Foot Care: పార్లర్‌కు వెళ్లి వేలు ఖర్చు చేయకండి.. ఇంట్లోనే మీ నల్లటి పాదాలను ఇలా తెల్లగా మార్చుకోండి!

వేసవి కాలం వచ్చిందంటే చాలు, భానుడి భగభగలకు మన చర్మం నల్లబడటం (సన్ టాన్) మొదలవుతుంది. ముఖ్యంగా బయటకు వెళ్లేటప్పుడు ముఖాన్ని ఎండ బారిన పడకుండా రక్షించుకోవడానికి మనం అనేక జాగ్రత్తలు తీసుకుంటాము. ముఖానికి క్రీమ్స్, సన్‌స్క్రీన్ లోషన్స్ రాస్తాం, కానీ చాలామంది తమ పాదాల గురించి పట్టించుకోవడం పూర్తిగా మర్చిపోతారు. దీనివల్ల పాదాలు విపరీతంగా నల్లబడతాయి. చెప్పులు వేసుకున్న ఆకారం మాత్రమే తెల్లగా ఉండి, మిగతా పాదం నల్లగా మారుతుంది. ఇది చూడటానికి చాలా ఇబ్బందికరంగా అనిపిస్తుంది. ఈ సమస్య నుండి బయటపడటానికి చాలా మంది బ్యూటీ పార్లర్ల చుట్టూ తిరిగి పెడిక్యూర్ పేరుతో వేల రూపాయలు ఖర్చు చేస్తుంటారు. కానీ అదంతా తాత్కాలికమే. మీ వంటగదిలో సహజంగా లభించే కొన్ని వస్తువులతోనే ఈ నల్లటి టాన్‌ను శాశ్వతంగా సులభంగా ఎలా వదిలించుకోవాలో వివరంగా తెలుసుకుందాం.

శనగపిండి, పెరుగు మిశ్రమం: శనగపిండి చర్మాన్ని లోతుగా శుభ్రపరచడంలో అద్భుతంగా పనిచేస్తుంది. పెరుగులో ఉండే లాక్టిక్ యాసిడ్ చర్మంపై ఉన్న నల్ల మచ్చలను, టాన్‌ను వేగంగా తగ్గించడంలో సహాయపడుతుంది. ఈ ప్యాక్ తయారు చేయడానికి, 2 టేబుల్ స్పూన్ల శనగపిండిలో 1 టేబుల్ స్పూన్ పెరుగు ఒక చిటికెడు పసుపు పొడిని కలపండి. ఈ మిశ్రమాన్ని మీ పాదాలకు బాగా పట్టించి 15 నుండి 20 నిమిషాల పాటు అలాగే ఆరనివ్వండి. అది పూర్తిగా ఆరిన తర్వాత, చేతులతో మెల్లగా రుద్దుతూ శుభ్రమైన నీటితో కడిగేయండి. ఇది నల్ల మచ్చలను తొలగించడమే కాకుండా మీ పాదాలను ఎంతో మృదువుగా మారుస్తుంది.

నిమ్మ, చక్కెర స్క్రైబ్.. నిమ్మకాయ, చక్కెర ఒక అద్భుతమైన ‘సహజ స్క్రబ్’ లాగా పనిచేస్తాయి. నిమ్మకాయలోని ఆమ్ల గుణాలు సహజంగా చర్మంపై ఉన్న మురికిని తొలగిస్తాయి. చక్కెర మృతకణాలను (డెడ్ స్కిన్ సెల్స్) తొలగించడంలో సహాయపడుతుంది. ఒక నిమ్మకాయను సగానికి కోసి, దానిపై కొద్దిగా చక్కెర చల్లండి. దానిని నేరుగా మీ పాదాలపై నల్లగా ఉన్న ప్రాంతాల్లో 5 నిమిషాల పాటు మృదువుగా రుద్దండి. ఆ తర్వాత చల్లటి నీటితో కడగండి. ఈ చిట్కా చర్మాన్ని తక్షణమే కాంతివంతంగా మార్చడంలో సమర్థవంతంగా పనిచేస్తుంది.

టమాటా, బంగాళదుంప రసం: టమాటాలు, బంగాళాదుంప రసంలో ఉండే బ్లీచింగ్ ఆమ్ల గుణాలు మీ పాదాలపై ఉన్న నల్ల మచ్చలను వదిలించుకోవడానికి ఒక అద్భుతమైన నివారణగా పనిచేస్తాయి. దీనిని తయారు చేయడానికి, ఒక గిన్నెలో 2 టేబుల్ స్పూన్ల బంగాళాదుంప రసాన్ని తీసుకుని దానికి తగినంత టమాటా గుజ్జును కలపండి. ఈ మిశ్రమాన్ని మీ పాదాలకు బాగా పట్టించండి. అది ఆరిన తర్వాత శుభ్రంగా కడిగేయండి. దీనిని క్రమం తప్పకుండా ఉపయోగించడం వల్ల మడమల మీద ఉన్న మొండి మచ్చలను సైతం వదిలించుకోవచ్చు.

కాఫీ, కొబ్బరి నూనె స్క్రబ్: కాఫీ పొడి చర్మాన్ని తక్షణమే కాంతివంతం చేస్తుందని, కొబ్బరి నూనె చర్మాన్ని లోపలి నుండి తేమగా (మాయిశ్చరైజ్) ఉంచుతుందని బ్యూటీషియన్లు చెబుతున్నారు. ఒక కప్పులో 1 టేబుల్ స్పూన్ కాఫీ పొడికి, 1 టేబుల్ స్పూన్ కొబ్బరి నూనెను కలపండి. ఈ స్క్రబ్‌తో మీ పాదాలను కనీసం 5 నిమిషాల పాటు సున్నితంగా మసాజ్ చేసి, ఆ తర్వాత కడిగేయండి. మీ పాదాలకు తక్షణ మెరుపును ఇవ్వడానికి ఈ ఇంటి చిట్కా అద్భుతంగా పనిచేస్తుంది.

ముఖ్యమైన జాగ్రత్తలు: రాత్రి పడుకునే ముందు మీ పాదాలను అలోవెరా జెల్ (కలబంద) లేదా ఏదైనా మాయిశ్చరైజింగ్ క్రీమ్‌తో మసాజ్ చేసుకోండి. ఇది రాత్రికి రాత్రే దెబ్బతిన్న చర్మాన్ని రిపేర్ చేస్తుంది. మీరు మీ ముఖానికి సన్‌స్క్రీన్ రాసుకున్నట్లే, పాదాలకు కూడా రాసుకోవడం చాలా ముఖ్యం. బయటకు వెళ్లే 20 నిమిషాల ముందు తప్పకుండా సన్‌స్క్రీన్ లోషన్ రాసుకోండి. అలాగే తగినంత నీరు తాగడం వల్ల చర్మం లోపలి నుండి శుభ్రపడి, నల్లబడటం తగ్గుతుంది.

మీ పాదాలపై ఉన్న నల్లటి మచ్చలను తొలగించడం ఏమాత్రం కష్టం కాదు. పైన పేర్కొన్న సహజమైన చిట్కాలలో దేనినైనా వారానికి 2 నుండి 3 సార్లు క్రమం తప్పకుండా ప్రయత్నించండి. తక్కువ సమయంలోనే మీ పాదాలు మళ్లీ నునుపుగా, అందంగా కాంతివంతంగా మారడాన్ని మీరే గమనిస్తారు.