వీసా అవసరం లేదు.. పాస్పోర్ట్ ఉంటే చాలు! భారతీయులకు తక్కువ బడ్జెట్లోనే అదిరిపోయే విదేశీ పర్యటనలు
విదేశీ ప్రయాణం అనగానే మనకు ముందుగా గుర్తొచ్చేవి వీసా కష్టాలు, భారీ ఖర్చులు. వీసా అపాయింట్మెంట్ల కోసం నెలల తరబడి వేచి చూడటం, డాక్యుమెంటేషన్ ప్రక్రియ చాలామందిని విదేశీ ట్రిప్ ప్లాన్ చేసుకోవడానికి భయపెడుతూ విదేశాలకు వెళ్లాలనే కలను పక్కన పెట్టేలా చేస్తాయి.
Updated on: Feb 18, 2026 | 10:20 PM
భారతీయ పాస్పోర్ట్ ఉన్నవారికి ఈ ఇబ్బందులు లేకుండానే ప్రపంచంలోని కొన్ని అందమైన దేశాలు ‘వీసా-రహిత’ ప్రవేశాన్ని కల్పిస్తున్నాయి. తక్కువ బడ్జెట్లో, ఎటువంటి వీసా టెన్షన్ లేకుండా మీరు ఎంజాయ్ చేయగలిగే అద్భుతమైన దేశాలేవో తెలుసుకుందాం..
చాలామంది విదేశాలకు వెళ్లాలని కలలు కంటారు కానీ, వీసా ప్రాసెస్ మరియు టికెట్ల ఖర్చు చూసి వెనకడుగు వేస్తుంటారు. అయితే ప్రస్తుతం అనేక దేశాలు భారతీయ పర్యాటకులను ఆకర్షించడానికి వీసా నిబంధనలను సడలించాయి. దీనివల్ల మన ప్రయాణం సులభతరం కావడమే కాకుండా, వీసా ఫీజుల రూపంలో అయ్యే వేల రూపాయల ఖర్చు కూడా ఆదా అవుతుంది. మరి మన బడ్జెట్కు అనుకూలంగా ఉండే ఆ వీసా-రహిత దేశాలు ఏంటో ఇప్పుడు వివరంగా చూద్దాం.
థాయిలాండ్
భారతీయ ప్రయాణికులకు థాయిలాండ్ ఎప్పుడూ మొదటి ఎంపికగా ఉంటుంది. బ్యాంకాక్లోని సందడిగా ఉండే వీధులు, ఫుకెట్, క్రాబీ వంటి దీవుల్లో ఉండే అందమైన బీచ్లు పర్యాటకులను మంత్రముగ్ధులను చేస్తాయి. ఇక్కడ వసతి కోసం తక్కువ ధరలోనే హాస్టళ్లు అందుబాటులో ఉంటాయి. ముఖ్యంగా ఇక్కడి స్ట్రీట్ ఫుడ్ చాలా రుచిగా, చవకగా దొరుకుతుంది. వీసా అవసరం లేకపోవడం వల్ల ప్రయాణం మరింత సులభమవుతుంది.
మలేషియా
చైనీస్, భారతీయ మరియు మలేయ్ సంస్కృతుల అద్భుత మిశ్రమం మలేషియా. కౌలాలంపూర్లోని ఎత్తైన భవనాలు, చల్లని హిల్ స్టేషన్లు, అందమైన దీవులు ఇక్కడ చూడదగ్గ ప్రదేశాలు. ఇక్కడి ప్రజా రవాణా వ్యవస్థ చాలా బాగుంటుంది, దీనివల్ల ప్రయాణ ఖర్చులు తగ్గుతాయి. నాసి లెమాక్ వంటి స్థానిక వంటకాలు బడ్జెట్ ధరలోనే లభిస్తాయి. నగర జీవితాన్ని, వర్షారణ్యాలను ఒకే ట్రిప్లో ఆస్వాదించవచ్చు.
మారిషస్
స్పష్టమైన నీరు, పగడపు దిబ్బలు మరియు తీరప్రాంత మడుగులకు మారిషస్ ప్రసిద్ధి. భారతీయ పాస్పోర్ట్ ఉన్నవారికి ఇక్కడ వీసా అవసరం లేదు. కేవలం బీచ్లు మాత్రమే కాకుండా జలపాతాలు, వన్యప్రాణుల ఉద్యానవనాలు ఇక్కడ ప్రత్యేక ఆకర్షణగా నిలుస్తాయి. వాటర్ గేమ్స్, బోట్ రైడ్స్ వంటివి చేసేవారికి ఇది బెస్ట్ డెస్టినేషన్.
ఫిజి, ఫిలిప్పీన్స్
దక్షిణ పసిఫిక్ మహాసముద్రంలో ఉండే ఈ దేశం పగడపు దిబ్బలకు, ప్రశాంతమైన గ్రామీణ జీవితానికి పేరుగాంచింది ఫిజి. ఇక్కడికి వెళ్లడానికి విమాన టికెట్ల ఖర్చు కాస్త ఎక్కువైనా, వీసా ఫీజులు లేకపోవడం ఒక పెద్ద ప్లస్ పాయింట్. దాదాపు 7,000 కంటే ఎక్కువ ద్వీపాలు ఉన్న ఈ దేశం డైవింగ్ మరియు బీచ్ హాపింగ్కు పెట్టింది పేరు ఫిలిప్పీన్స్. పలావన్, సెబు వంటి ప్రదేశాల్లో నీటి అడుగున ఉండే అందాలను చూడవచ్చు. ఫెర్రీ ప్రయాణాలు ఇక్కడ చాలా చవకగా ఉంటాయి. విదేశీ ప్రయాణం అనేది ఇప్పుడు కేవలం ధనవంతులకే పరిమితం కాదు. సరైన ప్రణాళికతో వీసా అవసరం లేని దేశాలను ఎంచుకుంటే, తక్కువ ఖర్చుతోనే అంతర్జాతీయ అనుభూతిని పొందవచ్చు.
