కూలింగ్ వాటర్ తాగితే బరువు పెరుగుతారా? సోషల్ మీడియాలో వైరల్ అవుతున్న వార్తల్లో నిజమెంత?

బరువు తగ్గాలనుకునే వారు చేసే ప్రయత్నాల్లో నీటి ఉష్ణోగ్రత కూడా ఒక చర్చనీయాంశంగా మారింది. చల్లని నీరు తాగితే శరీరంలో కొవ్వు పెరుగుతుందని, జీర్ణక్రియ మందగిస్తుందని సోషల్ మీడియాలో రకరకాల వాదనలు వినిపిస్తున్నాయి. ఫిట్‌నెస్ కోచ్ ప్రియాంక్ మెహతా వంటి ఇన్‌ఫ్లుయెన్సర్లు ఈ అంశంపై చర్చను మళ్ళీ తెరపైకి తెచ్చారు. అయితే, నిజంగా చల్లని నీరు తాగడం వల్ల బరువు పెరుగుతారా? లేక తగ్గుతారా? సైన్స్ ఏం చెబుతోంది?

పరిశోధనలు ఏం చెబుతున్నాయి?

• థర్మోజెనిక్ ప్రభావం- 2021లో జరిగిన ఒక అధ్యయనం ప్రకారం, చల్లని నీరు తాగడం వల్ల విశ్రాంతి సమయంలో ఖర్చయ్యే శక్తి తాత్కాలికంగా 25 శాతం వరకు పెరుగుతుంది. పిల్లలపై చేసిన ఈ అధ్యయనంలో, తగినంత నీరు తాగడం వల్ల ఏడాదికి సుమారు 1.2 కిలోల బరువు తగ్గే అవకాశం ఉందని తేలింది.
• క్రీడాకారులకు మేలు- వ్యాయామం చేసే సమయంలో చల్లని నీరు తాగడం వల్ల శరీరం అతిగా వేడెక్కకుండా ఉంటుంది. 2012 అధ్యయనం ప్రకారం, చల్లని పానీయాలు క్రీడాకారుల పనితీరును మెరుగుపరుస్తాయి.

చల్లని నీటితో రిస్క్..

చల్లని నీరు నేరుగా బరువు పెంచకపోయినా, కొన్ని సందర్భాల్లో ఇది ఇబ్బంది కలిగించవచ్చు.

1. జలుబు, దగ్గు: జలుబు ఉన్నప్పుడు చల్లని నీరు తాగితే నాసికా మార్గంలోని శ్లేష్మం చిక్కబడి శ్వాస తీసుకోవడం కష్టమవుతుంది.
2. మైగ్రేన్: ఇప్పటికే మైగ్రేన్ సమస్య ఉన్నవారిలో చల్లని నీరు నొప్పిని ప్రేరేపించే అవకాశం ఉంది.
3. జీర్ణక్రియ: కొందరిలో భోజనం తర్వాత చల్లని నీరు తాగడం వల్ల కండరాలు బిగుసుకుపోయి జీర్ణక్రియ కొంచెం మందగించవచ్చు, కానీ ఇది అందరిలో జరగదు.

వేడి నీరు మంచిదా.. చల్లని నీరా?

వేడి నీరు తాగడం వల్ల రక్త ప్రసరణ మెరుగుపడుతుంది మరియు శరీరంలోని విషతుల్యాలు బయటకు వెళ్తాయి. అయితే, హైడ్రేషన్ విషయానికి వస్తే నీటి ఉష్ణోగ్రత పెద్దగా తేడా చూపదు. 16°C ఉష్ణోగ్రత వద్ద ఉన్న నీటిని తాగడం వల్ల ప్రజలు ఎక్కువ నీరు తాగడానికి ఆసక్తి చూపుతారని, తద్వారా హైడ్రేషన్ మెరుగుపడుతుందని పరిశోధనలు చెబుతున్నాయి. బరువు తగ్గడానికి చల్లని నీరు లేదా వేడి నీరు అనేది ప్రధాన అంశం కాదు. చక్కెర పానీయాలకు బదులుగా నీటిని ఎంచుకోవడం, రోజూ పురుషులు కనీసం 3.7 లీటర్లు, మహిళలు 2.7 లీటర్ల నీరు తాగడం ముఖ్యం. చల్లని నీరు తాగడం వల్ల కొన్ని క్యాలరీలు అదనంగా ఖర్చయినా, అది భారీగా బరువు తగ్గడానికి ఏమాత్రం సరిపోదు.