యప్రదేశ్‌లోని ఇందార్ పోలీస్ స్టేషన్ ప్రాంతంలోని బగోరియా గ్రామంలో స్థానికంగా ఉన్న ఒక ప్రాంతాన్ని శుభ్రం చేస్తోన్న సమయంలో అద్భుతమైన ఘటన వెలుగులోకి వచ్చింది. గ్రామస్తులు భూమి కింద పాతిపెట్టిన పురాతన విగ్రహాన్ని కనుగొన్నారు. అది విష్ణువు విగ్రహంగా చెబుతున్నారు. ఆ విగ్రహాన్ని బయటకు తీసి.. శుభ్రం చేసి..  గ్రామ ఆలయంలో ప్రతిష్టించారు. దీంతో ఆ విగ్రహాన్ని దర్శించుకునేందుకు స్థానికులు తండోపతండాలుగా వస్తున్నారు.

గ్రామస్థులు రవి శర్మ.. భగీరథ శర్మ, దేవేంద్ర లోధి, చంద్రభాన్ లోధిలతో కలిసి.. ఓ ప్రాంతాన్ని శుభ్రం చేసే క్రమంలో భాగంగా నేలను తవ్వినప్పుడు, దాదాపు అర అడుగు పొడవున్న ఈ విగ్రహం కనిపించింది. దానిని గ్రామ పెద్దలు, పండితులకు చూపించగా దానిని విష్ణువు విగ్రహం అని తెలిపారు.

బగోరియా గ్రామంలో ఒక పురాతన కోట కూడా ఉంది. అది ఇప్పుడు శిథిలావస్థకు చేరుకుంది. దీంతో ఈ దొరికిన విగ్రహం ఆ కోటకు సంబంధించి చారిత్రక నేపథ్యాన్ని వివరించే ఆస్కారం ఉందంటున్నారు. విగ్రహం ఏ కాలానికి సంబంధించి.. అది దేనితో చేసింది వంటి వివరాలను తెలుసుకునేందుకు పురావస్తు శాఖకు సమాచారం అందించారు.

విగ్రహం దొరికిన తర్వాత గ్రామంలో భక్తిభావంతో కూడిన వాతావరణం నెలకొంది. భక్తులు ఈ విగ్రహాన్ని దైవిక వరంలా భావించి పూజిస్తున్నారు. పురావస్తు శాఖ దర్యాప్తులో ఏ కొత్త విషయాలు బయటపడతాయో అందరూ ఆసక్తిగా ఎదురుచూస్తున్నారు.

Vishu Idol