లగేజీ మోసే బాధ నుంచి భర్త, బాయ్‌ఫ్రెండ్‌కు విముక్తి..! వినూత్న ఆలోచనతో స్టార్టప్

ఢిల్లీలోని లాజ్‌పత్ నగర్, సరోజినీ నగర్ లేదా చాంద్‌నీ చౌక్.. ప్రదేశం ఏదైనా సరే, ఇలాంటి ఐకానిక్ మార్కెట్లలో షాపింగ్ చేయడం ఎంత ఉత్సాహాన్ని ఇస్తుందో, శారీరకంగా అంతటి అలసటను కలిగిస్తుంది. ఈ కష్టాలన్నింటికీ చెక్ పెడుతూ ఢిల్లీకి చెందిన ఒక సరికొత్త స్టార్టప్ రంగంలోకి దిగింది. ఇది వినడానికి కొంచెం వింతగా ఉన్నా.. షాపింగ్ కి వెళ్లినప్పుడు బ్యాగులు మోయలేక చచ్చే వేలాది మంది భర్తలకు, బాయ్‌ఫ్రెండ్స్‌కు, అలసిపోయే తల్లులకు ఈ సరికొత్త సర్వీస్ ఒక వరంలా మారిందనడంలో ఎలాంటి సందేహం లేదు. అదే ‘క్యారీమెన్’ (CarryMen) షాపింగ్ అసిస్టెన్స్ సర్వీస్. “మీరు షాపింగ్ చేయండి.. మీ లగేజ్ మేము మోస్తాము” అనే నినాదంతో ఈ సరికొత్త సేవలు ప్రారంభమయ్యాయి. ఢిల్లీకి చెందిన ఇద్దరు స్థానిక యువకులు తమ కుటుంబ సభ్యులతో కలిసి మార్కెట్లకు వెళ్లినప్పుడు అనుభవించిన కష్టాల నుండే ఈ వినూత్న ఆలోచన పుట్టుకొచ్చింది.

గంటకు రూ. 149..

కేవలం గంటకు 149 రూపాయల చొప్పున చెల్లిస్తే చాలు.. ఒక శిక్షణ పొందిన అసిస్టెంట్ (సహాయకుడు) మార్కెట్ అంతా మీ వెంటే ఉంటాడు. కస్టమర్ల సౌకర్యార్థం 2, 3 లేదా 4 గంటల ప్యాకేజీలు కూడా అందుబాటులో ఉన్నాయి. ఈ అసిస్టెంట్ కేవలం షాపింగ్ బ్యాగులు మోయడమే కాకుండా, మార్కెట్ సందులలో దారి చూపించడం, ఫుడ్ కౌంటర్ల వద్ద క్యూలో నిలబడటం, షాపింగ్ ముగిసిన తర్వాత మెట్రో గేట్లు లేదా పార్కింగ్ ఏరియా వరకు లగేజ్ తీసుకురావడం వంటి పనులన్నీ చూసుకుంటాడు. దీనివల్ల కస్టమర్లు చేతులు ఖాళీగా ఉంచుకుని, ఎలాంటి ఒత్తిడి లేకుండా ప్రశాంతంగా షాపింగ్ ఎంజాయ్ చేయవచ్చు.

ఈ సర్వీస్ ముఖ్యంగా గర్భిణీ స్త్రీలకు ఎంతో ఉపయోగకరంగా మారింది. గంటల తరబడి బరువైన బ్యాగులు పట్టుకుని నడవడం వారి ఆరోగ్యానికి మంచిది కాదు. అలాగే చిన్న పిల్లలతో వచ్చే తల్లిదండ్రులకు కూడా ఇది పెద్ద ఉపశమనం. ఒక చేత్తో స్ట్రాలర్ (పిల్లల బండి) పట్టుకుని, మరో చేత్తో బ్యాగులు మోయడం చాలా కష్టం. అందుకే ఈ స్టార్టప్ అసిస్టెంట్‌తో పాటు అదనపు ఛార్జీతో స్ట్రాలర్ రెంటల్ సౌకర్యాన్ని కూడా అందిస్తోంది.

అన్నీ ఆన్‌లైన్!

ఈ సేవలను ఎక్కువగా వృద్ధులు, మహిళలు బుక్ చేసుకుంటున్నారు. పెద్ద వయసు వారు బట్టలు, బెడ్‌షీట్లు, ఇతర గృహోపకరణాలు కొనేటప్పుడు వారు లగ్జరీని ఆశించరు, కేవలం కాసేపు కూర్చోవడానికి చిన్న స్థలం, నీడను కోరుకుంటారు. కస్టమర్ల మనసెరిగిన క్యారీమెన్ బృందం ఒక అడుగు ముందుకు వేసి వినూత్నంగా ఫోల్డబుల్ క్యాంపింగ్ చైర్లను (మడత కుర్చీలు) ప్రవేశపెట్టింది. షాపింగ్ చేస్తూ కస్టమర్ అలసిపోతే, అసిస్టెంట్ వెంటనే మార్కెట్ మధ్యలోనే ఆ కుర్చీని వేసి వారు కాసేపు విశ్రాంతి తీసుకునేలా ఏర్పాట్లు చేస్తాడు.

వీటితో పాటు ఎండ, వానల నుండి రక్షణకు గొడుగులు, మొబైల్ ఛార్జింగ్ కోసం పవర్ బ్యాంకులు, మరియు తగినన్ని నీళ్ల సదుపాయాన్ని కూడా అందిస్తున్నారు. అయితే, ఒక అసిస్టెంట్ గరిష్టంగా 12 కిలోల వరకు మాత్రమే బరువు మోయగలడు. అంతకంటే ఎక్కువ బరువు ఉంటే మరొక అసిస్టెంట్‌ను హైర్ చేసుకోవాల్సి ఉంటుంది.

ఏప్రిల్​లో ప్రారంభమైన ఈ స్టార్టప్, ఎలాంటి భారీ ఇన్ ఫ్లుయెన్సర్ ప్రమోషన్లు లేకుండా కేవలం మౌత్ టాక్ ద్వారానే మొదటి నెలలోనే 50కి పైగా బుకింగ్స్ సాధించి సంచలనం సృష్టించింది. ప్రస్తుతం ఈ సర్వీస్ లాజ్‌పత్ నగర్ మార్కెట్‌లో మాత్రమే అందుబాటులో ఉంది, త్వరలోనే చాంద్‌నీ చౌక్‌కు కూడా విస్తరించనున్నారు.

ఇలాంటి స్టార్టప్‌లు షాపింగ్ లోని శారీరక శ్రమను మరియు లగేజ్ మోసే ఇబ్బందులను తగ్గించగలవు. కానీ, షాపింగ్‌లో మనకు లభించే అత్యంత తీపి జ్ఞాపకాలు మనతో పాటు వచ్చే మనుషులతోనే ముడిపడి ఉంటాయి. కుటుంబం కోసం నిశ్శబ్దంగా బ్యాగులు మోసే తండ్రి, ఇష్టం లేకపోయినా చెల్లెలి కోసం మార్కెట్ అంతా తిరిగే అన్నయ్య, ట్రయల్ రూమ్ బయట గంటల తరబడి ఓపికగా వేచి ఉండే భర్త.. వీరిచ్చే ఆత్మీయతను, ప్రేమను ఏ కమర్షియల్ సర్వీస్ భర్తీ చేయలేదు. టెక్నాలజీ ఇచ్చే సౌకర్యాలను వాడుకుంటూనే, మన ప్రియమైన వారి తోడును ఆస్వాదించడమే అసలైన సంతోషం.