Vamaku Pacchadi: వాము ఆకుతో ఎన్నో ఆరోగ్యప్రయోజలు.. రుచికరమైన వామాకు నువ్వుల రోటి పచ్చడి తయారీ

Vamaku Pacchadi: భారతీయుల వంటిల్లే ఓ ఔషధాల గని. ఎన్నో పదార్ధాలను వాడతాం వాటిల్లో ఒకటి వాము గింజలు. ఈ గింజలను వంటకాలతో పాటు పలురకాల పానీయాలు తయారీకోసం ఉపయోగిస్తారు. వాము చక్కని సువాసనను అందిస్తుంది. వాములోని యాంటీ ఆక్సిడెంట్స్, విటమిన్స్, ప్రోటీన్స్ వంటి ఖనిజాలు శరీర ఆరోగ్యానికి ఎంతో మేలు చేస్తాయి. వాము గింజలు ఆరోగ్యానికి ఎంత మేలు చేస్తాయో అదేవిధంగా వాము మొక్క ఆకులు అంతే మేలు చేస్తాయి. అందుకనే కనీసం మూడు నెలలకు ఒక్కసారి అయినా వాము పొడి కాని వాము ఆకు కాని వాడితే ఉదరం శుభ్ర పడుతుంది. వాము ఆకు అప్పుడప్పుడు వాడితే ఆరోగ్యానికి చాలా మంచిది. ఈ వాము ఆకుతో చాలా మంది బజ్జీలు వేసుకుంటారు. వాము ఆకుతో రోటి పచ్చడి కూడా చేసుకోవచ్చు. ఈరోజు వాము ఆకుతో పచ్చడి తయారీ విధానం తెలుసుకుందాం

కావలసిన పదార్ధాలు:

వాము ఆకులు – సుమారు 35 నుంచి 40 వరకూ చింతపండు – నిమ్మకాయంత నూనె – సరిపడినంత ఎండు మిర్చి – 10 మెంతులు – అర స్పూను ఆవాలు – అర స్పూను పసుపు – కొద్దిగా ఇంగువ- కొద్దిగా ఉప్పు – తగినంత

తయారీ విధానం:

ముందుగా వాము ఆకులను కడిగి శుభ్రం చేసుకోవాలి .తర్వాత స్టౌ వెలిగించి బాణలి పెట్టి.. దానిలో నూనె వేయకుండా నువ్వులు వేసుకుని కమ్మని వాసన వచ్చే వరకు వేయించి చల్లారిన తర్వాత రోటిలో పొడి కొట్టుకుని విడిగా వేరే ప్లేటు లోకి తీసుకుని పక్కకు పెట్టుకోవాలి. ఆ బాణలి లో వేయించడానికి సరిపడే నూనె వేసి నూనె బాగా కాగగానే ముందుగా మెంతులు తర్వాత ఎండు మిరపకాయలు, ఆవాలు, ఇంగువ వేసి పోపు వేయించుకొని వేరే ప్లేటులోకి విడిగా తీసుకోవాలి. తర్వాత మరోకొంచెం నూనె వేసుకుని వాము ఆకులు, కొంచెం పసుపు వేసి ఒక అయిదు నిముషాలు ఆకును బాగా మగ్గనివ్వాలి.

తర్వాత రోటి లో వేయించి సిద్ధంగా ఉంచుకున్న పోపు, చింతపండు మరియు తగినంత ఉప్పువేసి మెత్తగా పచ్చడి బండతో దంచుకోవాలి. తర్వాత మగ్గించిన వాము ఆకును కూడా వేసి పచ్చడి బండతో మెత్తగా నూరుకోవాలి. తర్వాత వేయించి సిద్ధంగా ఉంచుకున్న నువ్వుల పొడి కూడా వేసి రోకటి బండతో దంచుకుని వేరే గిన్నెలోకి తీసుకోవాలి. అంతే ఎంతో రుచికరమైన వాము ఆకు రోటి పచ్చడి రెడీ. ఈ వామాకు నువ్వుల రోటి పచ్చడి వేడి వేడి అన్నంలో నెయ్యి వేసుకుని తింటే ఆహా ఏమి రుచి అంటారు.

Also Read: అమెరికాలోని విదేశీ విద్యార్థులకు షాక్.. ఓపీటీ ప్రోగ్రామ్‌ రద్దుపై బిల్లు.. పాసైతే భారతీయ యువతపై భారీ ప్రభావం