Hyderabad: SIR సాకుతో ఓట్ల తొలగింపునకు ప్లాన్!.. బీజేపీ బీఎల్‌ఏపై కేసు నమోదు
తెలంగాణలో ఓటర్ల జాబితా సవరణ ప్రక్రియలో కీలక పరిణామం చోటుచేసుకుంది. ముషీరాబాద్‌లో ఫారం-7 దుర్వినియోగంపై బీజేపీ ఏజెంట్‌పై పోలీసులు కేసు నమోదు చేశారు. అర్హులైన ఓటర్ల పేర్లను తొలగించే ప్రయత్నాలు జరుగుతున్నాయన్న ఆరోపణలు రావడంతో రాష్ట్రవ్యాప్తంగా ఈ అంశం తీవ్ర చర్చనీయాశంగా మారింది. ఈ వ్యవహారంపై పోలీసులు సమగ్ర విచారణ ప్రారంభించారు.
Updated on: Oct 07, 2026 | 10:25 AM
హైదరాబాద్: ఓటర్ల జాబితా సవరణ (SIR) ప్రక్రియను అడ్డం పెట్టుకుని అర్హులైన ఓటర్ల పేర్లను తొలగించేందుకు ప్రయత్నాలు జరుగుతున్నాయన్న అనుమానాలు తెలంగాణలో తీవ్ర చర్చనీయాంశంగా మారాయి. ముషీరాబాద్ నియోజకవర్గ పరిధిలో నిబంధనలకు విరుద్ధంగా ఫారం-7 దరఖాస్తులు సమర్పించారన్న ఆరోపణలపై హైదరాబాద్‌లో బీజేపీ బూత్ లెవల్ ఏజెంట్ (BLA)పై పోలీసులు కేసు నమోదు చేశారు. తెలంగాణలో ఫారం-7 వ్యవహారంలో ఎఫ్‌ఐఆర్ నమోదు కావడం ఇదే తొలిసారి కావడంతో ఈ అంశం రాజకీయంగా, ఎన్నికల పరంగా ప్రాధాన్యం సంతరించుకుంది.
ముషీరాబాద్‌లో తొలి కేసు.. పోలీసుల విచారణ ప్రారంభం
ఎన్నికల సమయంలో ఓటర్ల జాబితా సవరణ అత్యంత కీలకమైన అంశం. అర్హులైన ప్రతి ఒక్కరి పేరు జాబితాలో ఉండటం ఎంత ముఖ్యమో, అనర్హుల పేర్లను తొలగించడం కూడా అంతే ముఖ్యం. అయితే, ముషీరాబాద్ నియోజకవర్గంలో 30 మంది ఓటర్ల పేర్లను తొలగించాలంటూ ఎస్. బాలచందర్ అనే బీజేపీ బీఎల్‌ఏ ఫారం-7 దరఖాస్తులను సమర్పించారన్నది ప్రధాన ఆరోపణ.
ఓ ఎన్నికల అధికారి ఇచ్చిన అధికారిక ఫిర్యాదు మేరకు రంగంలోకి దిగిన చిక్కడపల్లి పోలీసులు బీఎన్‌ఎస్ (BNS) చట్టంతో పాటు ప్రజా ప్రాతినిధ్య చట్టంలోని సంబంధిత సెక్షన్ల కింద సదరు ఏజెంట్‌పై కేసు నమోదు చేశారు. ఈ దరఖాస్తుల వెనుక ఉన్న నిజానిజాలను వెలికితీసేందుకు పోలీసులు ఇప్పటికే సమగ్ర దర్యాప్తును ప్రారంభించారు.
గోషామహాల్‌లోనూ ఆరోపణలు..
మరోవైపు గోషామహాల్ నియోజకవర్గంలోనూ ఫారం-7 వినియోగంపై వివాదం రేగింది. అక్కడ దాదాపు 122 మంది ఓటర్ల పేర్లకు సంబంధించి ముందే ముద్రించిన ఫారం-7 దరఖాస్తులను సమర్పించారనే ఆరోపణలు వచ్చాయి. అయితే వీటిని పరిశీలించిన బూత్ లెవల్ ఆఫీసర్ (BLO) వెంటనే ఆ దరఖాస్తులను తిరస్కరించినట్లు అధికారులు వెల్లడించారు.
కుట్ర కోణంపై విమర్శలు.. ఖండించిన బీజేపీ
ఈ తరహా ఫారం-7 దరఖాస్తుల వెనుక ఉద్దేశపూర్వక రాజకీయ కుట్రలు దాగి ఉన్నాయని పలు రాజకీయ పార్టీలు తీవ్ర విమర్శలు గుప్పిస్తున్నాయి. అయితే ఈ ఆరోపణలను బీజేపీ పూర్తిగా ఖండించింది. ఈ మొత్తం వ్యవహారంలో ఒక స్పష్టమైన నిర్ణయానికి రావడానికి ఎన్నికల అధికారులు, పోలీసులు జరిపే విచారణ అత్యంత కీలకం కానుంది.
మరిన్ని తెలంగాణ వార్తల కోసం ఇక్కడ క్లిక్ చేయండి.
