Harmanpreet vs Smriti: ఇద్దరి మధ్య విభేదాలా? మహిళల టీమ్‌లో కెప్టెన్సీ మార్పు వెనుక అసలు కథ ఇదే

Harmanpreet vs Smriti: భారత మహిళల క్రికెట్ జట్టులో పెద్ద మార్పు జరిగింది. అన్ని ఫార్మాట్ల కెప్టెన్సీ బాధ్యతలకు హర్మన్‌ప్రీత్ కౌర్ రాజీనామా చేయడంతో, వైస్ కెప్టెన్‌గా ఉన్న స్మృతి మంధానకు కెప్టెన్సీ దక్కింది. జపాన్‌లో జరిగిన ఆసియా క్రీడల్లో టీమిండియాను వరుసగా రెండోసారి గోల్డ్ మెడల్ విజేతగా నిలిపి కెప్టెన్‌గా హర్మన్‌ప్రీత్ వీడ్కోలు పలికింది. 2013లో అరంగేట్రం చేసిన 30 ఏళ్ల స్మృతి మంధాన, అన్ని ఫార్మాట్లలో కలిపి 10,000 కంటే ఎక్కువ పరుగులు సాధించి ప్రస్తుతం జట్టులో అత్యుత్తమ బ్యాటర్‌గా కొనసాగుతోంది.

డ్రెస్సింగ్ రూమ్‌లో అసంతృప్తి

కెప్టెన్సీ మార్పు వెనుక డ్రెస్సింగ్ రూమ్‌లో పెరిగిన విభేదాలు కారణమని తెలుస్తోంది. ఒకప్పుడు ఎంతో ఆప్యాయంగా ఉండే హర్మన్‌ప్రీత్ కౌర్, స్మృతి మంధాన కొంతకాలంగా ఒకరినొకరు నేరుగా చూసుకోవడానికి కూడా ఇష్టపడట్లేదని సమాచారం. ఈ అంతర్గత విభేదాల వల్ల జట్టు వాతావరణంలో తీవ్రమైన ఉద్రిక్తత నెలకొంది. జపాన్ ఆసియా క్రీడల్లో స్వర్ణం నెగ్గినా, ఇటీవల జరిగిన టీ20 ప్రపంచకప్‌లో జట్టు త్వరగా నిష్క్రమించడం కెప్టెన్సీ మార్పును వేగవంతం చేసింది.

బీసీసీఐ రివ్యూ మీటింగ్

గౌహతిలో బీసీసీఐ సెక్రటరీ దేవజిత్ సైకియా అధ్యక్షతన జరిగిన రివ్యూ మీటింగులో జట్టు ప్రదర్శనపై చర్చించారు. భవిష్యత్తు ప్రణాళికల్లో భాగంగా కెప్టెన్సీ మార్పు అనివార్యమని బోర్డు హర్మన్‌ప్రీత్‌కు స్పష్టం చేసింది. దాంతో పరిస్థితిని అర్థం చేసుకున్న 37 ఏళ్ల హర్మన్‌ప్రీత్ స్వయంగా రాజీనామా నిర్ణయం తీసుకుంది. ఐసిసి ట్రోఫీల వేటలో ఆశించిన ఫలితాలు రాకపోవడంతో బోర్డు ఈ కఠిన నిర్ణయం వైపు మొగ్గు చూపక తప్పలేదు.

బీసీసీఐ సెలెక్టర్ల అలసత్వం

నాయకత్వ మార్పిడిని సకాలంలో చేపట్టకపోవడంపై సెలెక్టర్లపై విమర్శలు వస్తున్నాయి. స్వదేశంలో జరిగిన వన్డే ప్రపంచకప్ గెలిచినప్పుడే స్మృతికి బాధ్యతలు అప్పగిస్తే బాగుండేదని మాజీ కెప్టెన్ మిథాలీ రాజ్ అభిప్రాయపడ్డారు. రెండేళ్ల కిందటే స్మృతిని టెస్టులు, వన్డేలకు కెప్టెన్‌గా చేసి, టీ20లకు షెఫాలీ వర్మ లాంటి యువ క్రీడాకారిణికి బాధ్యతలు ఇవ్వాల్సిందని ఆమె పేర్కొన్నారు. గతంలో మిథాలీ నుంచి హర్మన్ కెప్టెన్సీ తీసుకున్నప్పుడు కూడా ఇలాంటి విభేదాలే రావడం గమనార్హం.

ఆటగాడిగా కొనసాగనున్న హర్మన్‌ప్రీత్

కెప్టెన్సీ నుంచి తప్పుకున్నా కనీసం రెండు మూడేళ్ల పాటు సాధారణ ఆటగాడిగా జట్టులో కొనసాగాలని హర్మన్‌ప్రీత్ భావిస్తోంది. అయితే కేవలం బ్యాటర్‌గా జట్టులో ఉండాలంటే ఫామ్, ఫిట్‌నెస్ మెరుగుపరుచుకోవడం ఆమెకు పెద్ద సవాలుగా మారనుంది. గతం పక్కన పెట్టి, జట్టు ప్రయోజనాల కోసం హర్మన్, స్మృతి మంధాన కలిసికట్టుగా సాగుతారో లేదో కాలమే సమాధానం చెప్పాలి.

మరిన్ని క్రీడా వార్తల కోసం ఇక్కడ క్లిక్ చేయండి..